自從生左小齊之後, 媽媽耐唔耐都會睇睇EK (教育王國),
好多有關搵學校o既資訊都o係果度睇返o黎
今日睇EK 睇到個POST 問"唔補習可以名列前茅嗎?"
有D感想...
又係"當年今日"時間...
想當年自己讀書呢, 小學係唔多興補習,
功課輔導班都有o既, 但感覺上唔係好多同學有返呢d班,
我自己小學就冇出外補過, 但我有私人補習-- 就係我阿媽囉!
小學時阿媽如果跟得夠貼呢, 唔補習都冇乜問題
我阿媽都幾強, 一個睇三個, 最後我地年紀漸大佢仲諗出"層壓式補習"
(即我幫我妹補, 我妹幫我細佬補)
到中學阿媽就話佢教唔掂咖喇, 叫我有需要都可以出外補
低年級我自覺都仲OK o既, 所以會考之前我都冇補過習,
升中六A LEVEL就開始我人生第一次補習, 補geography 同 history
與此同時我自己又幫人補習, 真係完全促進經濟,
我幫人補習o既錢又用返o係自己補習度!!
而家諗返我覺得自己幾乖又幾慳, 我阿媽養我都幾抵~
除左大學4年o既學費係我媽比之外, 我中六起已經冇問佢拎過咩錢,
補習費同自己返PART TIME o既錢已經夠晒我日常駛用
講返補習, 我自己出去d補習社補就覺得真係有"名師"咖,
學校老師教唔明o既o野補習老師真係教得明!有料到!!
仲好記得六角形市場範圍同 bid rent theory...
考A LEVEL時真係多得有補習!
而我自己幫人補就有D感慨, 我果時都有好幾個"補習仔",
3點3放學之後就隔日去唔同地方上門補習...有時星期六, 日都補(幾勤力)
話說我中六幫人補中四,
睇年級好似差唔遠, 但我發現程度真係有好大差距
我自己讀BAND 1中學, 我D補習仔可能係BAND 3, 4...
我覺得佢地係有心機想讀好咖, 但底子真係比較...
中四連12個月o既英文都未識串晒, chocolates, street 都會串錯,
呢d時候其實只可以補底, 去到中學如果連底子都唔穩其實好難學上去
好多科都要開始用英文寫essay, 基本o野都寫唔好又點可以寫d要分析力o既內容?
打好底子真係好重要, 此外就係要自發睇書,
我自己起步算遲, 中一先開始睇書, 但睇得好密集, 同好雜~
補習仔問我中文點樣拎高分, 作文點樣言之有物?
其實真係冇捷徑, 睇書係唯一辦法,
睇得多自然有模仿能力,
對於語病/錯別字之類我果時直情好似 X光機咁,
而文言文要靠背誦, 除左學校課文記得我當年我可以背出長恨歌, 琵琶行等詩詞...
寫議論文要背得出若干論語, 詩經以助立論...
有時我只可以講到方法, 做唔做到都係睇個人,
我識o既o野唔可以打針咁打比你, 自發睇書睇到o既先會入腦,
睇得多分析力又會提高, 到中學的話, 分析能力好重要
最後又講講我當年FORM 7考中國文化o既經歷,
中化係我最有把握o既一科,
但其中最擔心o既係口試部份,
因為有小組討論, 有d不可控制o既因素
仲記得當日討論o既題目(大約)係 "香港每年花費數百萬放煙花, 你認為值得嗎?"
當日有3男2女, 我同另一個男仔都係正方(話值得),
另外一女兩男係反方(話唔值得), 好彩有正有反, 唔係冇戲唱~
其實我地話值得都係講o的行貨o野, (咩增加節日氣氛呀, 促進旅遊業呀, 普天同慶...)
反方o既同學o既論點如下:
甲同學: "唔值得, 呢d 只係曇花一現, 增加節日氣氛有好多辦法"
乙同學: "無錯喇! 煙花只係一剎那o既光輝, 一剎那o既光輝唔係永恆..."
丙同學: "我地唔可以咁短視, 只著重享樂, 呢d錢, 如果拎o黎做教育, 醫療, 令人真正受惠唔係更有價值咩?!"
同學甲, 乙(附和): "對喇, 搞教育同醫療的話...(局長上身一樣, 內容從略...)..., 唔知話值得o既同學有咩睇法?!"
識得交波o添喎, 其實一早已經聽得出佢地o既立論有幾錯,
不過我當然唔會打斷佢地, 由得佢地將個波越吹越大,
我(真殘忍)來個一針拮破:
"同學們有咁偉大高尚o既情操想搞好教育同醫療我係好讚同,
不過首先要知道放煙花o的錢o係邊度o黎?! 主要係贊助!!
中銀煙花賀新歲!!! 係私人出咖, 人地呢d係廣告費o黎咖,
唔係政府錢咁點拎o黎搞教育, 搞醫療呀??
o係贊助商o既角度有乜好得過又有效益得過比幾百萬冠名贊助一次幾百萬人睇o既煙花show?!"
果一刻我見到同學甲, 乙, 丙 流露出尷尬o既表情,
餘下o既發言我就交比同我同一陣線o既果位男同學,
夠鐘完場時我幾可肯定我地會攜手拎"A"了~ 哈哈~
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
