HKTV 直播 SMART TV LG SONY SAMSUNG 開播！　質畫一般　穩定度有待改善！王維基 11 月19 開台 android IOS

尋晚香港電視（下稱港視）在其官方 Facebook 專頁中自爆有乜途徑睇到佢地既節目【詳請按此】，仲「唔小心」咁曲線確定了 1119 這個疑似開台日期（話實，我唔係 HKTV 心入面條蟲，唔知佢張圖真心定真係唔小心流出架！）令身處金鐘、旺角、銅鑼灣以至獅子山上獅子頭的電視迷，都無不為之精神一振。

睇住個張打曬馬賽克既圖入面，最開心既莫過於一眾用緊 Smart TV 既用戶，因為張圖寫到明係「於下列智能電視的版面開啟即可收看」，但究竟實情又係唔係咁呢？ezone.hk 記者今早打開 Samsung UA55HU8500 呢部 UHD Smart TV，再禁入去部機的 Smart TV Apps Store，香港人最期待的畫面出現了，原來港視的《HKTV 直播》Smart TV App，已經在早前靜靜地上架，可供 Samsung Smart TV 用戶立即下載體驗！

實測：穩定但畫質尚待改善

俗語有話「機會是留給有準備的人」，閣下如果有齊合適電視機，都可以睇睇有無 HKTV 直播 App 供下載試玩。記者立即下載該程式大睇特睇啦，睇番該程式簡介，呢個程式大小隻係 1.76MB，而當下版本為 1.002，看來仍處於始創階段吧。按入去之後不足 3 秒，港視的節目立即呈現眼前，現階段播放中的是《2012 年 12 月 4 日 HKTV 命名典禮》片段，亦標明為「訊號測試中」，記者坐定定看了約一個小時，發現串流穩定度甚高，大約只出現過兩至三次的停頓，但在 2 至 3 秒內已經重新正常播放。至於大家關心的畫質，個人認為在 55 吋電視機輸出下，《HKTV 直播》的串流畫面與大氣電波廣播之 J2 頻道節目接近，整體位元率（bitrate）應不太高，連帶畫面較為鬆散，散景明顯看到壓縮雜訊，祈視港視在正式開播之後，能夠再作相關調整。

除了以下試播畫面之外，記者都將試播時的測試情況，拍低了影片，大家即使沒有 Samsung Smart TV，都可以率先望一望 HKTV 的直播測試情況。大家可留意畫面的流暢度，以及畫質吧！

【最新消息：LG 都有得玩】

早前 ezone.hk 已經收到探子可靠回報，兩大韓國電視機品牌將會追加《HKTV 直播》App【詳請按此】，當下 Samsung 已經表明心跡，估計另一韓牌為 LG 也是打風都打唔甩，而 HKTV 官方又寫到明 2012 或以後的型號，個人推算 LG 由 12 年的 LM 系列、13 年的 LA 系列及今年的所有 Smart TV，都將可以後加該程式欣賞港視節目。【10 月 23 日晚上 7:40 更新：另一韓國電視品牌 LG，旗下智能電視機的 LG Store 亦已更新，《HKTV 直播》正式上架了！記者立即衝入影音測試室，打開 LG 55EC9300 呢部 webOS OLED TV 進行測試，已見 LG Store 即時發現《HKTV 直播》App，詳細試玩情況請即按此。】

仲有咩方法睇到 HKTV？

除了 Smart TV 之外，港視亦已表明在電腦、智能手機、平板機及 Android TV Box 都將會推出相關服務，究竟大家又要點樣先睇得到呢？記者以同樣提供網頁直播及智能裝置 App《RTHK Screen》的港台電視作示範。

01：Click 入網站直接收睇

待疑似 11 月 19  日港視開台之後，其全新版面官方網站亦將會啟用，屆時用戶就可在電腦直接登入 www.hktv.com.hk，即時觀看該台的串流直播節目。情況就如在網站收看 RTHK 節目一樣（下圖）。若用戶的電腦設有 HDMI 輸出，或者使用 Mac 電腦的 Thunderbolt 至 HDMI 轉換器，就可輕鬆地在電視機欣賞港視的節目（下圖）。

02：手機平板裝 Apps 串流直播

至於智能手機及平板機，港視表示將會在 Apple Apps Store 及Google Play 上架《HKTV》app，就像港台電視的《RTHK Screen》app。安裝《HKTV》app 之後，用戶就可在智能手機或平板機直接觀看節目，估計也會像港台電視般設有 Video OnDemand 隨時點播服務。港視今日再在 Facebook 專頁中集思廣益，統計公投在將來會否追加支援 Apple TV 及 Chromecast。若用戶使用的電視機支援 Miracast 功能，已可如圖一般配合相關智能裝置，鏡像輸出（Mirroring）《HKTV》app 畫面【想知如何用 Miracast 功能，把手機畫面直飛至大電視播放，請按此睇攻略】。

03：Android TV Box 要下載官方 APK

至於 Android TV Box，港視指出會提供官方 APK 檔案下載，用戶只需將該檔案複製至 USB 手指或外置硬碟，再連接至 Android TV Box 安裝便可。若閣下使用的是小米盒子，你亦可使用其「遠程安裝應用」功能安裝相關程式。透過「遠程安裝應用」功能，用戶可免卻將檔案抄寫至 USB 儲存裝置，再在 TV Box 安裝的步驟。安裝完之後開啟該程式，即可透過 Android TV Box 在電視機屏幕上欣賞港視節目。由於像小米盒子的 Android TV Box 不設觸控操作功能，因此個人推斷港視的 Android TV Box app 的操作方式，將不會與 Android 流動智能裝置的版本相同。

其他 HKTV 相關新聞：

【HKTV 大芒煲劇有辦法】>>> 即按此

【HKTV 幾可肯定 11.19 開台】>>> 即按此

【HKTV 再申免費電視牌】>>> 即按此

【HKTV 過山車式發展史回顧】>>> 即按此

【傳兩大韓牌電視機有 App 即睇 HKTV】>>> 即按此