花花航空生涯 , 完結了 !

31.10.2014

轉眼間 , 十月又快完結 . 明天起 , 小地勤不再是花花航空的員工 , 想不到在花花航空轉眼間已經當了三年零四個月的地勤 . 也想不到明天起 , 是新的開始 !

花花航空要轉型 , 當然係為左賺更多錢 . 因此公司昨天要求所有現職同事回總部簽新合同 , 我們在沒選擇的情況下被轉到另一間新開的地勤代理公司 . 而依間新開既地勤代理公司 , 其實就係花花航空轉型而衍生出來的副產品 .

成為代理公司後 , 小地勤不再是航空公司職員 , 被眨做地勤代理 . 花花航空都明白不可以話改就改 , 所以小地勤以前有既福利 , 亦會帶落新公司到 .

** 合同寫明 : 最終決定權在新公司 ** ( 即佢將來要改 , 我亦吹佢唔帳 )

大家知唔知航空公司跟地勤代理分別其實很大 ! 航空公司職員有機票 , 酒店福利 . 上機 Standby 既機會亦比代理高 . 基本上 , 大部份做代理的公司都係無機票優惠架 !  聽聞龍仔比大柴收購左後 ,龍仔亦被轉做地勤代理 , 做龍仔同事已經比較好 , 起碼可以出員工機票 , 但上機都要先讓大柴職員上曬先到佢地 . 至於其他代理 , 連員工票都出唔到 .

估唔到花花航空咁絕 , 好既唔學 , 專學人地既衰野 ! 聽聞由 2014 年入職既同事更要做到一年先有 5 套免費飛 , 而由 2015 年起 , 新入職既同事會無員工機票 . 跟小地勤當年比起 , 佢地既福行差左好多 . 航空界 , 早入早著數 !

明天起 , 又是新的開始 ! 小地勤今日計過數 , 想退休有保障 ? 做多四年會好少少 , 所以比個目標自己 , 繼續玩 , 繼續 Hea , 繼續捱下去 ! 人生有目標才有動力 ! 係唔係 ?