03.11.2014
案發經過 , 某航空公司唔見左同錢有關既文件 , 懷疑係 Check-in 櫃位比乘客順手牽羊 . 而佢地亦鎖定左某位金卡會員 , 懷疑係依位乘客做既好事 . 要找金卡會員 , 當然會找貴賓室既我地幫手 , 基本上 , 我地認得曬在場既乘客 .
電話係由豬同事接聽 , 其實之前都有提過好多次豬同事既事 . 小地勤做左咁多年 ,
真係未見過一個咁樣既同事 , 每次拍佢返工 , 我都有壓力 , 應該係話見到佢 , 我就唔想返工 . 基於小地勤係 Leader ,
所以再惡教既同事 , 我都有責任去教好 , 更何況之前鬼叫我心軟幫佢講好話 , 攪到佢繼續留低 , 拖累其他同事及經常爆鑊 , 害大家比人鬧 .
今日豬同事接左依個電話 , 佢完全唔知人地講咩 , 但可以傾左個電話好奈 .
小地勤直覺知道發生大件事 , 循例問佢攪咩 , 結果佢答我唔到 , 仲要如豬同事個 Report 所寫一樣 report to leader ,
then 閃人 ... 咩料 . 小地勤咁就食左佢既 " 屎 " . 其實應該佢先係我 Leader , 次次都 Order 我做野 ,
自己就當無事發生過咁 , 連假扮幫忙都唔會 .
小地勤被佢攪一攪 , 忙到飛起 , 又要再打電話問清楚發生咩事 ,
又要問假如咁咁 , 你地公司想我地點協助 , balabala ... 一大堆 . 又要打 report , 又要引道個客交返文件出黎 ,
小地勤總不能直接問個客 " 你偷野呀 !? " 大佬 , 小地勤係英語有限公司 , 講左好奈先證實到個客係無辜 .
正當小地勤忙到七彩 , 真係火都黎 . 點解豬同事坐可以咁得閒坐係我旁邊望住我表現 ? 點解佢可以唔洗幫手 ? 睇唔過眼佢咁得閒 , 我出聲叫佢寫返 Log Book 同 Whatsapp 大家 .
半小時後 , 真正順手牽羊既人出現左 ,
小地勤又再一次用有限既英語引導佢交出文件 , 估唔到咁都比我成功左 . 找回文件後 , 通知返航空公司 , 問洗唔洗報警 , 該公司決定攞返就算
, 講真小地勤都唔想攪大件事 . 正當我處理完依件事 , 打埋個 Report , 諗住 Whatsapp 返大家件事已經完結 .
卻發現 ... 豬同事根本無係 Whatsapp 留下半句說話 . 小地勤第一次 , 真係做左咁多年地勤 , 第一次當住面咁鬧一個同事 . 事後 , 其他同事都話 , 從來無見過我當面咁鬧一個同事 , 仲要係咁惡 .
印象中 ,我問豬同事點解大半個鐘都仲未通知大家 , 佢答我 " 仲打緊 " .
我話 " 我比左大半個鐘頭你 , 你問下你自己 , 你做過 d 咩 , 連接個電話都做唔好 " 佢答我 " 唔好意思 , 我 ... " 我已經
stop 佢 , 我唔想再聽你一次又一次既解釋 , 亦唔想再聽到 " 唔好意思 " , 唔該你返去諗清楚你今日做過 d 咩野 .
之後 , 小地勤就黑曬面 , 無再同佢講野 . 講真 , 日對夜對 , 我最怕就係撕爛塊面 , 一向我都可以對住客人好假 , 再麻煩既客人 , 我亦自問攪得掂 . 今次 , 我堅嬲 , 次次都係咁 , 唔好見我鐘意幫同事就試我低線 .
小地勤 , 都有情緒 , 係可以好惡架 ! 之前網友講得啱 , 唔怕神一樣既對手 , 只怕豬一樣既隊友 . 小地勤已經同左掃把講 , 再要我帶住佢 , 我會選擇做埋過年就走 , 我真係頂佢唔順 .
鐘意SeeWide的分享，給我們一個Like吧！
-
-
-
- 攻略日期：N/A
- 攻略地點：N/A
-
- 攻略時間：N/A
- 是次消費：N/A
-
貴賓室工作篇
竟然可以引導偷左野既人，自己拎返出嚟
年尾辭工都唔緊要，可以轉做談判專家，一定得
