探險家攻略 > 城中探秘 / 旅遊 > 特色景點 / 古蹟 / 長線旅遊 > 山城重慶

山城重慶

由平凡人於 2014-11-20 11:00:00 發表 | 累積瀏覽 503

分類：長線旅遊特色景點古蹟；地區：中國

< 成都﹑九寨溝﹑重慶12天遊 >

第十天(續)

又再次離開成都，今日一別，不知何時再回來......
一路向東走，去到成都火車東站，一個好新好大既火車站；好彩售票處唔多人排隊，成功買到下班開去重慶既火車票

仲有少少時間，去KFC坐低休息一下，KFC野食真係唔平，貴到我都唔捨得係道買野食，車程又唔係耐去到重慶先再作打算

平時買都係買最平既車票，難得今次想舒服少少買一等座，竟然咁好彩買左個倒頭位返來...成程就係咁望住對面，仲要頂腳，下次都係買返二等位冇咁嬲，仲可以坐得舒服啲

大約兩個鐘去到重慶火車北站，行出去就有地鐵站上地鐵

車長個名好有霸氣


其實呢道既鐵路唔係叫地鐵，叫輕軌先岩，由火車站/機場坐輕軌就可以出到市區，睇落去同我地坐開既地鐵有分別？

呢條輕軌三號線係單軌列車，睇落去又幾得意，我都係第一次坐呢D大型單軌鐵路；重慶輕軌有單軌列車，亦都有大家平時坐開既普通列車，因為重慶山多路又窄，輕軌比我地平時搭開既鐵路更適合係山中間穿梭，而速度都唔慢，同香港地鐵一樣行到80km/h

重慶成個城市好多地方都建築係山上，有山城稱號，所以輕軌都要起到咁高


下面輕軌二號線都係單軌列車，行落去轉車需要啲時間


二號線車箱，感覺上比普通地鐵細部少少


坐輕軌好方便就可以去到重慶最旺既地方解放碑；解放碑附近咩都有，食既買既應有盡有，當然仲有好多重慶最出名既重慶美女啦，哈哈^^來到解放碑都夜啦，先去搵野食，解放碑旁邊一條食街有好多選擇

街上面有小食店，好多人好熱鬧


地下都有好大既food court，係道食左個好正既小籠包，終於唔洗再食四川既辣野啦，食左咁多日就算有幾鐘意食都食到怕



食飽行去坐長江索道，行過去都唔係好遠，大約15分鐘就到；以前重慶有兩條纜車線：嘉陵江索道&長江索道，但自從有左天橋之後搭纜車過河既人已經越來越少，嘉陵江索道係上年已經挨唔住結束經營，而家只係得返長江索道；但...去到見到門都冇開？問旁邊士多既人話今日索道唔開？究竟係咩時候先會開架？

唉...唯有繼續向山下行，行落去朝天門碼頭


一路行既時候見到天上有好多發光UFO物體，原則係有人放風箏；朝天門呢道好多人放風箏，而且放既唔係我地普通玩既風箏，而係專業風箏，厲害！

工具都好專業


朝天門碼頭曾經係重慶十七座古城門之一，嘉陵江、長江係呢道匯合，左邊嘉陵江，右邊係長江



朝天門曾經係重慶歷史上一個重要地方，但而家除左係碼頭上船同望下風景之外都冇咩特別，影完相就走lu

由朝天門去解放碑唔係好遠，不過行路既話就要行上山，所以都係搭車比較舒服；重慶夜晚比較難找車，而且好多巴士好早已經開出左尾班車，都唔知搭咩車好；幾經辛苦係總站上左部仲會開出既車，重慶巴士唔似成都咁靚，部部都好殘舊，好有90年代feel，而且部車入面唔會開燈，黑到睇唔到野；幾個站就去到洪崖洞落車

洪崖洞建築係懸崖上面，由下面向上望既話應該壯觀好多


仲有中學時期最愛既沙爹王


重慶有名叫山城，好多人去到會覺得D建築起係山上面好特別，不過香港其實又係一樣好多地方都係山，我諗山城風景對香港人黎講應該冇咩吸引力？我自己都住係山上面啦，哈哈

洪崖洞對出嘉陵江江面


慢慢行又行到返去解放碑

解放碑附近好多食店都已經關門啦，想再食都冇得再係lu，唯有明天再試啦