探險家攻略 > 城中探秘 / 旅遊 > 特色景點 / 古蹟 / 長線旅遊 > 成都古鎮。黃龍溪古鎮

成都古鎮。黃龍溪古鎮

由平凡人於 2014-11-13 01:25:00 發表 | 累積瀏覽 590

分類：長線旅遊特色景點古蹟；地區：中國

< 成都﹑九寨溝﹑重慶12天遊 >

第九天

一早又起身啦，係成都咁多日都唔知有咩好做，成都市內好多想去既地方已經去過啦，但因為仲未買返香港既機票，所以都係留多日諗清楚點返屋企先；既然有一日時間又要諗下去邊玩，簡簡單單近近地去個地方就算，最後揀左黃龍溪古鎮


出到hostel去左間冇人既鋪頭食早餐，是但叫左啲野食（都唔好食既唔怪得冇人啦），見有時間突然又想去去樂山大佛，打電話比早一日出發去樂山大佛既朋友問問情況，得到既答覆係唔好玩...唉...唯有放棄呢個念頭

都係去黃龍溪唔洗煩；今次識搭巴士啦，好快就去到新南門車站上車

行左大約10分鐘，係恰緊眼訓既時候唔知咩事司機叫晒所有人係路邊落車......原來部車要去加油，大家就係咁排排企食左15分鐘西北風

再上返車又坐左個幾鐘，係半睡半醒之下去到黃龍溪；開頭仲諗落左車之後要點行去古鎮，原來呢樣野唔需要擔心，係停車既旁邊，已經有去古鎮既巴士等緊大家，唔洗5分鐘就去到古鎮，真心要讚下呢個服務，唔洗坐啲三輪車比人砍到一頸血

要記住尾班車時間


「黃龍溪是一座有著1700餘年歷史的川西古鎮，位於成都市東南約30公里處的雙流縣。黃龍溪古鎮內，明清時代的建築比比皆是，仍然保存完好。青石板鋪就的街面，木柱青瓦的樓閣房舍，鏤刻精美的欄杆窗欞，無不給人以古樸寧靜的感受。鎮內還有六棵樹齡均在千年以上的大榕樹，枝繁葉茂，遮天蔽日，雄渾厚重，給古鎮更增添了許多靈氣。鎮內現還保存有鎮江寺、潮音寺和古龍寺三座古廟，每年農曆六月初九和九月初九的廟會，還能再現昔日古鎮的喧鬧場面。」

入到古鎮第一個感覺係好寧靜，人影都唔多個，同之前去既洛帶古鎮比呢就真係好冷清，可能距離成都比較遠既關係



黃龍溪古鎮最熱鬧既時間係新年舞火龍，係國家級非物質文化遺產，黃龍溪又被中國文化部命名為「中國民間藝術火龍之鄉」；暫時仲未有機會見到呢個咁熱鬧既場面，現在見到既係安靜的黃龍溪



今日雖然冇新年既熱鬧，遊客都唔係多，店員仲係好努力拉丁丁糖



黃龍溪古鎮另一個特別地方就係佢係一個水鄉古鎮，流水穿過整個古鎮，但可惜既係當我黎到既時候見到下面既畫面，中間原本流水既地方唔知咩原因冇左應有既流水，只係露出乾涸既河床，感覺同想像中真係差好遠，唉...心情都唔係好，見到咁既情況就更加...唉......

連水車所在地都係一樣乾涸見底


好彩水車既另一邊遠睇叫有少少水，唯有幻想一下水車轉動時發出既清翠聲音


狗仔好可愛丫


經過水車過左橋就進入小巷，呢道比起之前既大街更少人

古鎮最出名既特產就係豆豉，街頭巷尾都有豆豉出售

我買左呢啲用葉包住既豆豉返屋企，同平時食開既豆豉唔同，呢種豆豉硬好多，而且有好大既煙燻味道，結果比佢搞到全個背囊都係燶味

有人食一根麵，有得睇廚師表演


古鎮入面有好多地方掛住機麻既牌，諗左好耐都唔知佢係咩來...原來係電動麻雀，呢道既人真係好得閒周街都可以打麻雀

咁呢個又係咩黎既呢？

行到河邊見到城門，都係有個城門比較有feel

城門對出，唔知部船仔去邊道既呢？

行到來呢道，都差唔多行左古鎮大半個圈，係時候回程由另一邊行返轉頭啦

沿河邊行有好多茶館，不過就人唔多有種冷清既感覺，可能天氣凍大家都唔想出來，由其係河邊又大風又凍，我都唔敢坐係呢道



嘆茶就唔好啦，試下地道小食都好既，試左碗麵同一個辣既豆腐花；辣麵可能普通左小小，不過辣豆腐花就真係第一次食，食落去感覺怪怪地，加上豆腐冇平時食既咁滑，都係香港既豆腐花好食啲



食完就要準備離開啦，如果遲左冇車走就麻煩，再見了黃龍溪古鎮


要坐返成兩個鐘車返成都，係車上休息下先


去到市區已經天黑，直接坐車去闊窄巷子望望；次次去闊窄巷子都係日頭，今次就去感受一下闊窄巷子夜晚既感覺



夜晚既闊窄巷子比起日頭更寧靜﹑更舒服，配上燈飾，比起日頭更有古代既感覺



可以慢慢聆聽音樂，又可以專心買手信，唔洗同人迫來迫去


有五光十色既餐廳


又有街頭表演


離開寧靜既闊窄巷子，出到門口就見到一班阿姐跳舞，跳得快到部相機都影唔到，同入面闊窄巷子形成好強烈既對比，哈哈；行完就坐地鐵返hostel lu

返到hostel又係開餐時間，去峨嵋山既朋友已經返到hostel啦，大家又可以一齊食飯；數落真係差唔多餐餐都係hostel食，冇計啦呢道既環境咁吸引，想唔返來食都唔得

夜晚幾個人係道吹水玩啤牌，玩到好夜好夜，明天大家就各散東西啦，有人要返香港，有人要返台灣，而我就繼續去重慶

第十天

去到旅程第10日，終於要離開成都，回程向香港方向前進；成都比我印象好好，地方乾淨﹑路人守秩序﹑成都人又helpful...有好多好多講唔晒既優點，比起好多地方住得舒服；可能我見識少，未去過好多地方，但成都真係覺得好正，唔知將來有冇機會再返來呢？

早餐再去對面鍾水餃，食返個最出名既抄手，真係好好食架


有好多野食選擇


係呢道住左咁多晚，走之前同貓貓影返張靚相先，上年見貓貓既時候仲係細細隻，今次見大隻左好多（都係細隻既時候好玩啲）

再見啦懶骨頭


坐地鐵去成都火車東站；成都地鐵仲係好新，車箱好光猛好乾淨，上年成都地鐵只係得一條線，今年已經有兩條，希望快啲有新線通車咁就唔洗再迫巴士塞車啦

重慶 I'm coming！！

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：N/A

是次消費：N/A

共0人比"掂"

林公子於2014-11-13 01:46:41 留言
環境都唔錯喎
舉報回覆
No.1

stellaluk 於2014-11-13 07:05:27 留言
辣豆腐花未試過，但都唔想試，咭咭咭！
舉報回覆
No.2

小龍於2014-11-13 11:34:22 留言
幾好喎，食丁丁糖有得睇表演，食碗麵又有表演睇
舉報回覆
No.3

特搜總編E 於2014-11-13 18:06:05 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.4

1874飛飛於2014-11-14 09:50:52 留言
引用自 '平凡人' 的相片：
回覆：比日間的喧鬧好好多!
舉報回覆
No.5

大牧羊仔仔於2014-11-14 23:04:22 留言
好喜歡古鎮美
舉報回覆
No.6

平凡人於2014-11-20 11:12:35 留言
原文由林公子於 2014-11-13 01:46:41 發表
環境都唔錯喎

人少啲環境都靚啲
舉報回覆
No.7

平凡人於2014-11-20 11:13:19 留言
原文由 stellaluk 於 2014-11-13 07:05:27 發表
辣豆腐花未試過，但都唔想試，咭咭咭！

都係香港既豆腐花好食好多
舉報回覆
No.8

平凡人於2014-11-20 11:14:33 留言
原文由小龍於 2014-11-13 11:34:22 發表
幾好喎，食丁丁糖有得睇表演，食碗麵又有表演睇

有得睇有得食，呢啲都係香港見唔到架
舉報回覆
No.9

平凡人於2014-11-20 11:15:05 留言
原文由特搜總編E 於 2014-11-13 18:06:05 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

thanks
舉報回覆
No.10