證件血淚史（中）
申請文件，包括已簽署的聲明書、兩張證件相、住址證明、身份證副本連所有護照正本（主要係特區護照，如未能提供正本要列明原因同埋將成本護照彩色影印寄過去）（按：呢個無聊要求8月中已取消）以空郵掛號寄到英國利物浦的護照辦事處，滿以為可以撓埋雙手等護照，點知寄出後幾日撞到一位非常關心國際事務嘅朋友，話我知英國護照部門因為工作量急增，所以積壓咗大量申請，可能會有排等。
聽到呢個消息，心裡一沉，返屋企即刻搜尋有關新聞。原來係因為如上一篇BLOG所講，英國政府想慳錢，取消晒海外領事館嘅護照服務之後，本土辦事處又無相應增加人手，所以就冧廠喇。無幾耐之後，當地員工仲發起罷工同示威抗議。我開頭都唔敢催促，一直等到7月頭先電郵去問，獲得嘅回覆係5月27日已經收到文件，但需時最少六星期處理，唯有繼續等啦，心諗俾夠12個星期一定得啩。
等等下，7月中收到一個令人極度不安嘅消息。當地辦事處職員發電郵通知我，話因為首次申請時（1996年），佢地仲未開始用現行嘅電腦系統，所以我唔可以用續期 (renewal) 方式申請，而係要當作首次申請（first time applicant)。我需要重新填一份書面表格 (paper form)、搵人副署、同埋寄出世紙正本過去（！）。收到呢個電郵，我又六神無主地打去熱線查詢。我同接聽嘅職員講，郵寄出世紙正本風險好高，有無機會可以用副本代替。可惜我遇著英式人肉錄音機，只係不斷重覆一定要寄正本，同埋話唔明我擔心乜嘢。當我再問寄完呢次文件，餘下程序需時幾耐，佢就答我唔到。
要搵人副署都有難度，因為最好係英國公民、BNO次之，又有一系列職業要求。為咗盡快搞掂，就兵行險著叫銀仔副署。其實而家過到骨先敢講，副署人同申請人唔可以係親戚，連情侶關係 (in a relationship) 都唔可以，但情侶比較難證明，而且我地唔係一齊住，所以就搏一搏啦。至於出世紙正本，我用硬卡紙托底，再用膠文件夾作雙重保護，跟住由銀仔幫手用speedpost寄過去，盛惠百幾蚊。。。當時心情真係好差，由於香港已經唔再係英國屬地，萬一張出世紙唔見咗，張皇冠頭絕版手寫出世紙都唔知搵邊個賠。
我一直留意住英國護照辦事處嘅新聞，而且從電郵回覆時間，得知當地已經開行turbo，星期日到星期六起碼朝八晚八，結果超時補水開支急升，負責護照部門嘅官員亦喺群眾聲討下公開道歉，呢啲應該係「偷雞唔到蝕渣米」嘅典範。根據新聞，好多苦主都因為護照唔能夠如期辦妥，而錯失旅程，包括baby shower, 喪禮等等，亦都有人揸幾日車穿州過省，親身去辦事處交涉。港女都諗緊要唔要行呢步，但係，我本特區護照都已經寄咗去英國，基本上我只可以留喺香港同埋返大陸。英國當局為咗收拾殘局，推出咗一系列措施，包括為即將到期嘅護照延期一年、同埋推出好多國家都唔承認嘅單次緊急護照，不過呢啲措施不適用於已提交申請嘅人士或BNO持有人。
唉，不經不覺又1200幾字，仲未望見家鄉呢。
港女
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
