探險家攻略 > 休閒玩樂 / 城中探秘 / 旅遊 > 其他 / 特色景點 / 公園 / 長線旅遊 > 成都。錦里﹑闊窄巷子﹑人民公園

成都。錦里﹑闊窄巷子﹑人民公園

由平凡人於 2014-11-11 09:45:00 發表 | 累積瀏覽 784

分類：其他長線旅遊特色景點公園；地區：中國

< 成都﹑九寨溝﹑重慶12天遊 >

第七天(續)

由九寨溝坐左10個鐘車返到成都，好快係旅舍食完晚餐就要趕去睇川劇；川劇由旅舍報名每人120蚊包來回接送，原本都好期待川劇之中好出名既變瞼﹑噴火等等表演，不過今次中晒伏唔去好過去，唉......

唔知做咩既表演

手影表演



木偶表演

滾燈表演

雜耍表演



唔知咩表演


最後終於到變臉表演



唉...睇完個個都覺得好唔抵...完全係冇驚喜既演出！！呢道都係旅行團多，我諗外國人睇會覺得特別，但呢啲表演係同東華籌款相差無幾，真係冇必要專程買票入場；如果想睇呢纇型川劇表演可以去錦里﹑闊窄巷子，有好多茶館都有變臉﹑滾燈﹑手影等等演出，內容基本上都係一樣，最重要既係可以一路歎茶一路欣賞，環境又好氣氛更加好，仲要平好多，有朋友試過話好正

睇完就返去hostel lu

第八天

又再次回到成都，究竟做咩好呢？同行兩個朋友今日出發去樂山大佛&峨嵋山，我都一早想去好耐啦，當年上唔到金頂今次終於可以再去啦？唉...今次又去唔成...係成都搵地方行下算；第一站去左錦里，上次已經去過呢道，見近近地搭巴士幾個站就到就再去行下，錦里係一個古式古鄉既地方，行下hea下都唔錯

Starbucks都好正


全部都係古式建築，係城市入面有個咁既地方都幾特別；不過唔好以為錦里真係古代留落黎，其實而家行緊既錦里只係一個現代新建既地方，亦都有傳說錦里曾經係歷史上蜀國其中一條最繁榮既街道，其實係點對我唔太重要，最重要就係呢道比到我一個好舒服既感覺，人都輕鬆好多



錦里有條好出名既食街，好多奇奇怪怪既四川特色小食都可以係呢道食到，但呢個位人太多啦，要搵個位都有小小難度，又想可以hea下慢慢食，所有唯有放棄左小食街



除左食街，錦里仲有好多大大小小唔同既餐廳


是但行入一間小店，舒舒服服享受一個早餐+午餐（唔好以為個米線咩都冇，其實係晒個底道）

錦里入面另一個靚既地方就係有好多流水﹑植物，有小小麗江古城感覺

秋天更為錦里送上好多唔同既色彩



好開心估唔到會有意外驚喜，見到好多靚紅葉，仲有好多銀杏樹，更有一棵好大既銀杏樹，銀杏金黃色既葉真係好靚



紅葉﹑流水，睇落都有幾分詩意

原來呢道都有我好鐘意既postcard店，不過對比起其他地方同類型鋪頭，呢間就真係差左啲，地方細選擇少收費貴，都諗唔到個幫襯既理由......

成都周街都有好出名既張飛牛肉，不過有朋友話唔好食所以唔敢試


錦里唔係好大，慢慢行影下相都可以行好耐


出左錦里對面係「藏族一條街」，開頭諗住有啲藏族特色野睇，原來全條街都係賣藏族用品，有好多藏族人買野賣野，見冇咩特別就走lu，坐巴士去人民公園

人民公園入面好出名既鶴嗚茶館，好多人係道歎茶


茶館好大，差唔多坐滿人
成都人生活真悠閒，大家一班人係道飲茶傾計就可以過一日；茶館仲有好多舒耳郎幫人淘耳朵（即係了耳仔），聽講了耳仔好舒服，但我就唔敢試啦



我就冇係茶館嘆茶，坐左係茶館對出湖邊，睇人划艇仔


大家好似玩得好開心咁bor
香港好似冇幾多地方可以咁樣划艇仔，係水上飄感覺好舒服，以前玩風帆經常都會開隻艇仔出海飄，冇目的就可以係海上飄一日，諗起都開心



老人家寫大字，好多地方都隱藏住大書法家

人民公園有寧靜優閒，亦有熱情奔放一面，好多舞蹈團唱歌跳舞，好熱鬧


所有人都可以加入一齊跳


繼續行去人民公園另一邊，無意中發現一個好靚既地方，就係好多銀杏樹，一片金黃好靚丫



第一次見咁多咁靚既銀杏樹，一路都係，以前冬天經過人民公園時都唔知有銀杏，原來秋天係可以咁靚



好多人影靚相

欣賞左好耐銀杏，就行過對面闊窄巷子；清朝時候闊窄巷子係官兵住既地方，而家闊窄巷子就變左一個寧靜﹑優閒既好地方，有cafe﹑茶館﹑小食店﹑西餐廳等等，一個中西結合既好地方

闊窄巷子雖然有唔少遊人，但總算少左車來車往既喧鬧，不失為城市入面一個舒適地方

舊時的闊窄巷子，同而家比有好大轉變



同錦里一樣，闊窄巷子旁邊有一條小巷有好多小食賣，有啲仲係我未見過既成都傳統小食，呢道人又唔多比錦里舒服得多

我就試左呢個叫三大炮既小食，望落都幾得意


有好多好靚既餐廳，但就冇時間係道幫襯啦，如果有機會我都想慢慢係呢個靚地方享受一個豐富晚餐



之前都講過想睇川劇唔洗去啲大劇院睇，係呢道就有得睇；偷偷地望過入去，表演內容大多數都係一樣，只係冇劇院既表演咁大型，但就多左份親切感，係呢道一路飲住茶一路欣賞比起坐係劇院排排坐睇感覺好得多

闊窄巷子都有好靚既銀杏樹，秋天為成都送上一份金黃色禮物

約左九寨溝巴士上認識既廣州uncle & auntie係闊窄巷子等，佢地帶住我穿過成都最地道既街市，買左好好食既燒鴨﹑生果，仲請我食晚餐，一大盤雞，好耐都未食過咁多肉啦；最後同佢地一齊坐地鑯去火車站，佢地今晚就要坐30個鐘火車返廣州，聽到都怕怕，我都未試過坐咁耐火車，真係好佩服佢地既毅力

夜晚無聊去家樂福行下，冇特別野買，只係買左啲飲品，係超級市場買野比起便利店買平好多；買完就返hostel訓覺lu

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共0人比"掂"

特搜總編E 於2014-11-11 14:56:24 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.1

stellaluk 於2014-11-12 07:02:16 留言
以後中國各鄉地道美食很吸引我，隨着乜都有假，取而代之是名山秀水、歷史文物！
舉報回覆
No.2

小龍於2014-11-12 12:26:58 留言
成係係天府之國，好古色古香我都好想去呀
舉報回覆
No.3

EEChan 於2014-11-12 21:41:38 留言
我80年代去過成都，有些懷念呢
舉報回覆
No.4

平凡人於2014-11-13 00:45:50 留言
原文由特搜總編E 於 2014-11-11 14:56:24 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.5

平凡人於2014-11-13 00:51:05 留言
原文由 stellaluk 於 2014-11-12 07:02:16 發表
以後中國各鄉地道美食很吸引我，隨着乜都有假，取而代之是名山秀水、歷史文物！

好多野都好吸引，名山秀水更加令人震撼，不過有時歷史文物都有機會係假，用新起既頂替，所以要多多留意
舉報回覆
No.6