探險家攻略 > 城中探秘 / 旅遊 > 特色景點 / 古蹟 / 長線旅遊 > 麗江。夢想的麗江古城

麗江。夢想的麗江古城

由平凡人於 2014-10-09 02:15:00 發表 | 累積瀏覽 659

分類：長線旅遊特色景點古蹟；地區：中國

< 北京﹑西安﹑成都﹑雲南23天遊 >

第十四天

終於等到出發去雲南既大日子，雲南可以話係我當時最想去既地方，所以放左最多時間﹑最多期望係雲南呢片樂土之上；未到雲南之前經常都聽見好多人話雲南風景靚﹑天氣好，每次見到朋友影出來既靚相都諗有機會一定要去去雲南，所以無論點都好都要到雲南走走；雲南有好多唔同少數民族居住，每一個民族都有各自特色，呢個亦係雲南另一個有趣地方；雲南睇落唔係好大，但唔同地方都有唔同特色﹑文化與氣候，好似南部係熱帶雨林，北部係雪山峻嶺，一個雲南已經可以有唔同感覺，難怪咁多人都喜歡雲南；今次係第一次到雲南，對雲南認識唔多，所以就選擇最多人最易玩既雲南北部


由成都出發，未天光就要坐的士去機場，好彩半夜有好多的士唔怕上唔到；如果可以去多次既話，我唔會再坐飛機，我會由成都先坐火車去西昌，經瀘沽湖再去麗江，咁就可以順路玩埋瀘沽湖啦！不過當時實在太新手，連瀘沽湖係咩都唔知，而家諗返都覺得好蠢，哈哈

半夜車都唔多部，好快就去到機場；街燈又整得幾靚

去到機場都未天光，但已經有好多車來到；坐早機最麻煩就係冇得搭機場巴士，想去機場就只可以坐的士或私家車，交通唔似得香港機場咁方便



由於仲未買到寄倉袋，又唔想比人扔爛個新背囊，所以出發時係街市買左個紅白藍，望落係樣衰少少，但就可以好好保護背囊，呢道又冇人識我樣衰一下又有咩所謂

一早大堂已經有好多人排除等check in，慶幸我搭既四川航空唔洗點排，去到人地主場搭當地航空公司係有少少著數

B大堂所有登機橋差唔多係四川航空霸晒，上機好方便

出面咁多人入面就咁少人，仲好唔洗同人迫，可以慢慢係書局睇下書等上機；不過實在太眼訓，更多時間係恰眼訓...

早機多數都比較準時，飛機準時七點起飛；四川美女空姐又幾靚bor

機上望見成都夜景，心諗唔知仲有冇機會可以再來呢？估唔到一年之後竟然可以再次回到成都

正宗「在雲上看藍天」，飛機一路向彩雲之南飛去


琴日係峨眉山無緣上金頂睇雲海，今日可以係飛機上睇返，上天總算對我不薄



遠方好似有啲野bor？

嘩...原來係日出丫，仲要係雲海+日出


第一次睇到咁靚既日出，原來日出係咁金黃咁靚，唔怪得大家都叫佢咸蛋黃！白雲都染成金黃色，成個天都係金黃色！

大約一個鐘航程，飛機準備降落兩座高山之中

到達麗江機場，雲南之旅就由呢道開始


我個背囊係唔係好易認呢？一眼就望到


麗江機場飛機唔多，呢個時間就只得一個航班，行李好快就出來

就好係一舊垃圾，哈哈

行出大堂就見到有人舉起我個名，第一次有人接機咋；由機場去到麗江市中心有幾十公里路程，客棧準備好車車我地去古城；沿路好爛，坐到patpat都飛起（真係飛起架），據說新路已經起好，以後patpat唔洗受罪啦

一個鐘之後，正式進入麗江古城


先到客棧放低行李，呢間就係經我精心挑選既「木頭人客棧」；選擇呢道最重要既原因係因為老闆娘係廣東人，可以講廣東話已經非常好，而老闆係新加坡人可以用英文溝通，哈哈！不過好可惜一年之後木頭人客棧已經轉左手，唔知老闆老闆娘去左邊呢...

由踏出機場一刻已經有呢個感覺，點解個天可以咁藍架！
呢種藍唔係平時係香港見到既藍，係比藍天更藍，天空就好似一大片佈景版，我有少少懷疑呢個天究竟係唔係假？事實麗江既天空就係咁靚，現場睇比起影相更藍更靚，我從未試過同天空如此接近，難怪麗江咁受歡迎

先去KFC食午餐，但朋友唔知係唔係有少少高山反應定唔夠訓，身體唔係咁舒服所以先返去客棧休息（之後佢唔記得食KFC同下午發生過既事，又會咁奇怪既？）；係客棧同狗仔玩玩，就自己出去行行

我地住係南門附近，唔似得北門呢邊咁熱鬧，所以要拎住地圖慢慢行以防盪失路


「麗江古鎮又名大研鎮，坐落在麗江壩中部，它是中國歷史文化名城中唯一沒有城牆的古鎮，據說是因為麗江土司（世襲統治者）姓木，築城勢必如木字加框而成「困」字之故。納西族名稱叫「鞏本知」，「鞏本」為倉廩，「知」即集市，可知麗江古鎮曾是倉廩集散之地。」

第一次去到高原地方；麗江海拔高度已經有二千三百米，比起之前上得咁辛苦既華山仲要高，唔怪得大陽伯伯咁親近，不停發出溫暖陽光，就算係冬天都唔覺得凍

其實呢個麗江古城應該叫大研古城比較貼切，因為麗江唔只有一個古城，不過好多人都將大研古城叫做麗江古城，大家都知麗江古城係講呢道，所以我都係繼續叫佢麗江古城算啦；麗江古城地標大水車，來到一定要影一影

漫步古城，行到邊就去邊，每一個地方都係美景；之前有好多日都為左景點四圍去，今日可以真正輕鬆一下，隨心所欲hea住走，呢種旅遊方式又幾好bor

係古城走丫走，真係唔知自己去左邊道，但咁又有咩所謂，每一個地方都有美景，唔需要在乎係邊道



全個古城都有流水貫穿，除左靚之外，流水仲同生活息息相關；流水就好似生活命脈，冇左水呢個就唔係令人嚮往既麗江古城lu

官門口我知係邊道啦，就係木府對出既小巷


木府門外牌坊



木府對出既小水車，不停轉不停轉，只要有玉龍雪山係道，每日就有無數清純雪山水供應古城



夕陽西下...

專賣東巴紙既東巴紙坊；東巴紙坊用人手做東巴紙，造紙好簡單，先煮好紙漿，再曬乾就變成紙啦，因為東巴紙原材料帶有微量毒素，聲稱可以防蟲防蛀，幾百年都唔會變壞，我應該冇咁長命見證呢個傳說啦

東巴文同東巴紙一樣都係納西族獨特文代，東巴文睇落似像形文字，可以由圖畫估到當中意思；不過當地已經冇咩人真正識東巴文，東巴文面臨失存邊緣

仲未天黑，繼續四圍行；小食街有好多雲南特色小食，遲啲會嘗試一下


少左陽光感覺差少少，但古城依然咁靚



山上亦有好多建築，有樓梯上山

今日唔上去住，留返第日先慢慢上



古城中心四方街，暫時人流唔算多；冬天去旅行真係好，唔需要擔心多人，旺季一多人迫到爆四圍都唔想去

四方街旁邊既酒吧街仲係好冷清，夜浦一族未出來，暫時都仲可以保持住古城應有既矜持

天色開始轉黑，係時候打道回府；華燈初上，古城開始發散著另一重美態，同日頭既古城感覺好唔同

穿過大街小巷，成功搵到路返去客棧

南門呢邊真係好靜，可以話人影都唔多個；其實呢道去四方街唔係好遠，只係幾分鐘路程；呢邊除左客棧之外就咩都冇，遊客好少會走過來，咁仲好話之出面酒吧嘈到拆天，住呢道完全冇影響



返到客棧

兩隻狗仔好似好歡迎我返來咁bor

月亮高掛，又到晚餐時間

如果問雲南最出名係咩美食？我一定係答米線，平時係香港都勁鐘意食，山長水遠來到雲南唔食米線都對唔住自己啦；係大街見到一間大大間又多人既米線鋪就入左去lu，先來一碟炸豆腐

碟豆腐真係好睇唔好食...唔緊要米線先係主菜，叫左一碗過橋米線，黎左兩大碟配菜，有菜有肉

今次真係大鄉里出城，未食過過橋米線唔識得點食，兩碟餸﹑一碗麵﹑一大碗湯，點開始食好呢？正當我研究緊點食既時候，職員應該留意到有個傻仔唔識食米線就走過來幫忙，原來要先將肉放入湯，之後菜，最後放入米線，一碗過橋米線完成

整出來好大碗，只可惜味道一般，呢碗米線令人失望......

朋友既飯都唔見得好食...所以多人食既鋪頭唔一定好食，由其是旅遊區，大家見多人就入去最後只係變成集體中伏

由餐廳望出去風景唔錯，只係啲野食......

食完出來天色已經黑晒，古城好似上左一個七彩繽紛既新妝

四方街有營火會，變得非常熱鬧


除左納西族婆婆之外，好多遊人都加入一齊圍圈跳舞，就算唔跳舞附近都有好多人圍觀，四方街變得好好好好好熱鬧



但我諗最熱鬧最多人想去既唔係四方街，係四方街旁邊既酒吧街就真；就算未去到酒吧街，距離好遠已經可以聽到遠處傳出強勁音樂，呢道應該係一個可以令人樂而忘返既地方

多人到爆炸


有水燈賣，不過冇人買，哈哈

經過酒吧街，沿途會有好多美女熱情邀請你入去飲酒，雖然成世人都未遇過咁熱情既美女，不過美人計對我係冇效，咁易就比人引誘到就唔係我啦，影完相就揮一揮衣袖，不帶走一片雲彩

都係出面正常啲


個名太正，忍唔住影低

去到大水車對出空地，由下向上望望見一層層建築，又幾特別，如何調轉由山向下望應該更特別更靚

燈光下的許願牌



去到大水車睇夜景，夜晚好似比日頭更多人

再影多張識轉既大水車

時間已經唔早lu，又係時候返客棧休息

見到另一間東巴紙坊

呢間仲有美女座陣


經過小食街，向前行冇幾遠就返到客棧啦

終於去到聞名已久既麗江古城，古城日與夜都散發出唔同味道，雖然而家古城好多遊人﹑好多商鋪...有人可能會覺得古城已經變質，但我相信只要用心睇，一定可以發現古城美麗可愛的一面