識得我耐o既朋友可能都會知道我當年鍾意任賢齊,
所以當我生左小齊幫佢改名時有朋友話: "你唔係真係咁鍾意連個女都要改名"思齊"下嘛?"
"你唔怕你老公嬲?"
哈哈~ 非也非也
完全唔關事~
唔好睇敗家媽媽咁敗家剩係識買o野, 其實敗家媽媽內裡都係個文學少女 (讀書時期)~~ 呵呵呵~
有左BB之後就諗幫阿B改咩名好呢? 唔係好想比咩風水佬改o的奇怪名,
想要個有意思, 中性o的, 筆劃夾, 平聲尾, 仲要簽名可簽得靚o既!
最後就揀左 -- "思齊 "
主要係喜歡個意思
子曰:"見賢思齊焉，見不賢而內自省也。"(《論語•裡仁第四 》) 【註釋】 齊：看齊，引申為學習。 【語譯】 孔子說：「見到賢能的人，就應該主動向他學習、看齊；見到不賢能的人，就應該自我反省有沒有與他相類似的錯誤。
韓詩外傳: "思齊則成，志齊則盈" 【註釋】思慮熟則得事理，得事理則必成功。凡事縝密的思考、精確的判斷及眾志成城便能取得成功。
見到叻o既人想同佢睇齊喎, 上進到呢~ 十分喜歡呢個意思
其實思齊呢個名都幾普遍, 浸大都有個"思齊樓",
改名我覺得好重要就係一睇就識讀, 如果改d 深字, 非常用字恐怕會影響社交,
老師, 朋友都唔係好敢叫你咁就唔係幾好
我雖然不是十分迷信, 但睇過筆劃數都好似唔差,
我當時睇過幾個free website, 其中一個係
免費姓名學
大家有興趣都可試試
另一方面敗家媽媽都喜歡寫下書法,
寫起上o黎易唔易裝字都會考慮, 咁呢個名都覺得可以,
上面果個名就係媽媽用手機APPS 寫o既,
唯一係關於平仄方面, 由於小女個姓都係平聲, 加埋思齊二字姓名就會係"平平平"
(劉德華, 王羲之, 汪明荃呢d都係平平平)
媽媽本想搵"平仄平" o既名, 讀起o黎易上口o的,
但由於喜歡"思齊"o既意思, 三聲平平平雖是波瀾不驚, 但總算公整
而且讀起上o黎都唔算拗口, 所以最後都係揀左呢個名
小齊, 第時老師問起你唔知你識唔識講點解要叫呢個名呢?
是日靚衫: Kenzo Kids, Microbe, Billieblush
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
