探險家攻略 > 城中探秘 / 美食之旅 / 旅遊 > 特色景點 / 古蹟 / 餐廳 / 長線旅遊 > 婺源。中國最美麗鄉村

婺源。中國最美麗鄉村

由平凡人於 2014-10-28 08:50:00 發表 | 累積瀏覽 913

分類：長線旅遊餐廳特色景點古蹟；地區：中國

< 杭州﹑黃山﹑婺源﹑安徽古鄉7天遊 >

第六天(續)

離開宏村，向今次旅程最後一個目的地婺源出發~
婺源位於江西省，同位於安徽省既黃山﹑宏村雖然好似係兩個完全唔同既地方，但其實婺源正正係安徽旁邊，古時婺源係徽州一部分，所以係婺源可以見到同宏村一樣既徽派建築，可以食到徽派菜式，只係現代劃分行政區時婺源被劃入江西省；既然一場來到安徽，就順道看看呢個「中國最美麗鄉村」

婺源景點比較分散，最方便當然是包車啦，由其好似我地呢D時間唔多既朋友；婺源最佳旅游時間就係春天，金黃色油菜花盛開，全個婺源都會比油菜花覆蓋，正常大約係三月中下旬時間就可以見到美麗既油菜花；但世事又點會咁完美，今年天氣熱，油菜花亦提早開花，而且不時落大雨將油菜花打落，去到我去呢個時間，婺源油菜花已經所餘無幾...唔通呢D就係溫室效應既影響？

前住婺源途中，原本呢道會係一大片油菜花田，但而家只有綠色...我同花冇咩緣份，上次櫻花又睇唔到，今次油菜花又睇唔到，所以對婺源冇太大期望，咁就唔會失望啦



首先去到婺源既李坑，自稱「小橋流水人家」
而家去婺源要買一張通票，去既前幾日岩岩加左價盛惠210大元(或每個景點60大元)，貴得離普仲好過去搶；通票包左十幾個景點，5日內有效，如果可以有多D時間去多D地方都好既，好似我地咁去得個一陣就唔抵啦......

未入到李坑，已經見到油菜花比風雨打到斜晒，好彩已經有心理準備，冇失望


冇油菜花睇，睇下麻鷹捉雞仔


正式入到小橋流水人家既李坑；李坑係李姓聚居為主既古村落，建村於北宋年間（西元1010年），呢道原本係個徽派民居建築既水鄉小村，有一條小河穿村而過



同江南水鄉比呢道硬係覺得差少少野，可能呢道冇烏蓬船穿梭小河，又冇石拱橋，河水又唔太流動，冇左水鄉川流不息既氣息



李坑特產糕點，用機器切成一片片，唔知好唔好食呢？落住雨又趕時間，唔試啦

徽式建築物+小橋流水，可能得呢道先可以搵到


沿路去到盡頭有一大片田地，同出面一樣，油菜花已經走晒啦

李坑出個一個武狀元，呢間就係佢間屋，其實有咩特別真係唔知

屋外有一棵紫薇樹，可以比一蚊去摸摸，究竟有D咩特別？見到有人去摸啦，原來摸樹幹既時候樹枝會郁下郁下...

離開時，發現我最愛既postcard店，身為postcard迷當然要去望望；入面選擇唔多，但總算買到心水postcard

離開李坑啦
李坑人真係多，而且水鄉﹑徽式建築我都見過唔少，講真對呢道興趣不大；如果有油菜花睇就唔同，全條村都比油菜花海圍住真係靚到爆，但冇油菜花既日子就變得好普通

坐車去下一站--汪口
因為買左通票所以唔洗再買門票，只要拍一拍卡，打手指毛就可以入場，呢道係我見過用最高科技門票既地方

「汪口古村始建于大觀年間（北宋時期），距今有1100余年歷史，因這前碧水汪，故名“汪口”。汪口處於丘陵地帶，村周青山環抱、綠水依流，在歷史上又被稱為“千煙之地”，明清時期更是店鋪林立、商賈雲集、船運如梭、景象繁華。而今隨著歷史變遷，雖已是繁華過境，但古山林、古埠頭、古商業街、古巷、古祠堂和散落在十八條古巷中的眾多官第、商宅、民居和書屋等各類古建築保存完好，有著豐富的歷史文化遺存和深厚的徽文化淵源。」

古代先進科技：超級無敵扑鎚機(個名我改既)

其實我想影下面走過既雞咋


一...葉...輕....舟.....去......

乏舟河上，寫意生活


不過伯伯要拉返上去就辛苦啦


汪口比起李坑少好多好多人，人影都唔多個，行起上來舒服好多

可能就正正因為呢道遊人唔多，連商鋪都唔多，保留左真正鄉村風味，相比李坑我更喜歡呢道



對住條靚河，如果係香港一定係豪宅靚地


仲有少少油菜花


汪口俞氏宗祠，婺源現存最完整、最華麗既一座宗祠

「俞氏宗祠於清乾隆五十二年（1787年）竣工，位於汪口村東部，由大門、享堂、後寢組成。大門前面是一個小廣場，直抵永川溪邊。總進深44米，大門面闊 15.7米，寢室後檐闊16.2米，前小後大。大門五開間，中央三間做成歇山頂三樓牌樓式，當地稱為「五鳳樓」。享堂三開間，梁架為穿斗式和抬梁式的結合。後寢為五開間，神主供於樓上。」

好快又要離開啦


係去下一個景點之前，又到午餐時間，去到曉起村出面一間唔起眼既飯店，試試婺源特別菜式；最特別既就係好大條既金魚，係得婺源呢道先有，唔知好唔好味呢？我唔食魚所以唔知啦，不過其他小菜都好好味，而且價錢又唔貴，好滿足既一餐

食飽後就去到旁邊曉起村

「曉起村始建於唐朝年間 (787年)，始祖汪萬武逃亂至此時天剛破曉，驚魂初定的他就把這裡叫做“曉起”，故是叫“曉川”。後來，洪姓人家也在上游1公里處建村而居，也叫“曉起”，為彼此區別開來，人們把上游洪姓與江姓的居地稱“上曉起”，把原先汪姓居地稱“下曉起”。上曉起多為官宅，下曉起多為商家」

一入村已經有間大屋

曉起村由好多小巷組成，遊人比之前江口多，路旁都開滿小販攤檔，比較熱鬧



呢道最多賣既係木梳，幾乎每間店鋪都可以買到，售價由10元4-9把不等，可以差一倍有多，如果加上你既講價能力我相信一定可以更平

另外呢就有好多樟木賣，聞起來好香，我相信係真野掛？有D樟木造成好貴既擺設，有D就咁切出來，幾蚊就有交易，聞說樟木可以防蟲除臭，真係咁神奇？

行到油菜花田，一如所料油菜花已經byebye啦

仲有少少零星既菜花田，都叫做好過冇

今次就當成功睇左油菜花田啦


開開心心睇完花，又係時候走啦，係走既時候遇見一棵千年樟樹，年紀真係超大；山上仲有十幾棵百年老樹和成片古樟樹林，我諗會唔會成座山都好香呢~

由上面望多幾眼就要走啦，果然天無絕人之路，原以為已經冇晒油菜花，最後都仲有少少可以睇到，今次去到婺源都叫不枉此行



去到今次婺源之旅最後一個地方--江嶺梯田
江嶺係婺源傳說中油菜花最靚最值得去既地方，江嶺漫山遍野油菜花呈梯田狀，由山頂鋪散到山谷下；可惜我地今次又錯過左最靚既油菜花期，所以未能目睹整片金黃色江嶺梯田風光，只見到綠色既梯田，唯有幻想下啦



由呢道望出去所有既田，如果早半個月來到既話，無論係而家我企緊既位置，直到去遙遠既山谷都會係一大片全金黃色既油菜花田，幻想一下整片金黃色大地會有幾壯觀？而家只可以同兩個字去形容呢片油菜花田：可惜......

終於要離開呢個可惜之地，回到安徽屯溪老街，好快就要結束今次黃山之旅

黃山留左D咩記憶比我？可以好簡單咁講：雖然天氣不似預期，但呢個旅程玩得好開心


「屯溪老街坐落在黃山市屯溪區中心地段，鑲嵌在青山綠水之間。北依四季蔥蘢的華山，南伴終年如藍的新安江，被譽為流動的“清明上河圖”，距今已有數百年曆史，全長832米，寬5~8米，是目前中國保存最完整的，具有宋、明、清時代建築風格的步行商業街，為全國重點文物保護單位。2009年6月10日，經文化部、國家文物局批准，屯溪老街和北京市國子監街、蘇州平江路等共同當選為“中國歷史文化名街”。」

冇時間慢慢行啦，只係好快咁由街尾行去街頭，要趕住食飯，之後仲要上火車


晚餐既地方就係呢間係屯溪好出名既「美食人家」，呢道環境好靚而且品質出眾，集合徽州傳統菜餚點心小食幾百種選擇，總有一款岩你口味



半開放式廚房，一路睇一路點菜，所有食物一目了然，而且係自己寫單，岩晒我呢D唔識普通話既人；現場仲有好多外國人，超熱鬧



菜式好精緻好好食，而且仲好平，呢間絕對值得推薦


好快食完之後，就要同一大班朋友分道揚鑣，我係時候回程返香港


出到屯溪老街想搭的士去火車站，等左好耐都冇...諗住行去火車站算啦，咁岩有部三輪車經過，見唔係貴就上車，不過上斜時見老伯伯踩得好辛苦，真係好唔好意思，有咩理由要位老人家服侍有氣有力既年青人，有諗過落車幫手推或者我踩都可以，不過最後都係唔敢出聲；好準時20分鐘去到火車站，唔知點多謝佢好啦，唯有比多少少車錢，之後就要直衝入去火車站，但部車delay左成個鐘先到......

第七天

大約19小時車程，全日都係火車上渡過


好耐都冇食過火車飯盒，無聊買左個試下，依然都係又貴又難食


四點幾準時返到深圳，直接過關返到香港，結束一個愉快旅程。今次好多時都未遇到好天氣，但黃山真係一個好靚，好值得去既地方，如果有好天氣既話，我相信會靚好多100倍。返到香港之後，病左好耐都唔好，咁岩呢段時間H7N9係杭州﹑安徽等地爆發，私家醫生都醫我唔好叫我去政府睇！最後當然係冇事啦，哈哈~

< 杭州﹑黃山﹑婺源﹑安徽古鄉 7天夢幻之旅 >

< 完 >

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共0人比"掂"

小龍於2014-10-28 15:16:56 留言
包車真係方便好多唔知要幾錢呢？
舉報回覆
No.1

mrsakwok 於2014-10-28 19:29:28 留言
「中國最美麗鄉村」？我感受唔到嘅！
舉報回覆
No.2

stellaluk 於2014-10-29 06:30:38 留言
全部行程飽覽水鄉美景，吃喝地道美食！
舉報回覆
No.3

平凡人於2014-10-29 09:10:38 留言
原文由小龍於 2014-10-28 15:16:56 發表
包車真係方便好多唔知要幾錢呢？

呢道要包車玩先得大小小既車大約500-600一日
舉報回覆
No.4

平凡人於2014-10-29 09:12:48 留言
原文由 mrsakwok 於 2014-10-28 19:29:28 發表
「中國最美麗鄉村」？我感受唔到嘅！

個名係咁叫，去到係唔係就係另一回事
舉報回覆
No.5

平凡人於2014-10-29 09:15:09 留言
原文由 stellaluk 於 2014-10-29 06:30:38 發表
全部行程飽覽水鄉美景，吃喝地道美食！

今次主要係欣賞風景ma，哈哈
舉報回覆
No.6

特搜總編E 於2014-10-29 16:35:01 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.7

平凡人於2014-10-29 19:30:21 留言
原文由特搜總編E 於 2014-10-29 16:35:01 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.8