證件血淚史（上）
大家好，起初跟銀仔孭起背囊時，都無諗到會有同佢分享呢個小天地嘅一日。正所謂「入屋叫人」，我的確要多謝銀仔帶住港女去睇呢個世界，話說我識佢之前，未去過歐洲、未見過雪，
結果第一次同佢去旅行就係感受3月嘅俄羅斯同芬蘭，之後仲去過不時大風大雪嘅冰島，而家諗起都「不禁倒抽一口涼氣」。嚟緊呢個夢想之旅，可以同銀仔步入人生另一個階段，亦係我第一次踏足美洲大陸，仲有機會練習BB班程度嘅西班牙文，實在非常期待！
古語有云「好事多磨」，呢四個字係我喺過去半年嘅最大感受，付出咗唔少汗水、淚水同口水之後，事情總算圓滿解決，一度以為要告吹／延期嘅旅程，而家即將如期起錨。
話說港女回歸前申請咗本BNO，但長大後，行程總離不開大陸、台灣，最遠只去過菲律賓宿霧（其實我到而家仲未去過日本、韓國、星馬、泰國。。。令我嘅朋友覺得好匪夷所思），所以BNO過期經年都無續證，一直靠特區護照同回鄉卡走呢個小小的天涯。不過之後同銀仔去過幾次旅行，都因為用特區護照而遇到邊防人員懷疑，而每當銀仔亮出BNO，問題就會迎刃而解，所以就萌起續領BNO嘅念頭。今年4月，英國宣佈將所有護照申請由以往喺各地領事館辦理，轉為集中喺國內處理，並下調申請費用，心諗距離結婚之旅仲有半年時間，一定無問題啦，點知自申請一刻就係惡夢嘅開始。
5月頭，我同另外兩位港女閨蜜去完（又係）台北，就上網申請BNO。今次真係一個大教訓，就係上班時間唔好做私人嘢，雖然受聘於香港第一僱主，但電腦設備仍然非常陳舊（外置貯存裝置係floppy disc, 3.14MB嗰隻四方形碟仔呢），填晒資料、俾晒錢，個瀏覽器竟然HANG咗，令我抄唔到申請密碼同埋下載聲明書，唯一慶幸係申請編號會經電郵傳送，成為咗未來半年同大英政府打交道嘅唯一憑證。當日我即刻填網上查詢表格，但硬係覺得呢啲網上查詢有排等，於是一放工就用手機打長途去熱線詢問，點知等咗10分鐘都仲聽緊音樂，呢段係呢世人最奢侈、性價比最低嘅音樂，結果要放學後返屋企再打。由於時差關係，放學返到屋企之時仍然係當地辦公時間，今次終於有人聽，我說明狀況之後，職員話可以用電郵補發聲明書俾我，等我可以連同相片、護照、住址證明等文件寄過去，不過申請密碼就無辦法攞返，以後要查詢進度就一定要經網上表格或打電話去熱線。
講到呢度，大家都會以為身處21世紀，向堂堂日不落帝國申請護照唔會有乜嘢難度，而且香港速度係兩星期，所以我完全無諗過今次係要用差不多十倍時間。呢幾個月嘅煎熬係無可能一氣呵成和盤托出，所以大家只能夠「睇住先」同埋等吓啦 （苦笑）。
港女
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
