今朝6點隻佬出門口去踩單車, 我整完早餐俾佢之後瞓唔著, 於是就睇新聞, 睇完7點幾又再瞓過...
如常, 一邊聽電台節目, 一邊瞓...
點知瞓瞓下, 感覺到床尾有雙腳踩過, 整醒左我, 仲要係當時我擘大腳, 佢就喺我兩腳間踩過再落床既, 我無理啦, 無幾耐又聽到赤腳既腳步聲行番埋黎張床到, 佢又上床, 我又感覺到張床褥好似有人行過咁壓一壓, 然後我個身就好似打冷震咁, 即係話佢喺我隔離, 跟住我就見到個透明既人影喺我眼前, 我無睇到佢係穿牆走左, 定係瞓左喺我隔離喇, 為左證明我係清醒, 我係真係擘大眼, 試郁又郁唔到, 但係仲聽到電台講緊咩內容既. 既然郁唔到, 又眼瞓, 我都無理佢, 繼續瞓.
過左一陣間, 佢又要落床, 再上床, 來回幾次, 我就俾佢整醒左幾次, 於是我個心講: 好喇, 我要瞓覺, 你唔好左住我.
講完, 我就一覺瞓到10點喇~
------------------------------------------------------------------------------------------
其實我間屋耐唔耐就會有野黎架喇, 試過有晚我瞓瞓下, 俾一班人嘈醒, 我擰轉頭望又無野bor, 但係覺得間屋好迫, 好似好多人咁, 我聽到佢地講野, 但係唔係講韓文, 亦都唔似講人話, 好似外星人講野咁, 唧唧唧唧聲咁...總之好嘈啦...我當時就唸, 念佛經定聖經呢? 於是我心講左句喃嘸阿彌陀佛, 但係唔work喎, 繼續嘈, 於是我就又講番人話: 唔好嘈住我瞓覺呀!
就係咁, 一下子間屋鬆動哂, 靜哂, 我好快又瞓番喇~
-------------------------------------------------------------------------------------------
仲記得有一次瞓晏覺, 我通常係張被蓋過頭黎瞓既, 瞓瞓下, 有人郁我張被, 郁醒左我, 我有唸係未自己發夢, 但係唔係, 因為發夢係無感覺, 亦都唔係我個頭郁, 或者隻手移張被..因為我好醒瞓, 自己轉姿勢我係會知架~
============================================
感謝 ahQ 提供以上資料
ahQ的網誌: http://ahqinkorea.blogspot.kr/
============================================
