龍景軒 - 唯一的三星

一直想試一下這家全港唯一的三星店, 即使外間有不少評價話甚麼這裡不值三星, 自己沒有來過, 又怎能下判語呢. 而且飲食的評論其實也係主觀的, 你認為好吃的, 我未必會有相同感覺. 反之也是.
還是抱著期待的心情來吃這個午餐.
訂了12點9的位置, 早來了, 位置也一早預備好, 馬上入座. 先講環境, 或許沒有樓上二星店的正海景, 但坐在窗口位, 看著週末的維港, 景致依然係不錯. 坐係偏廳, 即使人客不少也不會覺得太過嘈吵同逼狹. 裝修係比較新派, 感覺上係幾型的, 沒有一般中餐館那種感覺. 看來單計環境, 這裡應該取了很高的分數.
當然係要先飲茶. 要了小弟慣常喝開的香片. 茶壺係個相當大型的器皿, 要自己斟茶, 其實都幾麻煩. 或許正係這個原因, 店方也盡量為我們添茶. 始終人比較多, 沒有做到一飲完啖茶10秒內就加茶, 但也做得好足了. 至於壺香片, 都只係一般, 或許這個$20的茶錢, 只係用在服務上面. 要喝靚茶, 還是要再揀餐牌內的貴價茶.
想試多幾個不同範疇的食物, 每項就不叫太多. 午市來, 當然由點心開始.
龍太子蒸餃 $68: 9分, 首先係位上的龍太子蒸餃. 係一件都幾巨大的餃, 賣相有點像在吃軟殼蟹壽司, 用菠菜皮包著, 但在面頭的, 就由軟殼蟹變成蝦肉, 下面仲有帶子, 而最底的就係龍蝦肉. 這個點心, 賣相靚, 用料也相當精緻甚至豪華, 帶子同埋龍蝦肉也好鮮甜. $34一件也係物有所值的.

本來沒有甚麼挑剔的地方了. 但晚一點小弟有點敏感, 是否海鮮不夠新鮮? 奇.
崧子叉燒菠蘿包 $48: 9分, 是日沒有期待的雪山包, 幾失望, 唯有轉而要這個崧子叉燒菠蘿包. 菠蘿皮脆卜卜, 包鬆化, 咬落去也係熱辣辣, 加上了崧子, 豐富了味道, 連埋叉燒一同吃, 滿意.

梅辣燒鵝脆煎堆 $48: 9分, 炸得相當香脆的煎堆, 個皮鋪滿芝麻, 正. 用上了燒鵝做餡, 跟平日吃開的煎堆大為不同. 創意可嘉, 但出來的效果好與壞就見仁見智. 始終燒鵝跟煎堆的味道真算大欖也且唔埋, 不過辣辣地的燒鵝, 也幾特別的.
原隻鮑魚雞粒酥 $88: 9分, 這裡的招牌, 也當然要一個試試. $44一粒, 有原隻鮑魚, 仲係份量不少, 委實也不算好貴的. 當然, 喜不喜歡飲茶食鮑魚係另一個問題.

這裡的鮑魚也真的做得出色, 鋪上濃濃的醬汁, 吃落口鮮味相當, 也煮得夠稔, 跟對面海的二星店明顯勝一籌. 當然更出色的係底下的酥皮, 香濃的牛油, 真有在吃法式甜點的感覺. 兩者連在一起也很匹配, 沒有夾硬來的感覺.
來得這裡, 也沒有不試這點心的道理.
焗釀鮮蟹蓋 $90: 9分, 點心吃四款好了, 也不加碼, 直接進入下一個類別. 午市不想吃得太重, 就揀了輕巧一點的海鮮類食物, 各要一客. 焗釀鮮蟹蓋賣相精緻, 面頭的麵包糠炸得熱辣辣, 相當香脆. 入面如KC兄所見, 真係好多蟹肉. 又或者這樣說, 這裡的蟹蓋, 就係真材實料的給你一個充滿蟹肉的蟹蓋. 賣到$90一客, 也是貨真價實. 唯一要扣分係有點蟹殼.

鮑粒焗釀響螺 $100: 10分, 除了蟹蓋, 也要了客鮑粒焗釀響螺, 這個更加不得了, 係全個下午最欣賞的一客. 外皮一樣炸得金黃香脆, 跟蟹蓋有異曲同工之妙. 之於入面的料, 有鮑魚粒, 響螺肉同埋免治豬肉, 相當豐富. 鮑魚細細粒, 跟之前的原隻鮑魚雞粒酥不同的食法, 一樣精彩, 響螺肉也好鮮甜. 這兩個海鮮類食物, 做得相當精彩.

鮑粒飄香荷葉飯 $80: 8分, 單尾要了個飯, 吃不了炒飯, 就要位上的鮑粒飄香荷葉飯. 上臺的係個籠仔, 小巧精緻. 這裡的荷葉飯, 荷香不太明顯, 是荷葉的問題? 入面的飯都幾乾身, 料足, 兩三口就吃光, 講真, 都幾貴. 比起福記的荷葉飯, 就差了一皮.

龍景精選甜品 $80: 9分, 最後, 要了客dessert sampler, 一口氣試五款甜品, 再加上兩客送的甜品, 一次就能夠吃七種甜品, 也係相當甜的結束. 用上長碟上的龍景精選甜品, 一字長城排開, 相當吸引. 五款甜品分別係生磨杏汁撞蛋白, 豆腐酥, 桂花糕, 奶皇酥, 同埋香芒楊枝甘露.

先吃熱的生磨杏汁撞蛋白. 之前兩晚吃了客相當精彩的杏汁蛋白, 相比之下, 這裡有所不及, 不過也蛋白幾香滑, 杏汁的份量加重一點會更好.
豆腐酥就相當鬆化. 但或許之前對這裡的酥有好高期望, 吃落又有點失望. 如果熱一點的感覺會不同.
桂花糕不算甜, 好清新, 吃完味道濃的食物, 這一道甜品係清味蕾的好幫手.
奶皇酥跟豆腐酥一樣不夠熱, 是我們影相影得太耐的緣故? 奶皇味也不太濃郁, 還好個酥也是相當鬆化.
香芒楊枝甘露用杯上, 其實應該叫做楊枝甘露加芒果布甸. 上半部係楊枝甘露, 下半部就係芒果布甸. 一客甜品, 兩個感受. 這道芒果甜品係文迪的心頭好, 小弟只係吃了兩啖就留給她. 但見她火速吃完, 應該係高水準之作.
之後再吃店方送的甜品, 賣相令小弟想起近日美國大熱的星空奇遇記. 兩都甜品分別係紅豆椰汁糕同埋豆沙煎堆.

紅豆椰汁糕跟桂花糕比就甜好多, 但對小弟來講就剛剛好, 椰汁味濃, 加上底下的紅豆, 簡單而美味.
還有的係豆沙煎堆, 之前吃了燒鵝煎堆, 現再吃豆沙煎堆, 一樣炸得好香脆. 兩個煎堆, 一鹹一甜, 一樣的精彩.
整體食物係高水準的. 無論點心, 兩客海鮮食物, 加上甜品也令人滿意. 服務方面, 係做得足的, 但總覺得欠了點真心, 跟樓上二星店就差了一皮. 是見慣大場面之故?
最後, 小弟覺得這裡係家各方面也有高水準的店. 但又好像沒有比起那幾家二星法國餐廳特別優勝. 這裡是否二星會比較合理一點?