曾經晌觀塘打過幾年工，有一班以前晌製衣廠做過嘅老友，我哋久唔久都出嚟食餐飯、聚一聚，由於當中大部份人都住晌九龍東或港島東，為就大家方便好多時候都揀嚟觀塘搞局，每次都有有心人負責搵地方，小弟次次都喺坐享其成，今次晌「漢和韓國料理」嘅飯局，亦無例外，多謝晒Pammy姐！
漢和韓國料理都有數間分店，分佈晌唔少搵食旺區，如銅鑼灣、旺角、荃灣、觀塘等等。因為舊同事話晌度食過唔少次，有晒攻略，佢話最抵就星期六、日嚟食晏，任燒、任食、任飲，由11:30am食到4:00pm，都只喺$118+10%。其實夜晚都唔貴，不過，有時限，食得無咁輕鬆。此外，唔喺咁大食，又或唔想花咁多錢，仲有啲午市精選韓式定食，$40-$72，包前菜、餐湯，另加$5多杯餐飲。
環境裝修比較摩登闊落，而且乾淨企理。每張枱都裝入嵌入式韓式烤鍋，由於烤鍋採用下抽式抽風，爐邊已有抽風位，所以，一來唔太煙，二來成個場都唔覺太大朕油煙味。
近門口就架設幾組食物枱，食物放得琳瑯滿目，有生有熟，等小弟逐組介紹有咩好選擇。
最近門口一排，一邊放有韓式前菜、沙律吧，另一邊放有甜品及生果，一頭一尾喺糖水及雪糕。
韓式前菜有唔少選擇，如蘿蔔、芽菜、白菜仔、木耳、泡菜、青瓜、菠菜、銀魚仔……等等，味道又醃得唔錯，尤其啲蘿蔔、芽菜、木耳、泡菜，真喺似模似樣。
沙律吧其實可以唔使理佢，因為一望就知大都喺罐頭或現成貨色，粟米粒、紅腰豆、菠蘿、提子乾，不過，小弟一向喜歡餐前食啲沙律開開胃，所以先裝一小兜過過場。生果類，有橙、西瓜、火龍果，雖則唔喺咩貴嘢，但點都叫做有得揀，況且幾款生果都喺屬於多汁類，餐後食番幾件，既健康，又解吓渴。至於甜品，就留番文末先講。
中間一排全部都喺熟食，包括中湯、碗仔翅、煎炸小食、熱葷、炒粉麵……，數數吓都有成十多款。韓燒點都要啲時間燒先有得食，依一大堆熟食最好就喺攝吓時間，不過，估唔到又意外地唔錯喎。有咩食，概略記一記，炒菜、炒飯、炸三文魚腩、煎餃子、多春魚、泡菜煎餅、炒麵、炸魚皮、椒鹽鮮魷、炸薯條、豬腳薑、炸饅頭……等等，不過咁講，太飽肚嘅嘢我哋就無拎，都喺夾啲小食過過口癮。
而最入一排，有啲壽司卷，不過，似乎無乜人吼，聽舊同事講，夜晚仲有三文魚刺身添。中間位就放有豆漿及酸梅湯，任斟任飲；到最左一邊，就喺所有韓燒生肉，一共廿多盤食物，陣容鼎盛，盆盆都放到滿，其後見佢哋亦補充得快，缺貨情況較少。當中同一款肉類都有幾隻味道，小弟就唔逐樣講，總之雞牛豬羊唔少得，腸仔、紅腸、芝士腸、龍脷柳、魷魚……及一啲蔬果，相信可以滿足到一班食肉獸。
朋友對依類韓燒好有心得，教我哋用個洋蔥搽搽塊鐵塊，令食物帶多點香蔥味，又可以用嚟墊起燒好嘅食物，唔使等啲肉燒到過火變得又韌又乾，當然，最後個洋蔥喺唔會食啦！而且，燒之前記得加啲油，燒到咁上下亦可要求換板。
為咗食得無咁熱氣，小弟就愛搵啲生菜包住啲烤肉食，有時加啲燒蔬果，如冬菇、茄子，又或加啲前菜，如芽菜、木耳，令食起嚟無咁熱氣之餘，味道又多份層次啲。
一向食自助餐或放題，去到甜品環節，都會大殺四方，不過，最可惜只喺當日小弟抱恙，未有發揮正常食力。烤肉已經唔敢食太多，甜品亦都如是。之但喺，依度嘅甜品亦唔好抱太大期望。啫喱糖、桂花糕、椰汁糕、芒果布甸、豆沙窩餅、煎堆仔、豆腐花、雪糕，小弟最後清清哋食碗豆腐花，依個喺舊同事推介，超滑，又真喺幾得喎。
講咗咁多，都喺收百零蚊，喺咪超抵食呢？噓寒問暖真喺無講錯，自離開製衣廠十多廿年，大家都好有心。噓寒，呼出熱氣叫人覺得溫暖，雖然唔喺常見常談，但仍然感受到一份彼此嘅關心。
個人評分
味道：8/10
環境：7/10
服務：8/10
抵食：6/10
平均每人消費：HK$130
餐廳資料：
漢和韓國料理 Hon Wo Korean Restaurant
觀塘觀塘道414號ONE PACIFIC CENTRE 9樓
3109 7428
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
7
漢和韓國料理 Hon Wo Korean Restaurant：噓韓問暖
好食懶做（地區分類）
漢和韓國料理 Hon Wo Korean Restaurant (觀塘分店)
首首.韓式小館
T.O.P.商場地庫
Kim's Spoon (九龍灣MegaBox店)
Cobo House
韓牛韓式燒烤
Angry Oppa Restaurant & Bar
Mad for Garlic(又一城)