晚飯@平昌韓國餐廳~

這篇真係新鮮熱辣的食評, 因為呢間食店新開張, 連Openrice都未有介紹, 優惠暫時至11月30日, 如果睇完呢篇食評, 大家有興趣一試的就要快一點了~~

昨天去了尖沙咀同佐郭交界辦點事, 之後和老公來來回回在看究竟吃什麼好......去到莊士倫敦廣場樓下, 看了那些餐廳單張, 見到呢間韓國餐廳好似價錢合理, 於是就上了5樓~

當時客人不多, 可能因為是新店開張~ 自己想食韓燒, 不過老公怕熱氣, 結果叫了3個菜式, 就坐喺度等~ 其他客大多都是吃韓燒的~


先來了6小碟前菜~~ 之前去其他韓式餐廳, 前菜都係普通, 點知呢幾碟雖然份量唔算好多, 但部份味道唔錯~~ 最前那個是蕃薯蓉, 插了一塊蓮藕片和有些杏片, 整得很好食~~ 最後的那碟魚絲都唔錯 (不過唔係好影到)~ 最後排仲有一份芝麻醬蓮藕片, 蓮藕片幾爽, 不過如果芝麻味濃一點就更好食~~





吃完前菜, 等了幾乎20分鐘, 終於有另一碟, 就是晚市附送的薄PIZZA~~~ 雖然份量不多, 不過有奶油、芝士及杏仁的香氣, 而且脆脆的, 味道唔錯~~


之後又等了20分鐘都未有其他食物......雖然係有點不快, 不過我們都係慢性子, 都係等到咁上下先出聲......一講完冇耐, 侍應就送上牛肋骨~~

之前曾經去過"秀", 覺得它的牛肋骨味道麻麻, 但今次呢份好食得多, 起碼上枱時熱辣辣, 而且牛肉煮得幾"淋", 醬汁味道幾好, 配埋白蘿蔔同紅蘿蔔一齊食幾好味~ 份量都幾多, 大家食完都開始有點飽~~


呢個時候, 有侍應再走來, 話知道我們的菜式遲來, 所以送了2罐汽水, 又話如果我們想再吃前菜都冇問題, 於是又即刻請我們食多6小碟~~ 可能我們慣咗去食飯係"逆來順受", 追完侍應有嘢食就算, 估唔到他們即刻"補鑊", 可能因為是新店, 希望給顧客一個好印象吧~~


之後就來了芝士炒年糕~~ 愛辣的朋友一定幾鍾意, 因為幾辣, 吃了幾舊已經不停飲茶~~ 另外就開始愈來愈飽~~


當初點菜時, 以為叫3樣餸應該唔會好飽, 點知超出預算......於是最後來的韓式便當真係一口都幾乎吃不下, 食咗隻蛋, 我們就決定打包了~ 侍應又好快手拎了膠盒給我們~ 後來喺屋企食埋, 味道都合格, 因為其實都係韓式午餐肉+泡菜, 冇咩新鮮~~


不過一看到個外賣袋, 又覺得好得意, 因為個袋可以裝幾盒外賣, 大過張A4紙, 可能想客人take away時順便宣傳一下~~ 順手將2罐汽水都拎番屋企~~

原本成餐晚餐價錢要3百幾蚊, 不過有新店優惠, 有7折, 減了100蚊, 2百多元埋單, 價錢感覺上合理一點~~

其實侍應的服務有點生手, 而且他們都是韓國人或留學生, 一係講韓文, 一係講普通話或英文, 溝通上要多一點耐性, 但服務都算耐心, 例如不時幫我們加茶, 而且有一兩個韓藉侍應都似明星架~~ 臨走坐電梯, 韓藉老板都同我們講byebye, 感覺上都覺得唔錯~

所以, 如果大家想用新店優惠, 又有興趣試吓正宗韓菜, 又唔想食飯等位, 可以考慮一下這間食店呀~~

============================================

感謝 helenhlblog 提供以上資料

helenhlblog的網誌: http://helenhlblog.blogspot.hk/

============================================