探險家攻略 > 休閒玩樂 / 城中探秘 / 旅遊 > 主題公園 / 特色景點 / 長線旅遊 > 成都。熊貓基地看熊貓

成都。熊貓基地看熊貓

由平凡人於 2014-11-05 16:55:00 發表 | 累積瀏覽 804

分類：主題公園長線旅遊特色景點；地區：中國

< 成都﹑九寨溝﹑重慶12天遊 >

第三天

今日繼續hea遊成都，唔諗住去好多地方，只會去熊貓基地探探可愛熊貓BB；既然係hea遊當然唔會咁早出發，但其實好多人都話去熊貓基地最好既時間應該係朝早7-8點，咁早係因為啲熊貓食早餐既時候先最生猛，過左早餐時間，好多熊貓就會好似海洋公園既熊貓咁，隻隻都灘晒係道唔願郁；不過算啦我先唔咁早起身

慢慢先出發，出到去首先要搵地方食早餐，係路口貪方便揀左德克士，呢間野以前都食過問題唔大；德克士係大陸有好多分店，無論去到邊道都可以見到，除左KFC & 麥當勞，德克士係中國第3大西式快餐店，我諗質素都應該唔會差既？

有飯有包，都可以食得飽
不過講真個句個飯就真係唔好食啦！而且呢啲快餐店價錢唔係平，今次都係試過就算下次唔食lu（明明以前都食過好多次，但見到唔知點解又會心思思好想食）

係香港時應承左一個朋友幫佢入數，早餐後就先到對面中國銀行，入面超大間又豪華，感覺怪怪地，而且又先進要先係派籌機選擇所需服務，再坐低慢慢等；因為係入數咁就係派籌機揀deposit，再坐低慢慢等，但就係道等左好耐等到其他人走晒都唔叫我個號碼...到最後終於明點解啦，服務我既職員見到我時好尷尬咁講英文，原來係因為我選擇左英文選項所以冇人敢叫我個號碼......

搞掂好晒可以正式出發，成都既天氣真係唔多好，長期有層霧氣，去左咁多日都未見過陽光，冇太陽曬所以四川人既皮膚特別白

一年前我都曾經去過熊貓基地，但就睇唔到熊貓BB，今次再去睇下先；大約都仲記得點去，就嘗試搵返以前搭過既巴士，行左15分鐘成功搵到個巴士站，不過就咁樣...因為周圍都起地鐵既關係市區好多地方唔係封左路就係巴士改道，搵巴士搭都有少少難度；要行多15分鐘去另一條大街先搵到原本想坐既巴士

坐左好耐終於到巴士總站，上次去熊貓基地就係係呢道昭覺寺巴士總站轉車，不過今次中蕉啦，搵極都搵唔到部車，望望先知原來去熊貓基地既巴士搬左去動物園做總站！見唔係遠都係搭的士算，但成都的士司機真係冇幾多個好人，又比佢兜路，明明好近既路程都可以不停行錯路要掉頭，又比佢兜左我40蚊，上次去熊貓基地又係明知佢兜路兜左80蚊，真係想叫佢地食屎，但係人地地頭都係出少句聲安全啲......

幾經辛苦終於去到！！都係唔好比啲衰人影響心情，開開心心去睇熊貓先


入到去有電動車可以搭，但唔洗搭車自己行上去都唔太遠


好快就見到熊貓啦
呢個就係唔朝早去既後果，一隻隻灘晒係道唔願郁......

呢兩隻都叫做有郁動，唔係食就係訓


睇左咁多隻都係呢隻最正


揀個咁靚既位來訓教，佢自己唔驚但見到都得人驚，都唔知點爬上去，明知自己咁大隻都敢訓係枝咁幼既樹枝上面

訓得佢咁舒服睇你點落返來

熊貓海洋公園都有得睇，不過下面呢D海洋公園就冇啦，山長水遠來到呢道就係想睇熊貓BB，真係超得意



隻大小小既係道碌碌下，得意到成隻公仔咁

正宗趴地熊

毛毛好似好軟熟丫，好想抱住佢

望住熊貓BB望左好耐，始終都要講ByeBye
出面仲有好多大熊貓，不過呢啲都唔得意既，我要熊貓BB丫

除左大熊貓，仲有小熊貓，不過睇完熊貓BB之後，呢啲就冇咩興趣慢慢欣賞啦


仲有好多孔雀係係熊貓基地入面四圍走


天鵝湖



沿路行出門口Lu，要同熊貓講再見啦，不知何年何月可以再見呢


而家由熊貓基地搭車走又係一件好麻煩既事，因為門口整路變左單程路，回市中心方向既巴士冇左，所以要坐3程車先可以返到出市區；雖然門口係有好多三輪車﹑的士係道拉客，但唔想再比人呃錢，非必要唔會再考慮呢啲車；好快有部巴士經過，都係唔理咁多跳左上車再算

搭一個站就出到一條大馬路，行去對面就可以轉返去動物園既巴士

去到動物園就可以搭返入市區既車，我就揀左去火車站既巴士，要先去一去火車站

成都既巴士都算係又大部又靚，對比返之後係重慶見到既巴士，呢道直頭可以用豪華去形容

火車站對出又係起地鐵封晒全條馬路，部巴士要停到好遠好遠，行最少10分鐘先迫到入火車站範圍，上次來成都就係係呢道落火車啦

迫到入去售票處好彩唔係好多人，咁辛苦黎火車站其實係要退火車票
本來買左火車票係去完九寨溝之後去西昌，再經西昌去瀘沽湖，再由瀘沽湖去麗江返香港，唉...邊道都唔洗去啦......

唉...搞掂火車票問題就返hostel食野算啦，今次唔食西餐食中餐，平好多之餘而且都係好好食（順手係對面鍾水餃買左餃子加餸，Yeah）；呢D中式小菜只係十元八塊，但西式意粉炒烏冬就要二﹑三十蚊，差咁遠既？

都係呢道食野最舒服

食完野就係道上下網，唔知幾時開始坐係對面既兩位女仔開始傾起峨嵋山話題，雖然我唔識講普通話，但話晒我都叫去過下峨嵋山就緊係要互相分享一下經驗啦；原來對方都係岩岩相識，一個香港人一個台灣人，咁就好啦有人聽得明廣東話；而且咁岩呢位香港朋友又係買左明天去九寨溝既巴士飛，講講下連台灣朋友都心郁郁想一齊去九寨溝，但就未買車票唯有明天早啲去車站碰碰運氣啦，最後大家約好明天未天光就一齊坐的士去車站