上次首嚐蜂巢雪糕（見食評「韓蜂襲港」http://garycwm.blogspot.hk/2014/09/honey-creme.html），已對依種原粒蜂巢加超滑香濃嘅軟雪糕印象深刻，尤其粒蜂巢金黃閃亮，外觀晶瑩，入口煙韌，蜜潤清甜，極之討好。今次再想分享另外幾款味道，雖然店舖開檔已過多月，而隔離大坑亦有相類似嘅店舖出現，前文提及嘅本土店亦再晌旺角開分店，但Honey Crème門外人氣依舊，集結不少後生仔女輪候買雪糕。
上回已介紹過佢哋嘅來頭、店內環境、各款產品，所以，今次就廢話少講，直接去片。
![bowl]()
蜂蜜冰淇淋 $38
蜂巢冰淇淋以蜂巢粒拼軟雪糕，粒蜂巢食咗就好快無。而蜂蜜冰淇淋就先晌杯底加蜂蜜，注入軟雪糕後，又再淋上蜂蜜，所以，由始至終都食到帶有蜜香嘅軟雪糕，軟雪糕一如以後奶味濃郁，綿密細滑，蜂蜜純正芳香，甜蜜滋潤，跟食蜂巢冰淇淋各有韻味。
![bowl]()
有機棉花糖咖啡冰淇淋 $42
店內有部棉花糖機，柔軟綿綿嘅有機棉花糖都喺即場打，而咖啡採用Nespresso意大利濃縮咖啡做，眼前所見應該有5款味道，初時唔知，事後才知原來可以自行揀味，有濃有淡。
有機棉花糖咖啡冰淇淋喺以軟雪糕，加上一大嚿棉花糖，再由店員淋上咖啡，個人覺得玩效果多啲，不過，棉花糖溶晒之後，就好似加咗啲糖落咖啡度，唔會太苦太澀。咖啡嘅醇甘跟軟雪糕嘅奶香好襯，除非你本身唔鍾意咖啡，否則，依個冰淇淋好值得一試。
![bowl]()
焦糖爆米花冰淇淋 $38
哈哈，被朋友批死我一定會揀依款味，無錯，身為焦糖死粉，總要一試嘅。其實依款冰淇淋都好簡單，就只不過喺軟雪糕加焦糖爆谷，再唧上焦糖漿，賣相都幾吸引架，味道則焦香濃甜。一次過將雪糕加爆谷放入口內，奶香與焦香晌口腔內交融，甜蜜微妙，不過，爆谷質素有啲參差，有啲脆，有啲腍，要控制一下個穩定性。希望下次再試時，一切都嚟得完美。
雖然最後嘅焦糖爆米花冰淇淋晌啲焦糖爆谷上有甩漏，但對幾款冰淇淋整體質素仍滿意，好開心今次同朋友嘅「糕蜂」會議有個美味回憶。
個人評分
味道：8/10
環境：7/10
服務：8/10
抵食：8/10
平均每人消費：HK$40
餐廳資料：
Honey Creme
銅鑼灣利園山道34號地下
3525 1564
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
