探險家攻略 > 休閒玩樂 / 城中探秘 / 旅遊 > 郊遊 / 特色景點 / 長線旅遊 > 童話世界九寨溝（上篇）

童話世界九寨溝（上篇）

由平凡人於 2014-11-07 12:30:00 發表 | 累積瀏覽 761

分類：長線旅遊特色景點郊遊；地區：中國

< 成都﹑九寨溝﹑重慶12天遊 >

第四天

終於到左出發去九寨溝既大日子，一早起身先收拾好行李，將冇用既野先寄存係旅舍，只係拎一個小背囊出發；去九寨溝可以選擇坐車or坐飛機，飛機大約一個鐘就到，而且可以居高臨下欣賞到下面既雪山風景，不過價錢比較貴；坐巴士大約需要10個鐘，如果有時間又唔怕辛苦既話坐巴士都係一個唔錯既選擇，係旅途上面仲可以見到一啲飛機唔會見到既畫面

由旅舍坐的士好快就去到新南門車站，先同同伴去睇下可唔可以買到即日去九寨溝既車票，真係10000個好彩，買到最後既一張8:20開出既車票；新南門車站好奇怪，時間表雖然只係顯示九寨溝只有8:00一班車，但如果多人去係唔只一班，我出發呢日總共開出左12班車，每5分鐘一班，而我早2日去買就買左7:45呢班（當時售票員話只有呢班），另一個朋友早1日買就買左7:40個班，所以有幾多車有邊班車係估佢唔到，不過都係越早買越穩陣

上車前先簡單食個早餐，隨意係車站出面路邊攤檔食雲吞，凍冰冰既時候可以有碗熱野食都唔可以期望咁多

碗雲吞真係好熱，為左趕時間食比佢燙親個口
不過碗野話就話係雲吞，但肉都唔知有冇只係食到雲吞皮，不如就叫佢雲吞皮算啦，呢碗雲吞皮仲要係賣8蚊咁貴

極速食完雲吞皮就要趕去上車，上車個時D車已經停晒係停車場，睇返車上面個時間牌上返自己部車

不過，我竟然係買左最後一行位
全程都係頂腳想伸直一下都唔得，要係道罰坐10個鐘...如果可以買到前面是但一個位會舒服好多，唯有安慰一下自己坐最尾都有好處既，可以坐高啲風景易睇啲，又有個窗可以打開透下氣，車尾仲有位放背囊......

成都去九寨溝途經映秀﹑汶川，沿路會見到全個映秀鎮至汶川城呢段路都係山泥傾瀉痕跡，汶江對岸舊映秀汶川公路好多地方已經比山泥完全埋住，如果當時有車行既話就...CRY

車一路行會見到好多地震遺址，基本上全條路都係，但見到既都只係冰山一角，仲有無數既我地見唔到，雖然只係見到呢少少，但已經可以感受到大自然威力係幾咁大

行左大約2個鐘就有地方可以落車郁動下，呢個係第一個可以落車既地方，有得走當然即刻出去行下，坐得咁辛苦去走動下舒服好多（呢道唔關窗會好大獲，車都未停定就成支水柱射過來洗車，好彩個時冇開窗）

天同心情一樣灰朦朦


終於見到新樓啦

唔經唔覺又過左兩個鐘，去到午餐既餐廳，大約只有半個鐘時間食飯；因為全部車都係停呢道食飯所以個廁所勁多人排隊，食完野想去廁所都要排長龍，幾驚部車唔等人走左去

25蚊既自助午餐，開頭諗住食蕃茄炒蛋一定冇問題啦，蕃茄炒蛋理論上好難會煮得難食，不過結果係呢個蕃茄炒蛋竟然可以難食到完全食唔落，都唔知佢用咩蕃茄炒出來，所以都係自己帶野食最好



旅伴認識左一個深圳女仔加入我地


終於見到藍天啦

又坐多2個鐘可以落車休息一下；每個地方都有廁所，全部都係收1蚊，想去廁所就要自備散紙；但佢地收得人錢又唔整靚個廁所，真係冇必要都唔會去，搞到我全程車都唔敢點飲水，但就飲左可樂，結果都係送左1蚊比個廁所

呢道風景唔錯

仲有隻牦牛比人影相，不過走去影相又唔比錢既朋友就要小心，你唔比錢既話佢會叫隻牛撞你，撞中唔死都周身傷，我咁遠影過去撞我丫笨

好快又2個鐘，到最後一個停車位，而家已經去到松藩啦；車上有一半都係外國人，有講英文有講德文，而我認識左旁邊兩位廣州uncle & auntie，見auntie肚餓就同佢地分享左由香港帶去既朱古力同零食，真係羨慕佢地由雲南一路玩過來四川，去過好多好靚既地方

經過川主寺之後就開始見到雪山啦，沿路都有積雪

10小時車程完結，終於去到目的地九寨溝汽車站，我部車行得最慢所以最遲到達，立刻買定3日後回成都車票，咁就唔洗擔心冇車走lu；九寨溝汽車站有車去其他唔同既地方，黃龍都可以係呢道坐車去（但冬天未必有車去，要自己包車啦）

處理好車票問題就要去搵地方住啦，九寨溝好多既住宿地方都係係溝口另一邊，由呢邊搭的士過去另一邊每次開價都係10蚊，價錢都算公道冇開天殺價，好過次次係成都比人呃；揀左住自由國際青年旅舍，貪佢係國際青年旅舍比較方便book，設施都唔錯係熱水少左啲，沖涼會凍死人（其實呢啲淡季時間去九寨溝唔預先book住宿都冇問題，大量住宿地方冇人住可以慢慢選擇）

除左自由青年旅舍，九寨溝仲有好多青年旅舍可供選擇，朋友住旁邊既夢之園旅舍，雙人房價錢只係100蚊一晚咋，除返仲平過訓床位，入去望過設施都OK；另外車上面既廣州uncle & auntie住既酒店設施更加好，仲要只係80蚊一晚，識得講價真係著數好多，只可惜我從來唔識講價...

搞掂好住宿已經好夜，約好左其他朋友一齊出去晚餐
夜晚落住雨真係凍到震，估計接近零度，去左間唔知係唔係好出名既餐廳（問hostel職員佢推介呢間餐廳，問的士司機又係推介呢間餐廳，真係咁正？），望落都唔係好特別咋？

簡單3餸1湯，又真係唔錯，可以食到熱辣辣既食物係好滿足既一件事


食飽就要去買定明天早餐既杯麵，仲有午餐既乾糧，但返到hostel發現，係香港帶去既蛋糕仔全部爆開晒！諗返先記得原來坐車個時後面傳出既「啪啪」聲就係爆膠袋既聲！今次真係損失慘重，早知食晒佢冇咁嬲！

第五天

終於到左入九寨溝既大日子啦，一早起身食個杯麵，要趕係8點鐘出發去九寨溝，咁就可以避開旅行團人潮，又可以玩盡一日時間

由hostel行去九寨溝入口唔係好遠，慢行15分鐘就到


路上向山上望，見到山上鋪左一層積雪，全晚又落雨又落雪，好彩朝早已經停雨，冇琴晚咁凍啦



九寨溝門口已經有好多人早我地一步到達，先入售票處排隊買門票車票，售票處又細又多人迫左一大餐先入到去，今日（16/11）係九寨溝淡季開始既第一日，淡季門票價錢係¥80，再買第2日2次進溝門票加多¥20，總共係¥100入去兩日，比起旺季真係平好多，當然仲要買每日¥80既車費

「九寨溝地區的平均海拔在2000米以上，遍布原始森林，溝內分佈114個湖泊，有“童話世界”之譽。1992年12月由聯合國教科文組織批准，九寨溝列入《世界自然遺產名錄》。水是九寨溝的精靈。湖、泉、瀑、灘連綴一體，飛動與靜謐結合，剛烈與溫柔相濟。泉、瀑、河、灘將108個海子連綴一體，108個海子裡面長海是最大的一個海子，藍澄澈，千顏萬色，多姿多彩，異常潔淨，能見度高達20米。以翠海（高山湖泊）、疊瀑、彩林、雪山、藏情、藍冰“六絕”馳名中外，有“黃山歸來不看山，九寨歸來不看水”和“世界水景之王”之稱。春看冰雪消融、山花爛漫；夏看古柏蒼翠、碧水藍天；秋看滿山斑斕、層林盡染；冬看冰雪世界、聖潔天堂。」

九寨溝有3條溝，當日去長海方向既車要等到9:30先有，所以就先上另一邊既日則溝；九寨溝有大量車可以坐，去到景點可以隨時上落車

上到天鵝海已經冇得再上上面原始森林啦，因為已經到左淡季封山保育時間，除左呢道之外，仲有好多棧道都封左唔可以行，淡季想買平門票係要付出代價...不過唔緊要，冇得行都仲有巴士載你去唔同地方

黎到呢道見到有一點點既飄雪，感覺好舒服，但就無緣接觸到真正既雪景（後來知道今日長海個邊雪景好靚，因為長海地勢高，積雪冇咁易溶...唉......）

呢個時間去九寨溝有少少尷尬，秋天會見到金黃色既九寨溝，冬天會見到雪白既九寨溝，春夏會見到綠油油既九寨溝，就係而家好多樹都變成灰色，只有灰色既九寨溝



山上面既樹全部都係雪，不過好快太陽伯伯一出黎，上面既雪就溶晒啦


天鵝海真係有天鵝？

湖面有時好平靜，可以清楚見到雪山倒影，有時陣陣漣漪，倒映住朦朧既雪山，兩種唔同風味



行多兩步，雪溶得好快，就快冇晒啦


繼續行落山去下一個海子，沿路植物都結左一層霜，行人路都結左冰，好多人唔小心仆低左......

沿途景色



「熊貓海與箭竹海位在海拔2587公尺，冬季時，熊貓海湖面會結冰，晶瑩剔透，而箭竹海則會一半結冰，一半不結，形成有趣對比。」

到左箭竹海，相傳以前有好多竹樹，熊貓會黎呢道開餐


箭竹海有一條箭竹海瀑布，瀑布又細又長


雖然話佢係一條好細既瀑布，濺起既水花都唔細，行近小小部相機已經濕晒

再行近D，流水聲一樣好澎湃

上返箭竹海，瀑布之前箭竹海係一個好平靜既海子



坐車到熊貓海，又係一個平靜的海子



熊貓海超多人，呢道可以租民族服裝影相，大約20蚊一次，但我覺得熊貓海同其他海比唔夠特別，而且呢道好多人係道賣野sell野，遊人又多，好似去左街市咁，此地不宜久留

「五花海有九寨溝的靈魂之稱，因湖底的深淺程度和沈積木的不同，在陽光下會折射出現五花八門的色彩而得名。」

再向下行就到我好鐘意既五花海，其中一個顏色好靚既海子，有好多唔同既顏色


又綠又藍



可惜既係山上面既樹已經變晒灰色，如果秋天黎到見到滿山都係又紅又黃既秋天景色，呢道更加會靚100倍



金光閃閃

我地就係呢個咁靚既地方午餐


「珍珠灘與珍珠灘瀑布傳說是女神色莫身上的珍珠灑落形成的奇景，和珍珠灘瀑布連成一景，珍珠灘瀑布位於海拔2433公尺，高21公尺，寬幅162.5公尺，灘上布滿了小喬木，因流水激起的水珠滾動如珠而得名。」

休息完又再起程，下一個地方係珍珠灘，一個又長又闊，水流急既淺灘

好多人係珍珠灘呢道洗腳，唔知佢地想點......

遙遠的雪山

沿水流向下行，接住就見到珍珠灘瀑布，可以好近距離欣賞，呢道比之前見既箭竹海瀑布大好多



近到差唔多可以用手掂到


由下向上望，氣勢更澎湃，部相機再一次濕晒

離開瀑布，就行去車站坐車lu...好多棧道封晒，想唔坐車自己行都唔得

「據說是女神色莫不小心打破她的寶鏡，散落成114塊碎片，其中最大的一塊就成為鏡海，水面平鏡如海，可以反射「魚在天上飛，鳥在水中游」的奇幻境界。」

鏡海，就好似一塊鏡咁倒映住群山倒影（不過而家見唔到）

鏡海冇咩特別，等車繼續落山

繼續向下走，去到九寨溝三條溝既中間點諾日朗瀑布

「諾日朗瀑布落差24.5公尺，橫寬275公尺，是九寨溝眾多瀑布中最寬闊的一個。藏語中諾日朗意指男神，也有偉岸高大的意思，因此諾日朗瀑布意思就是雄偉壯觀的瀑布。」

企係瀑布正前方就睇唔到瀑布有幾大啦，不過都可以感受到瀑布既威力，部相機第3次比瀑布整濕；如何冬天就可以見到結冰既瀑布啦



「傳說很早以前有個西藏喇嘛，騎犀牛至此，因為流連於此地美色，就將座騎驅趕入湖，因此而得名，是九寨溝最神秘之地，傳說有不可思議的力量。」

離開諾日朗瀑布，向下轉到九寨溝之中最低既樹正溝；第一個到既地方係犀牛海，但見得其他靚景多，呢道吸引唔到我啦



沿路向下行，見到好多用水推動既藏族轉經輪，唔係見到都唔記得九寨溝係藏族人居住既地方，以前九寨溝入面有九條唔同既村寨所以先出現九寨溝呢個名



呢部唔係巴士，係臭到暈既廁所，行過都聞到好大陣臭味

沿路向下行，經過好多美景；九寨溝靚景實在太多，好多地方都已經唔道得叫咩名啦，總之就好靚啦



「樹正群海是由二十多個大小不等的湖泊相連組成，在這裡可以找到藏族人家的古老水磨坊和轉經坊，藏族風情濃厚。位處於樹正群海最上方的樹正瀑布，景色絕美，遊人可以體會什麼是「水在樹中流，樹在水中長」的風景特色。」

慢慢行，唔經唔覺就去到樹正瀑布，呢個瀑布好多水而且好靚

瀑布後水面又回復平靜

樹正磨坊

樹正瀑布旁邊既樹正寨，係九寨溝入面最大藏族村寨，入面有野食有野買，仲會有地方比人偷偷地住係入面，咁就可以唔洗比第2日門票車費（咁做係唔岩架，唔可以比人發現）

入面有好多藏族特色野賣，牦牛肉﹑牛角梳﹑藏刀......我就對買野冇咩興趣啦，行下睇下就算



玩到呢道，九寨溝都就快夠鐘關門，係時候坐車落山lu

夜晚天氣依然好凍，但好彩既係冇落雨，搵野食既時候見到有一間牦牛火鍋店好多人，原本想食返個暖笠笠既火鍋，不過真係太多人，想坐都冇位坐；出去揀左另一間普普通通既餐廳，照舊3餸1湯白飯任裝；九寨溝係藏族地方，所有建築都係藏族風格，仲諗住食野都係一樣，但原來呢道係食四川菜比較多，都係好辣同好油；食飯時旁邊兩位德國人見到我地盤豆腐好似好有興趣但又唔識叫，就幫佢地叫左啦，不過見佢到辣到個樣都冇晒表情

食完飯行出去見到有燒烤食，當然唔可以放過啦

返hostel途中順便買定下一日早午餐，好早9點幾就訓左lu，係九寨溝玩一日真係幾攰，要休息夠第2日再努力玩

<< 香港電台節目「文化長河 - 萬里行」詳細介紹九寨溝美景以及村寨文化，比起自己去更能夠認識九寨溝，誠意推薦大家睇睇 >>

http://programme.rthk.hk/rthk/tv/programme.php?name=tv/cuhneverendingtrail&d=2013-11-24&p=6026&e=239616&m=episode

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共1人比"掂"

特搜總編E 於2014-11-07 17:54:32 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.1

mrsakwok 於2014-11-07 23:56:18 留言
以前冬天唔俾去九寨架！雖然D樹唔靚，但D海子一樣咁出色，仍然值得。
不過係咪天色麻麻呢？你去咁多個瀑布都見唔到彩虹嘅！
舉報回覆
No.2

林公子於2014-11-08 00:32:27 留言
冬天都去得?但好似唔多靚
舉報回覆
No.3

stellaluk 於2014-11-08 06:30:47 留言
九寨溝真係一個令人心儀到瘋狂的人間仙境！
舉報回覆
No.4

平凡人於2014-11-08 11:18:22 留言
原文由特搜總編E 於 2014-11-07 17:54:32 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.5

平凡人於2014-11-08 11:23:21 留言
原文由 mrsakwok 於 2014-11-07 23:56:18 發表
以前冬天唔俾去九寨架！雖然D樹唔靚，但D海子一樣咁出色，仍然值得。
不過係咪天色麻麻呢？你去咁多個瀑布都見唔到彩虹嘅！

而家一年四季都可以去，幾時去都得啲樹就真係差好遠啦，不過海子依然冇變，不過就少啲水天色都唔錯加啦，但就係冇彩虹
舉報回覆
No.6