探險家攻略 > 城中探秘 / 美食之旅 / 旅遊 > 特色景點 / 古蹟 / 其他 / 長線旅遊 > 重慶古鎮。磁器口古鎮

重慶古鎮。磁器口古鎮

由平凡人於 2014-11-22 08:40:00 發表 | 累積瀏覽 688

分類：長線旅遊其他特色景點古蹟；地區：中國

< 成都﹑九寨溝﹑重慶12天遊 >

第十一天

前一個晚上終於買好左機票，明天可以返屋企啦^^今日仲有一日時間係重慶，雖然少就少左啲，不過唔緊要，原本都冇諗過去重慶，對重慶冇任何特別期望，今次來到算見識過重慶已經好滿足啦^^今日仲有一日時間要好好珍惜，去一個重慶我最有興趣既地方--磁器口古鎮


明天好早就要離開重慶，今日要爭取時間早啲出去玩啦，一早就去KFC食早餐

而家KFC好似比以前貴左好多，記得對上一次係KFC食早餐，一碗粥+豆漿先係¥6，今次見已經係¥9，貴左50%咁多！唔知係唔係唔同地區唔同價錢呢？

唔小心係塊鏡影到旁邊既重慶美女tim，sorry

食飽就要行去地鐵站，坐車去磁器口古鎮；重慶係一個大城市，有好多高樓大廈

地鐵站旁邊除左好多高樓大廈之外，仲有好多依山而建既舊樓，估唔到係市中心都仲有咁多舊式建築



地鐵站口仲有好多人擺地攤，主要係賣寵物；另外就係好多人放部電腦係道幫人下載野，咁都可以做生意？

坐輕軌一號線去磁器口，不過當時磁器口站仲未起好，只可以坐到去總站沙坪壩落車（磁器口站好似已經通左車啦）

一號線係真既地鐵，唔係單軌列車

出左沙坪壩站就有好多巴士去磁器口，不過唔洗心急既，先係巴士站旁邊食少少野

坐巴士由呢道去磁器口，大約20分鐘就到，都算方便


落左車就可以見到磁器口古鎮啦


「磁器口古鎮原名叫「白岩場」，因白岩寺而得名。明朝建文帝朱允炆被其四叔朱棣篡位後，逃出皇宮流落巴蜀時，曾在白岩山上的寶輪寺隱匿達四、五年之久。因此，後來世人將寶輪寺易名龍隱寺，所在白岩場也改稱龍隱鎮。清朝時候龍隱鎮一帶陶瓷業的發展，瓷器在很長一段時間裡成為龍隱鎮的主要產業，盛極一時。後來就將龍隱鎮改名為「瓷器口」。因瓷、磁同音，鎮名被訛傳為「磁器口」，並從此叫「磁器口」。」

嘩...呢道真係多人到爆，入口條路已經窄，要迫過好多人先入到去


呢道都有雪梨茶，黃龍溪古鎮都有好多

入到去向右轉就係磁器口古鎮大街，一樣係人山人海，呢道真係好受歡迎


呢位大叔係道整咩呢？

佢又整咩呢？原來係整酸辣粉，真係估唔到


古鎮有好多唔同既特色小食，好多人賣呢種糖，整得好靚丫！以前係南京曾經食過，睇落係好得意架，不過全舊都係糖好甜

龍鬚糖唔係香港先有既咩？去到咁遠既地方都可以食到，5蚊盒好抵


又有酸梅湯

呢個係咩黎既呢？原來係煮緊薑糖！

呢個印度人個個去都影佢，我都要學下大家影一影先

而家就好似置身於古代之中（古代冇咁多人掛？）

突然發現呢個地方好多人排隊，有咩好野呢？

原來係磁器口古鎮最出名既陳麻花，未到磁器口都聽過陳麻花呢個大名；陳麻花有10個唔同口味：原味、黑芝麻、椒鹽、黑米、玉米、冰糖糯米、麻辣、海苔、巧克力、蜂蜜，咁多選擇唔怪得咁受人歡迎



行前少少又有另一間陳麻花，又係有好多人排隊，但就冇之前個間咁多，唔通呢間係假？定兩間都係真既呢？

試食過味道都唔錯，不過就唔買啦，拎到返屋企變林晒就未必好食lu

磁器口古鎮大街景色，呢道既建築風格感覺上同其他古鎮好唔同，但我又講唔出有啲咩唔同，唔知大家係唔係都有呢種感覺？

行到去大街盡頭就係嘉陵江江邊，即係當年磁器口最重要既地方，而家碼頭冇左昔日繁忙既景象，但風景依然咁靚



嘉陵江

碼頭上冇搬貨既工人，都冇好多上船既乘客，有係就係好多食店同大量食客，而家既碼頭仲係碼頭？

呢道都有好多人放風箏，重慶人好似都好喜歡風箏？

如果覺得磁器口太多人﹑太商業化，只要係碼頭旁邊隨意轉入一條小巷，眼前既感覺即刻180度轉變；後面係熙來攘往既大街，前面係真正古色古香既民居，呢到見到既絕大多數都唔係遊客，而係住係磁器口既居民，建築更加有種原始味道，比起出面既大街我覺得呢道更加可以令人認識磁器口呢個古鎮



係小巷入面行下買下野，同當地人傾下計，不知不覺又返到出大街，好快又出到去大街既入口；之前我係向右轉，今次就去左邊既地方，雖然都係位於同一條大街之上，但一左一右係兩個完全唔同既環境；右邊係一條繁華既商業街，左邊係一個好少遊客到既地方，呢道冇咩鋪頭，冇咩遊人，見到既係好多老人家坐係自己屋企門口，或者成班聚集傾計；有時都唔係好明，只係轉左轉右就有咁大分別？大家寧願去同人迫，都唔去認識一下真正既古鎮，諗諗下都覺得奇怪（都係唔好話人我都係其中一個）

老麻炒手？第一次聽呢個名唔知係咩呢？

又係好多串燒丫

有好靚既綿花糖，呢樣香港應該仲未有？

仲有可愛既小貓

天開始黑，差唔多要離開古鎮啦；見到有得畫名咁得意又試下先，順便同呢個書法家傾下計，佢好羨慕香港有咁好既天氣，話重慶經常大霧，好難先可以見到太陽，仲問我點解要去重慶呢個鬼地方？（我點答好呢？）見議我去青島海南島會靚好多；去左成都重慶咁多日，又真係未正式見過太陽



天都黑晒啦真係要離開磁器口lu，係古鎮對出一間便利店竟然發現維他菊花茶，仲要係香港製造既香港版本，究竟係點運到去咁遠？即刻買返支飲下先，由味道推測呢枝應該係真野



坐巴士返到沙坪壩地鐵站，沙坪壩站對上係三峽廣場，又係一條好多人既步行街，我對步行街冇興趣唔行lu

坐地鐵返去解放碑，正常係好似去程咁坐一號線就可以返到去，但我想睇下風景所以專登兜二號線，睇下重慶夜景都唔錯

二號線沿嘉陵江邊行，可以望到對岸風景


又返到去解放碑啦

琴日食小籠包食上癮，又去返食小籠包，真係好好食


再試下重慶特產山城小湯圓，甜甜地好好食（其實即係豆沙湯圓）

去到重慶就緊係要食正宗重慶酸辣粉，呢間李純恩都鐘意食架


未食已經知道會好辣所以叫小辣比較穩陣，不過都係低估左小辣既威力，都係一樣辣到噴火，不過比起香港既酸辣粉呢個好食好多，仲辣得好過癮！

食飽係解放碑隨意影下相，已經好夜啦都仲係咁多人

明天終於可以返香港啦，好野

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：N/A

是次消費：N/A

共0人比"掂"

EEChan 於2014-11-22 13:39:56 留言
重慶現在己經有地鐵想當年我和朋友們在重慶市中心被一群人圉著，當怪獸看，他們對我地的相機最有興
舉報回覆
No.1

stellaluk 於2014-11-23 07:24:10 留言
以前內地各鄉美食都很吸引我，現在太多黑心食物充斥，已經減弱興趣，合心意會小小淺嘗
舉報回覆
No.2

炯仔的天空於2014-11-23 10:45:35 留言
nice trip
舉報回覆
No.3

平凡人於2014-11-24 01:04:33 留言
原文由 EEChan 於 2014-11-22 13:39:56 發表
重慶現在己經有地鐵想當年我和朋友們在重慶市中心被一群人圉著，當怪獸看，他們對我地的相機最有興

有好多條地鐵線啦連相機都咁引人注目，應該係好多年前既事
舉報回覆
No.4

平凡人於2014-11-24 01:10:48 留言
原文由 stellaluk 於 2014-11-23 07:24:10 發表
以前內地各鄉美食都很吸引我，現在太多黑心食物充斥，已經減弱興趣，合心意會小小淺嘗

試少少就好啦琴日有位內地朋友來香港搵我，佢都話而家都唔敢係街上亂食野，太多問題食物出現個個都怕
舉報回覆
No.5

平凡人於2014-11-24 01:11:10 留言
原文由炯仔的天空於 2014-11-23 10:45:35 發表
nice trip

多謝
舉報回覆
No.6

EEChan 於2014-11-24 14:28:40 留言
原文由平凡人於 2014-11-24 01:04:33 發表
有好多條地鐵線啦連相機都咁引人注目，應該係好多年前既事

係八十年代初呀
舉報回覆
No.7

特搜總編E 於2014-11-24 16:19:20 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.8

平凡人於2014-11-28 01:01:39 留言
原文由 EEChan 於 2014-11-24 14:28:40 發表
係八十年代初呀

仲未出世呢，哈哈
舉報回覆
No.9

平凡人於2014-11-28 01:02:04 留言
原文由特搜總編E 於 2014-11-24 16:19:20 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.10