探險家攻略 > 休閒玩樂 / 城中探秘 / 旅遊 > 其他 / 特色景點 / 古蹟 / 長線旅遊 > 麗江。拉市海﹑束河古鎮

麗江。拉市海﹑束河古鎮

由平凡人於 2014-10-11 02:15:00 發表 | 累積瀏覽 529

分類：其他長線旅遊特色景點古蹟；地區：中國

< 北京﹑西安﹑成都﹑雲南23天遊 >

第十七天

一早醒來，依然收到消息仲未可以前住香格里拉，今日有咩可以做呢？麗江最出名就係玉龍雪山，不過諗過玉龍雪山消費唔平，去一去就要用五百蚊，加上自己比較鐘意香格里拉既雪山，所以暫時放棄玉龍雪山；既然唔去玉龍雪山，就去麗江另一個比較出名既地方--拉市海；去拉市海途中可以清楚見到玉龍雪山

拉市海唔係一個真正既海（雲南係內陸地方又點會有海呢），拉市海係一個湖泊同濕地，係雲南「海」既意思就係「湖」啦；「拉市」係古納西語譯名，「拉」解做荒壩，「市」解做新，「拉市」一齊就係解做新的荒壩；去拉市海有好多方法，可以自己坐車去，可以參加local tour，夠膽既話可以跟古城入面拉客既人去（古城有大量人以超平價錢想拉你去拉市海，不過我可以講99.999%都會中伏，我就唔夠膽試），而我就貪方便，麻煩客棧老闆娘幫我聯絡拉市海當地人車我地去到拉市海

拉市海最重要既活動就係騎馬上山，大部份人去拉市海就為左騎馬仔；直接去到其中一個馬場落車，行到門口見到騎馬收費係五百幾蚊！！會唔會太貴！！老闆娘唔係話百幾蚊既咩！！係疑惑緊既時候就有職員出來招呼我地，話我地係老闆娘介紹收我地百幾就可以，仲叫我地唔好同其他人講我地幾多錢，呢個時候終於明白原來呢個貴收費係用來湯可憐既小羔羊，好彩今日冇做羊仔；揀隻靚馬就可以出發

一位馬伕帶住我地兩隻馬上山


一路行一路行，馬仔都要飲水休息一下



今次係我第一次騎馬，其實一路都有少少驚，馬仔一直向山上行，有時候會「扇」腳，有時候旁邊就係懸崖，當時有諗過不如落地自己行會唔會仲好？但見到一路都係馬屎，要行都唔容易，所以都係放棄呢個諗法，繼續騎馬上山

穿過雪地

過左唔知幾耐終於去到目的地，馬仔可以食野休息一下，我都可以落馬lu

上到來真係冇咩好睇，隨便行下


啲屋都幾得意



有少少積雪bor，不過呢道又唔太凍



行左一陣都冇野好玩，又係時候回程lu：係山上可以見到拉市海，但天氣唔係咁好，睇唔出拉市海靚既一面

一路向拉市海前進


冇幾耐就返到拉市海；不過講真我覺得拉市海唔係咁靚，唔去都冇損失，但如果想試下騎馬呢道係一個唔錯既選擇，不過對風景就唔好有咁大期望啦......

騎完馬就係坐船遊拉市海


冇陽光之下拉市海就只係一個普通既湖，唔覺太特別

傳聞冬天拉市海會有過萬隻候鳥飛來過冬，但以當日所見又好似唔覺有咁多雀仔，可能而家連雀仔都唔鐘意呢道



都唔知有咩好睇，走人lu

岸上有燒烤可以食，而家已經到午餐時間就唔食呢啲去食飯先

馬場有飯可以食，同時間有兩位天津來既母子一齊品嚐呢碗簡簡單單既炒飯；唔知係唔係呢道環境唔錯，而且騎完馬辛苦完，呢個炒飯食起來特別好食，平時只係食一碗飯既我都忍唔住食多幾碗

食飽就回程返麗江古城，不過去既唔係平時去開既麗江古城，而係麗江另一個古城--束河古城

「束河納西語稱“紹塢”，因村後聚寶山形如堆壘之高峰，以山名村，流傳變異而成，意為“高峰之下的村寨”，是納西先民在麗江壩子中最早的聚居地之一，是茶馬古道上保存完好的重要集鎮，也是納西先民從農耕文明向商業文明過渡的活標本，是對外開放和馬幫活動形成的集鎮建設典範。」

好多朋友都只係認識麗江古城（大研古城）而忽略束河古鎮，其實以歷史黎講束河比大研更有歷史，而且未有大研個種濃厚商業味道因而更原汁原味，所以好多喜歡寧靜﹑純樸既朋友都會選擇束河而放棄大研

走在石板街上，兩個古城同樣係納西族風格，但束河好明顯清靜得多


就算走在四方街上一樣可以感受束河寧靜氣氛；好多地方都會有四方街，四方街本應係一個最熱鬧既地方，因為四方街地處核心位置，去邊都四通八達，但束河四方街就冇咩人，哈哈^^咁樣仲舒服，我最怕就係多人，而家可以靜靜地欣賞美麗景色

睇來夜晚會有營火會bor

睇落又幾有特色



呢道又係有三眼井

呢邊人氣多少少，但環境一樣好舒服；同大研古城一樣，流水貫通束河古城，有一句說話形容束河，「家家見小橋，戶戶有流水」，大多數房屋都有流水經過，而且更近玉龍雪山，溪水比大研更加清純呢



距離香港2300km？

點解美女要走後門？不過我可以光明正大走正門，哈哈

唔知拍緊咩戲呢？好多工作人員好大陣像


離開古城中心位置，去古城外圍遊走一下



望向古城，睇落古城都唔細

古城外圍房屋冇古城中心咁靚，不過呢道多左一份原始味道，有田有地有山有水，呢個就係真正納西人生活；大研個邊大多數地方已經被商人進駐，幸好束河仲可以見到古城﹑當地人最真實一面



但呢啲外圍原始地方唔知可以保留到幾耐呢？再向前行已經可以見到有餐廳﹑客棧出現，睇來呢道遲早都逃唔出商業化命運



係呢啲咁偏僻既地方都唔知可以點做生意


離開原始地方返去古城中心位置，終於再見到其他遊人



再次返到古城中心，可以繼續享受寧靜環境；束河人少路闊，行起來真係好舒服，如果係要hea既話束河比大研更合適



好多少數民族都鐘意掛粟米，唔知係用來食定用來裝飾呢？

行到差唔多係時間離開束河啦


今日天氣唔太好所以影唔出束河古城美麗一面，不過就算係咁束河依然係一個美麗束河，有時間好值得來參觀一下

再見啦束河；有個有趣既地方係束河門口寫住要收五十蚊入場費，但事實束河係免費，可能呢五十蚊係用來呃旅行團或者呃水魚用，所以千其唔好比人呃到

牌坊對出就有麵包車返去大研古城，當時係五蚊位或二十蚊車，咁岩遇到另外有三位朋友又係返大研所以就一齊坐車啦，除開即係四蚊位，平左一蚊，哈哈^^

返到古城冇特別事好做，夜晚係客棧同老闆娘&佢既朋友一齊食正宗廣東菜，好耐都未食過咁豐富既一餐啦！而且大家都係講廣東話，想講咩都得！

就係咁又係麗江過左一日，數數下原來已經係麗江玩左四日，已經開始悶悶地...但真係冇辦法，想向北走又唔得，向南行又唔想，而家可以做既就只有等，等待天氣好轉，等待馬路通行，等待奇蹟出現...我地仲有時間，我相信一定可以等到出發既一日

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共1人比"掂"

炯仔的天空於2014-10-11 13:09:35 留言
古城風光不錯
舉報回覆
No.1

子晴912 於2014-10-11 21:06:17 留言
束河古城都幾靚喎﹗
舉報回覆
No.2

平凡人於2014-10-12 01:04:51 留言
原文由炯仔的天空於 2014-10-11 13:09:35 發表
古城風光不錯

麗江古城真係唔錯
舉報回覆
No.3

平凡人於2014-10-12 01:06:12 留言
原文由子晴912 於 2014-10-11 21:06:17 發表
束河古城都幾靚喎﹗

係丫
舉報回覆
No.4

1874飛飛於2014-10-18 15:52:13 留言
太多其他人差的體驗介紹, 所以沒去過, 見你上山又幾好咁
舉報回覆
No.5

平凡人於2014-10-21 09:18:06 留言
原文由 1874飛飛於 2014-10-18 15:52:13 發表
太多其他人差的體驗介紹, 所以沒去過, 見你上山又幾好咁

我都見好多人有不好經歷好彩我冇遇到^^而且未騎過馬仔都幾得意架香格里拉騎馬就要小心啦，個道真係個個都出事
舉報回覆
No.6