湊女呢幾年來, 媽媽o既私人時間真係買少見少,
想去做 Facial 都抽唔到時間, 搽指甲油都冇時間呀陰功
夜晚約朋友食飯都一定要搵公公婆婆幫手安頓好小齊先好諗
每日放工都即刻飛撲返屋企,
想做自己o野就要等小齊瞓左先...
小齊唔算早瞓, 平均都10點,
放工返屋企後想專注 d 陪佢, 要返工剩返見佢o既時間實在唔多
想做自己o野媽媽要陪佢瞓左後靜靜雞起返身...
其實夜媽媽都冇乜o野好做, 都係敷下paper mask, 煲下劇, 睇下書, 玩下ipad
但點都要搵 d 私人o野做下先安樂
又返工又湊女都幾疲憊, 但如果連少少自由時間輕鬆下都冇就太慘喇
有時唔駛多o既, 10分鐘都好, o係冇干擾o既情況下relax下充充電
煲劇時間都好寶貴,
所以點會浪費o係o的膠劇度?! 睇睇下唔掂都會即棄
韓/美/陸/台劇我都會睇 (雖然唔多)
而家可以睇 hktv 港劇添啦, 暫時睇左1集選戰同2集警界線都唔錯, 應該會繼續睇
近排 tbb 播蘭陵王, 我之前已睇左而家借返書o黎重溫一下,
我都算快, 2晚又睇晒本書了
![]()
呢兩晚聽返蘭陵王主題曲真係好啱feel~~
"當一份真相 隻手能隱藏 直到人們遺忘
寫一頁莽撞 我們的篇章 曾經如此輝煌...
忘不記 原不諒 憤恨無疆 肅不清 除不盡 魑魅魍魎
幼無糧 民無房 誰在分贓 千年後 你我都 仍被豢養"
好想玩 scrapbook 不過時間唔多夠, 用Apps 整住先,
讚讚 Martha Stewart 個 Apps, 幾好用,
整 scrapbook 前可以用o黎起起稿
另外我仲想試下玩 paper quilling, 諗住淘d 工具o黎試下
以前時間自由想做乜就做乜, 想買乜就買乜,
而家好多o野都要以個女行先,
但係我又冇後悔, 小齊帶比我o既快樂太多了,
媽媽都好甘心為佢犧牲自己o既私人時間同自由
冇辦法, 唯有瞓少o的
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
