探險家攻略 > 休閒玩樂 / 城中探秘 / 旅遊 > 郊遊 / 特色景點 / 古蹟 / 長線旅遊 > 安徽古村。盧村油菜花與木雕樓

安徽古村。盧村油菜花與木雕樓

由平凡人於 2014-10-26 08:55:00 發表 | 累積瀏覽 719

分類：長線旅遊特色景點古蹟郊遊；地區：中國

< 杭州﹑黃山﹑婺源﹑安徽古鄉7天遊 >

第五天(續)

黃山又唔係想像中咁辛苦，可能而家有纜車上落，唔似以前既年代要行上行落，而且有兩日時間可以慢慢行，天氣又舒服，感覺好好多；離開黃山先返去湯口鎮阿拉酒店拎返寄存既行李，再出發去盧村

沿路有好多油菜花田，睇油菜花係今次去安徽﹑江西其中一個目的，但美中不足係今年天氣比正常早左回暖，油菜花早左開，呢個時間已經錯過油菜花盛開既季節，而且天氣又唔好，落雨打落左好多油菜花，所以今次只係見到零碎既油菜花咋...但總好過冇啦......

係黃山上只係食左個簡單既早餐，午餐都未食，所以落左山就要開餐啦，去到一間位於休寧縣藍田既農家菜館(唔係我住既藍田)，食左一餐好好好味既農家菜；隻土雞超級鮮味，肉質彈牙而且好有雞味，超正！另外左下角既豆腐，係高山用人手採摘既野果加黃豆天然提煉而成既黑豆腐，口感好特別，又似啫哩又似涼粉又似豆腐，就叫佢黑啫哩豆腐啦，超超超好味，香港一定食唔到

食飽午餐之後就立即起程去盧村，沿途鄉村風光唔錯


我相信如果下面開滿油菜花一定好靚好靚好靚，但我一向同花無緣，上年去武漢睇櫻花一朵都睇唔到，今次又唔多油菜花，所以我都係唔太適合再去睇花啦



路經塔川，塔川秋色好出名，有好多好靚既紅葉，而家當然就冇紅葉睇，所以就唔入去啦，希望將來有機會再返來啦

下次我都想好似佢地咁係田中間踩單車，上次係陽朔踩過，好舒服好開心，其實係香港都可以係田中間踩，試過係上水穿過田野踩單車，朋友連人帶車飛左落田......

塔川全景，幻想下有紅葉先


下午4點20分終於到達盧村


就係盧村對出，見到今之旅程中最靚最大片既油菜花田


菜花田唔算好密，但配埋鄉村建築呢個畫面好靚，好似一幅油畫


盧村最出名係木雕樓，難得去到，就比左50人仔門票正式進入盧村


小橋流水

點解唔係黃色小鴨黎架


徽州村落都係建係河水旁邊，方便飲用、洗滌，又可以灌溉農田，好方便

可能好多人都未聽過盧村呢個地方，盧村就係宏村旁邊，大約兩公里路程，但因為宏村名氣實在太大，長期都迫滿人，大家反而忽略左盧村呢個小小既地方；盧村比我既感覺更靚更純樸，無論環境﹑遇到既人﹑甚至售票員比我既印象都好好，好有親切感，由進入盧村開始就有當地居民導賞員帶領，好詳細介紹盧村同徽派建築既特別之處

「盧村木雕樓又稱七家裡民居群，由七家古民居組成，均為盧氏三十三世祖盧幫燮於清道光年間所建，算來距今至少有150多年的歷史了。盧早年經商，後承襲祖制，任奉政大夫和朝議大夫，可謂官商一身，後人稱之為“盧百萬”」

白牆、青瓦、磚雕門樓、門罩，呢D就係徽派建築特色


徽派建築除左門口有石雕裝飾之外，另一個好大既特點就係牆非常之高，想跳都跳唔入，而且牆身好多時都係冇窗，或只係有好細既窗口，主要原因係防盜

徽州三雕好出名，三雕係指有徽派風格既磚雕、石雕、木雕，黎到木雕樓當然就係睇木雕啦 .....進入盧村最出名既木雕樓，當年木雕樓由好有錢既鹽商盧百萬所興建，當時佢請左幾位工匠花二十多年時間精雕細刻而成，所以被譽為徽州木雕第一樓，諗起都誇張，但好可惜文革時期好多木雕都受到破壞，特別係有人樣嘅木雕全部冇得留低



全間屋無論一樑一柱都係木雕

徽州木雕有好多唔同題材，最常見既有人物、山水、花卉，而且仲有禽獸、蟲魚、雲頭、迴紋、八寶博古、文字錫聯、吉祥圖案等等唔同題材

木雕係雕得超立體，有一層層既層次感，相信而家都未必有人可以雕出呢個水準

以前既千金小姐三步不出閨門，每當有人客來到家中作客，千金小姐都只可以係上層偷偷地偷望而唔可以落樓

普通民居一入到屋就係個天井，呢個天井好有用，因為D屋又大間又冇咩窗，所以採光就靠呢個天井啦，而且都有風水原因，就係由天井收集雨水，肥水不流別人田

民居既廚房



呢樣野遠睇似沖涼用既水缸，其實係可以坐在上面取暖既暖爐

大廳

大廳中間有個水井，個井口好細，而蓋住水井既大石好重，防止小朋友跌入去水井

以前啲人食大煙都要搵個專用地方


出來既時候已經係黃昏



好快就行完盧村一轉，唔係有導賞員帶住既話都唔知咁多有關安徽建築既資料，好彩有到盧村一遊，真係眼界大開



過左條橋就正式離開盧村啦，盧村真係好寧靜，除左我地就冇再見過其他遊客，如果可以係道住返晚，好好享受一下美麗寧靜既環境真係一大樂事，可惜冇時間比我咁做...唔知道將來仲有冇機會再返來，唯有用相機留住每一個美麗感覺

再見啦，美麗的盧村

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共1人比"掂"

炯仔的天空於2014-10-26 10:47:02 留言
好靚呀
舉報回覆
No.1

EEChan 於2014-10-26 11:34:42 留言
而家國內觀光，下下講錢，真係唔簡單
舉報回覆
No.2

有姐之日誌於2014-10-26 17:39:56 留言
引用自 '平凡人' 的相片：
回覆：好大的油菜花田..好靚呀...原來上黃山唔係好辛苦，有機緣我都想去...
舉報回覆
No.3

stellaluk 於2014-10-27 07:44:33 留言
風景怡人，農家菜令人垂涎三尺！
舉報回覆
No.4

平凡人於2014-10-27 08:14:01 留言
原文由炯仔的天空於 2014-10-26 10:47:02 發表
好靚呀

好靚好原始
舉報回覆
No.5

平凡人於2014-10-27 08:19:33 留言
原文由 EEChan 於 2014-10-26 11:34:42 發表
而家國內觀光，下下講錢，真係唔簡單

出名小小可以收錢既野都收錢架啦，除非搵到啲未開發既靚景有好多但一般唔易去到
舉報回覆
No.6

平凡人於2014-10-27 08:24:43 留言
原文由有姐之日誌於 2014-10-26 17:39:56 發表
引用自 '平凡人' 的相片：
回覆：好大的油菜花田..好靚呀...原來上黃山唔係好辛苦，有機緣我都想去...

而家有纜車都唔會太辛苦，住一晚慢慢行就ok油菜花季節去個邊有好多油菜花架
舉報回覆
No.7