探險家攻略 > 城中探秘 / 美食之旅 / 旅遊 > 特色景點 / 古蹟 / 餐廳 / 長線旅遊 > 麗江。雪中的麗江古城

麗江。雪中的麗江古城

由平凡人於 2014-10-10 01:25:00 發表 | 累積瀏覽 756

分類：長線旅遊餐廳特色景點古蹟；地區：中國

< 北京﹑西安﹑成都﹑雲南23天遊 >

第十五天

又一個美麗早上，可以用一句歌詞形容當時心情，「藍藍天空高掛我的夢」，同一個天空竟然可以有咁大分別！去到雲南之前好多時都係見住灰朦朦天氣，就算藍天都未見過呢種藍，來到麗江我先真正認識真實既「藍天」

一早起來已經陽光普照，前一晚要趕去機埸所以冇教好訓，今日可以訓到夠，想幾時起身就幾時起身

大大個太陽曬到入客棧，今日又一個陽光燦爛既好日子；係古城玩埋今日，明天就可以諗下去邊道玩啦，去香格里拉？明永冰川？雨崩？好多好多地方可以去，道道都咁靚好難揀tim

拎左包成都買既薯片出來，嘩...漲到就快爆開，呢個就係高原同平地氣壓高低既分別（電視做緊喜洋洋，掛住睇唔想出去@@）

雖然唔想出去，但點都要去食野既，已經差唔多到午餐時間；係小巷發現左間有米線食既小店，今日繼續食米線



我既酸辣米線，酸酸地辣辣地，岩晒我口味
雲南美食偏向辣，但只係辣唔似四川美食辣中帶麻，我都算食得少少辣所以雲南美食好岩我口味

朋友想食得清啖一啲叫左清湯米線

但我諗來諗去都諗唔起，點解呢餐會出現第三碗米線？完全冇印象

又係古城四圍走，唔需要做啲咩，只係隨便走走已經心情愉快



又再去到大水車對出廣場

天氣實在太好；順路去左大水車對出既「阿拉丁旅遊」，睇下有冇地方岩玩；基本上所有地方都想去，但就要慢慢諗下自己去好還是跟團去好呢？

由東門附近離開左古城；好多人都鐘意係麗江踩單車，可惜當時唔知道踩單車又方便又好玩，所以諗都冇諗過...

由東門小巷再次進入古城

去到古城東面大街「五一街」，有好多店鋪﹑客棧，但人流同「七一街」比真係差天共地

職員多過遊人



成日就係咁四圍行下八卦下，時間好快過


嘩...

好似好危險丫


行行下又返到七一街呢邊既木府



木府對出



來到木府呢邊就係為左搵呢間米線小店；米線店由客棧老闆娘推介，話一定比琴晚個間正宗同好食，既然老闆娘都咁講就一於去試試

過橋米線有平有貴，叫左一個最平既十蚊同貴少少既三十蚊，睇下有咩分別

平與貴分別就係平既少啲餸貴既多啲餸；近個兩碟係屬於三十蚊，遠個碟就係十蚊

我都係想食米線，多餸少餸冇咩所謂，所以食個平既就ok；米線最重要都係米線本身同湯底，只要湯底正米線好食就算冇配料都一樣好好食

倒晒啲野落去兩碗都冇咩分別，係唔係分唔到邊碗打邊碗呢？

仲有個小小氣鍋雞，一餐豐富又好味既過橋米線完成
呢餐米線比起琴晚真係好食好多，味道好難形容，總之就好好食啦，哈哈^^而且呢間仲係廣東人經營，溝通冇難度

食飽後繼續四處遊走

行行下見到有山路就上山啦，山上可以見到古城全景，聽聞風景幾靚

不過冇影到古城出來，返而影左麗江新城......

落返山，又再次到訪四方街

同夜晚一樣，四方街上有納西人跳舞，唔知佢地真係咁鐘意跳舞，定只係表演比遊客睇呢？不過熱鬧程度同夜晚差好遠，只係得佢地跳好少其他人加入

仲有得騎馬仔

大家都好努力洗野



麗江古城好多地方都行過，而家就去未到過既南面


南面真係冇幾多遊客到，住係道既睇落似係當地人，唔知係唔係因為呢邊有間小學，所以街上有好多小朋友，如果想睇古城原始一面可以來呢道，比起五光十色既四方街呢道別有一番風味

所有店鋪都冇開門，冇人流真係好難做到生意


三眼井仲係居民取水用水既地方，最上既井可以取水食用，中間可以用來洗菜，而最下就係用來洗衫，咁就可以保證食用水一定係最乾淨

行行下經過唔少餐廳，不過時間尚早未見有人食飯



餐廳設計好有特色，我相信夜晚係道食野應該幾舒服

好多菜，呢道應該主要係食臘排骨或者牦牛火鍋

今日好快就返到客棧休息，預備聽日早上出發去香格里拉；不過好可惜，明天因為突如其來既事所以唔可以順利出發，冇辦法啦天意如此冇得去lu

第十六天

一覺醒來聽到出面有聲，心諗唔係咁唔好彩冬天都落雨掛？
即刻打開窗望望，又好似係又好似唔係？

嘩...唔係落雨係落雪先岩
第一次見到落雪咋，可以想像一個人第一次睇到落雪係有幾咁開心，即刻跑左出去睇落雪

溫度凍左好多，但無阻睇雪心情，飄雪下既麗江古城比平時更吸引，有白雪點綴一下古城更有古城感覺，有種講唔出既味道，總之就好靚啦



除左我地，老闆﹑老闆娘都出來睇雪影相，老闆娘話麗江好少落雪，每幾年先有一次，所以見到落雪真係好好彩，唔知係唔係真既呢？我又好似真係未睇過有遊記﹑朋友影到麗江落雪既相，哈哈^^無論點都好，可以見到落雪已經好好好好好開心啦，真係喜出望外，之前完全冇諗過

雪好快就落完，要把握時間襯未溶雪之前影低雪景，手快有手慢冇

屋頂仲冇少少雪

雪好快已經溶得七七八八，呢場雪突如其來既雪帶黎一個美麗古城，但亦帶來一個壞消息，「前往香格里拉既路被大雪覆蓋，暫時不能通車」！今日唔可以如期出發去香格里拉啦！失望係有少少，但可以見到落雪更多既係開心而唔係失望，香格里拉將來隨時可以去，麗江落雪係可遇不可求，當然係落雪重要啲啦

過左一陣雪已經溶晒，古城回復原來面貌，南門依舊寧靜；今日先來到麗江既遊人就無緣見到一個雪中古城



琴日經過個道真係有好多臘排骨食，我都有啲心思思想食tim，食臘排骨當然要去最出名既象山市場；而家咁早都係唔適合食臘排骨，先去搵其他野食

食過返尋味，去返琴日食過既米線店食過橋米線

一碗美味既過橋米線又完成啦


今日加餸，叫多個麗江好出名既pizza（應該叫麗江粑粑先岩），甜甜地幾好食；除左麗江粑粑，雲南好多地方都有出名既粑粑，官渡粑粑﹑喜洲粑粑等等

食飽後又繼續遊走古城，已經行左兩日其實都唔知去邊好......

見到咩就睇咩啦！來到麗江第一日要睇住地圖行，而家古城已經行到熟晒，地圖都唔洗拎完全唔怕行錯路

有趣既東巴文字

流水川流不息



朝早先落雪，下午就藍天白雲陽光普照，高原上天氣就係可以有咁大變化

呢間就係第一晚食個間難食米線


掛滿好多人願望與祝福

遠望玉龍雪山，山頂上天氣好似唔係咁好bor？

玉龍雪山越睇越靚，只可惜上山費用太高，只可遠觀而不可接近......

山上有個亭，唔知點上去呢？由上向下望麗江風景一定好靚

行行下就去左古城入面既忠義市場；忠義市場係一個地道街市，咁就乘機八卦一下當地有啲咩賣

有好多種類水果，發覺呢道好多地方都有士多啤梨賣，麗江都有出產士多啤梨？

新鮮蔬菜

又有好多肉類

忠義市場好大，有室內亦都有室外



除左有野賣，仲有好多又平又抵食既食店，但岩岩食完野冇耐就唔咁早開餐啦

離開忠義市場，行行下就出到古城之外；呢幾日習慣左古城生活，突然見到又巴士又快餐店，感覺怪怪地...現代與古代生活只係一街之隔，行過一條馬路就要從夢幻返到現實......

既然回到現實世界，就做啲現代人先會做既野，就係去超級市場掃貨，搬左大量水﹑零食返客棧

今日冇地方想去，下午留係客棧同狗仔玩下，睇下電視，慢慢享受下一個悠閒時間；而家已經唔需要好似之前咁跑景點四圍去，麗江呢道最重要就係hea+hea+hea

今晚晚餐想試試麗江好出名既臘排骨，首選當然係去象山市場，但去象山市場要搭車，唔符合hea遊原則，所以唔去lu（其實係懶出去）；同老闆娘講起想食臘排骨，但又唔想出城，老闆娘就推介左一間佢覺得比較ok既餐廳；同我地講左一大輪都唔知地址係邊，佢就叫職員帶我地過去^^

穿過好多小巷終於去到，要自己來真係唔識路
呢間餐廳又幾有特色，只係張枱好矮但個位好高......

入到來即刻整返煲臘排骨，第一次食臘排骨又覺得真係幾好食


可以好似平時打邊爐咁加啲菜落去一齊煲，旁邊就有好多蔬菜選擇可以隨便加料，拎左先計錢唔拎當然唔洗比錢啦

呢道未必有象山市場咁好食，但環境一定好過象山市場好多好多，今日人流唔多，坐得都算舒服，慢慢食食幾耐都得，仲有跳舞可以欣賞（雖然冇咩興趣）

其他食客好開心咁出左去一齊跳

由日頭食到天黑，唔經唔覺就食到夜晚，只怪呢個環境真係太舒服

入黑後天氣開始轉涼，大家圍住火堆取暖；而我地亦都享受完美味既臘排骨，又係時候返客棧lu

冬天遊人好少，去到南面既更少，識搵到黎呢道食野既更更更少，可憐呢位美女自己一個企係門口，獨自面對黑暗...晚上古城南面就係咁黑，要開住電筒搵路返客棧

黑暗既地上襯托住天上光亮既月光同星星，係城市生活完全冇可能見到咁靚既天空，呢一刻要好好享受呢個美麗星空

麗江古城第三個晚上，一樣訓得好舒服；明天去邊玩好呢？諗咁多做咩丫，明天既事明天再算啦，哈哈^^

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共1人比"掂"

stellaluk 於2014-10-10 07:02:06 留言
很詳盡的分享，特別喜歡第一張的風景！
舉報回覆
No.1

特搜總編E 於2014-10-10 16:50:23 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.2

炯仔的天空於2014-10-10 18:00:17 留言
靚相
舉報回覆
No.3

平凡人於2014-10-11 01:56:12 留言
原文由 stellaluk 於 2014-10-10 07:02:06 發表
很詳盡的分享，特別喜歡第一張的風景！

多謝我都好喜歡第一張，藍天白雲真係好靚
舉報回覆
No.4

平凡人於2014-10-11 01:57:07 留言
原文由特搜總編E 於 2014-10-10 16:50:23 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.5