小小的安慰

31.10.2014

新更上星期已經收到 , 十一月 , 小地勤會放一星期大假 , 目的地係 Bali . 去完再跟大家分享 .

掃 把今次出既新更 , 不太好啦 , 小地勤睇到都忍唔住要同佢反映下 ,我扣左大假同每星期既 Off , 返得個十幾日工 , 竟然有十晚要返夜 ... 依加返夜好慘架 , 因為小地勤住得遠 , 而冬令時間又開始左 , 每晚要成 0200 先收工 , 無車返屋企 , 只有晚晚打的 , 你估小地勤幾十億未開頭咩 ? 一個月的士錢要成 2400 蚊呀 ! 仲未計平日交通同飯錢呢 ... 掃把聽完小地勤呻 , 先發現自己編左十晚比我 , 佢被我老屈要請一星期早餐 , 哈哈 ! 

另一件開心事就係當小地勤傷心緊十晚要坐貴車既時候 , 個天可憐我 ! 機管局有五晚停電 , 當中有兩晚影響貴賓室 , 剛好兩晚係我返夜 , 小地勤樂得早收工 .

唯 一有一晚 , 有一對香港情侶聽聞 check-in 時知道停電一事 , 堅持要照入黎貴賓室 . 其實小地勤又覺得無所謂 , 反正一點鐘都會照清場 . 當時對情侶 0030 左右入到黎 , 同事都好有禮貌咁提一次停電既事 . 佢地 " 哦 " 左一聲就入左去 .

聽聞入左去後 , 佢問服務生係唔係我地想早收工 , 所以就呃佢地今晚停電 ... 小地勤當時心諗 , 睇黎佢地會堅持坐到最後都唔走 . 好采我估錯了 , 不過佢地臨走時都問小地勤多一次 , 今晚真係會停電 ?

小地勤都老實答 , 機管局要電力 Upgrade , 我地開門做生意 , 真係大受影響 , 唯有講到自己好慘 , 等佢地條氣順返 . 我心諗 , 我呃你做咩呢 ? 個客聽到公司因停電無生意 , 即刻好開心咁走 ... 原來有咁多人想人地慘過佢 ...

最後一件開心事就係 , 前晚遇到個熟客 , 佢送左張今日到期既電器禮卷比我 . 剛好我部風扇壞左幾個月 , 小地勤好開心可以左用張電器禮卷 , 臨比錢時因為又有咩咩會員卡 , 所以由 677 蚊變左 177 蚊就買到件貨返去 .

其實依幾日有為某件不公平事件唔開心過 , 不過 , 唔想提 , 其實大家都有自己既理由 . 我選擇忘記 ...