先謝過南瓜兄的安排及打點, 小弟二人不用操心, 準時到達就得.
上次來這裡已經係年前同頌揚來, 今次人數更多, 試的應該係更多. 本身小弟不太吃到辣, 之前來吃都沒有點甚麼辣的菜色, 是晚就吃了不少比較辣的. 當然係對小弟來說的, 對師姐同路比她們就唔係一回事.
店方上菜係慢慢上, 讓我們一住飲, 一住食, 都幾寫意.
麻辣雞腳筋: 8分, 夠爽夠脆, 那份麻辣小弟還頂到, 應該係因為麻比辣多. 麻只係令舌頭有點痺, 飲兩啖酒就無問題.
芥末雞腳筋: 8分, 跟上面的麻辣雞腳筋異曲同工, 只係由麻辣換了成芥末. 一食落口, 那份濃烈的芥末味馬上傳入鼻內, 文迪接受不了, 小弟就好勉強, 當然雞腳筋的口感係依舊.
蒜香雞: 8分, 有雞吃, 自然高興. 上次只吃了一件, 今次就係吃完又吃, 真係吃到不能. 本身這道菜色其實未算很特別, 但係雞肉嫩滑, 食落口已經好吸引, 面頭的蒜香其實只算係點綴一下.
老火湯: 9分, 這時老火湯也上場了, 雞腳湯簡簡單單, 無乜油, 無味精的痕跡, 仲唔收貨?
麻辣鴨舌: 8分, 跟著來的係兩道店方的招牌. 鴨舌又係輕微的辣, 又加點麻, 好香口.
招牌鴨下巴: 8分, 味道同麻辣鴨舌跟似, 但係口感不同, 有點點像吃鳳爪, 倫一倫條骨. 連吃兩樣麻辣, 馬上要救火, 幸好有老火湯加啤酒雙管齊下.
香酥炸鳳尾蝦: 8分, 之前吃過最深印象都算係香酥炸墨魚餅, 是晚墨魚餅鴨腎, 由鳳尾蝦代替. 一樣炸得金黃色的, 脆卜卜, 相當香口, 比起吉的也不輸蝕.
醉香珍肝: 8分, 係雞腎, 雞肝加上醃青瓜粒. 其實小弟一向麻麻肝腎之類的東西, 不過來到又自然會吃的. 吃落口係有淡淡然的酒香, 也不錯.
酸薑皮蛋: 8分, 吃過酸薑皮蛋也不少, 這裡的水準算相當不錯. 溏心的確夠, 食落口那份甜甜的感覺, 已經好滿足.
鹵水鵝片鵝肉: 7分, 近著係幾味鹵水菜色, 也是此店另外的特色項目. 鹵水味來說, 小弟覺得都算足夠, 或許未夠好入味同濃烈, 其實也幾好了. 但係問題是鵝片鵝肉的肉質都係比較實, 老了點, 尤其是鵝片, 嫩滑一點會更好.
鹵水腩肉: 8分, 肥美的腩肉好甘香, 但係近日體重向上指, 加上文迪在旁, 都係不便吃肥肉的部份了.
鹵水鵝翼: 8分, 這個鵝翼幾入味, 不過沒有太多肉, 倫骨為主.
鹵水豆腐: 7分, 感覺上這個鹵水豆腐的鹵水味就不太足夠, 淡了點, 豆腐就算滑的.
腿茸白蘿蔔: 7分, 不算很鮮甜, 比車仔的遜色, 但係上湯加上金華火腿茸, 口感又係幾豐富的.
蔡瀾撈麵: 9分, 每次來都有吃這碟麵, 是晚聽見南瓜兄一樣有叫, 自然歡喜. 或許大家也十成飽了, 麵上臺時大家的手腳也慢了. 是晚吃的係幼麵, 之前吃的都係粗麵, 今次正好試試別的口味. 食落口覺得粗麵口感係好點, 也比較好吸收配料, 不過幼麵也相當不錯. 將蔥, 薑絲, 豬油, 豉油皇等等撈埋一齊, 係非常之香口. 當然個重點應該係豬油, 真係讓碟麵更加甘香, 唯有講句膽固醇萬歲了.
招牌撈麵: 7分, 比較上都係偏愛蔡瀾撈麵了, 招牌撈麵加上了XO醬, 帶點點辣, 反而沒有了那份甘香, 平淡了點.
一連十六道菜, 吃得好滿足. 食物水準依舊高企, 一大班人吃得高興, 已經足夠.
評分
味道: 8/10
環境: 8/10
服務: 8/10
抵食: 8/10
推介度: 8/10
餐廳資料:
阿鴻小吃
北角和富道84-94號銀輝大廈地下4號舖
2570
1108
感謝Herbert提供以上資料
個人日誌: http://herbertlui.blogspot.hk/
