證件血淚史(完)

相信大家已經睇上兩篇密麻麻嘅字已經好辛苦，我亦寫到嘔心瀝血，所以呢篇一定要大團圓結局，齊歡唱、同慶賀。


上回提到，我將成副身家性命財產寄晒去英國，眼見時間一日一日咁過，機票、住宿、婚禮全部未預訂，家人朋友同事又周不時問申請進度，真係好大壓力。我只可以不時上網填查詢表格，話俾佢知我真係好需要本護照去實現結婚旅程，結果上次話最少等六星期，後來已加到八星期。於是更每十五分鐘檢查電郵一次，仲試過打電話去問，有一兩次忍唔住喊出嚟，接線職員都愛莫能助，只係話會轉介我個查詢去利物浦護照辦事處。等到9月中，又收到一份令人沮喪嘅電郵，辦事處話已收到後備文件，但由於我個國籍比較複雜(a more complex nationality case)，所以要轉介去特別部門處理。唉，我只係想要本BNO，又唔係大貪到叫佢俾我做大英公民，點解會搞成咁呢？呢一刻，我曾經懷疑寄去嘅文件會唔會被遺失，個人真係無晒理智，再次打去熱線查詢，話佢俾返本特區護照我先都好啦，結果當然係徒勞無功。我曾要求同利物浦辦事處直接通話，方便大家澄清疑問，熱線職員話會轉達呢個要求，結果我大半個月，因為時差關係，夜晚瞓覺都唔敢熄鈴聲，又瞓下醒下，但都等唔到呢一通電話。睇到呢度，希望呢份神經衰弱唔會影響大家。眼見距離出發日期只剩下一個多月，並開始倒數，喺毫無辦法之下，唯有考慮實行後備方案，就係報失兼補領特區護照，同埋申請出世紙核證副本，兩者需要等兩星期至一個月。點知差不多兩星期後，利物浦護照辦事處就發電郵俾我，話本護照早幾日已經付梓，會於日內送到，所以就即刻上網取消辦理特區護照嘅預約。又點知，過多兩個鐘，DHL已經敲門送件。第一份收到嘅係新BNO，而特區護照、出世紙等文件，就一個星期後再次由DHL送回家中。至於一早俾咗錢嘅出世紙核證副本，就唔得閒理住，等去完旅行返嚟先拎啦。

聽聞而家處理護照嘅時間已逐漸回復正常，但如果大家有心續期，一定要預鬆D時間，同埋一定要留返一本有效護照喺身邊。其實從當地報章，見到一個個裝住文件嘅橙色箱堆積如山，真係唔忍心再三催促，怪就怪主事人啦。

經過呢幾個月嘅煎熬，申請出名麻煩嘅美國簽證都變得小兒科，只係份網上表格詳細到不得了，尤其係銀仔嗰份，有一題要佢講出近五年去過嘅國家，大家可以玩一玩呢個無獎問答遊戲吧！！

問題：銀仔過往五年到過的國家數目。

答案：A) 5至10個

      B) 11至15個

      C) 16至20個

      D) 21至25個

      E) 26至30個

其實美國簽證喺香港只有約5%的拒簽率，而且我同銀仔嘅工作都算穩定，所以唔應該太緊張。只係港女已練成草木皆兵大法，對於任何細節都非常小心，結果印了一大疊糧單、假期證明等等，移民官都無睇過，剩係收咗我地嘅公司信，而獲批後兩日，就收到速遞員電話，將連同簽證嘅護照歸還。今次旅程會盡量用夾付美國簽證嘅BNO，而古巴之旅就用特區護照啦。

港女小試牛刀，多謝大家聽我吐苦水。下一篇就係銀仔嘅旅程前瞻喇！