探險家攻略 > 休閒玩樂 / 城中探秘 / 旅遊 > 郊遊 / 特色景點 / 長線旅遊 > 龍脊梯田﹑陽朔4天遊

龍脊梯田﹑陽朔4天遊

由平凡人於 2014-12-08 13:20:00 發表 | 累積瀏覽 1017

分類：長線旅遊特色景點郊遊；地區：中國

攻略日期：2013-05-16

是次消費：每人平均約HK$ 1000.00

< 龍脊梯田﹑陽朔4天遊 >

平時見到既田大多數都位於平地，易於耕種；但中國西南地方好似廣西﹑貴州等等，好多地方都係高山，平地少，農民就要係山上開闢梯田耕種，所以呢啲地方四周圍都可以發現梯田，以前同一大班朋友去過貴州加榜梯田，而今次就唔去貴州，去左比較近香港既廣西龍脊梯田，龍脊因為梯田規模大，梯田又多又高，係廣西比較罕見，所以就有「世界梯田之冠」稱號；龍脊梯田最靚既時候係春天放水同中秋金黃色時間，但好可惜今次去早左十日，所以見唔到最靚既灌水梯田，最靚時間應該農歷四月十五之後，梯田會放滿水，今次有小小美中不足...

龍脊梯田﹑陽朔4日半行程：
Day 1：香港 - 廣州 - 桂林 (住宿：火車上)
Day 2：桂林 - 龍脊梯田                (住宿：龍脊美景樓)
Day 3：龍脊梯田 - 桂林 - 陽朔         (住宿：陽朔花滿樓青年旅舍)
Day 4：陽朔 - 興坪古鎮 - 陽朔 - 深圳  (住宿：巴士上)
第五天上午順利返到香港

16/5/2013

第一天

旅程由廣州火車站出發，先坐火車到桂林，再轉車到龍脊；點解會由廣州上車而唔係深圳上車呢？因為深圳開車既時間唔太方便，5點半開車，放工就一定趕唔到，與其都要用一日假期不如早啲去廣州行山食下野仲好啦，所以一早就去左廣州，最後都係搭返深圳開出個班車

有人話廣州火車站係中國最危險既地方，係唔係最危險就冇去深入研究，只係覺得呢道係我見過既最污漕﹑最混亂既火車站，人又多空間細，垃圾一地都係

乘坐既K952列車由深圳開出，但未上車就delay，估唔到佢只係第一個站就可以遲咁多，傳聞話係因為粵北大雨影響，當日經廣州北上既列車全部都delay幾個鐘，又會咁唔好彩既...

原以為遲個半鐘都算啦，個個排隊時又突然轉牌要遲兩個幾鐘，明天早上仲要趕下班車架


其實係廣州火車站排隊係完全冇用，排第一只會令你最遲上車，因為上車要由候車室後面行返去中間大堂，好彩發現左呢樣野，唔去同人迫lu，企係後面等上車仲好

今次見好耐未試過就坐硬座，十幾個鐘時間又唔係長，所以就硬座一下；當然硬座冇床位咁舒服，而且仲十分迫，坐係道都會頂腳，不過勝在夠平，廣州去桂林只係115蚊，而且仲見到好多唔同既訓覺方法，有坐係地下訓，有趴係道訓，有捐入椅套訓...一次難得既體驗；夜晚每個鐘都會醒一次，每次望到個時間，心諗：咁耐都仲未天光架...

第二天

最後十一點半先去到桂林，比原定時間遲左4個鐘，已經上唔到九點開去龍脊既車，唯有坐下一班車啦...一朝早部車仲係湖南飄緊時已經打電話改巴士時間，但為時已晚，下一班車已經冇位，但冇計都要上



落車後先找地方食午餐，來到桂林就緊係食我最鐘意既桂林米粉，4.5一碗


食飽再返去火車站出面，上美景樓提供開去龍脊既直達車


坐呢啲由旅館提供既車雖然要50蚊比坐巴士貴，但比巴士方便好多；如果坐普通巴士，要先去汽車站坐開去龍勝既車，去到龍脊路口再轉車入梯田，今次已經冇咩時間玩啦，唔轉來轉去lu

一早都知部車full左，我就係坐係司機位後面個塊紅色野上面，坐足3個鐘


條路好爛拋到暈

去到梯田啦
龍脊梯田主要分3部份，大寨梯田、平安寨梯田、古壯寨梯田；而我今次去既就係大寨金坑梯田，門票大寨+平安寨80元

一落車就會有好多瑤族婦女幫手背行李上山，我當然冇咁做啦，一個後生仔請aunite背行李會比人笑架？龍脊瑤族屬於紅瑤，瑤族其一個分枝，紅瑤最易認就係佢地鐘意著紅色民族服飾

新整左纜車上最高既金佛頂...

另一邊既平安寨係壯族梯田，因為比較早發展，好多旅行團都會去，所以平安寨比較多人同商業化；而呢道大寨係瑤族梯田，比平安寨更深入山中，去既人冇平安寨咁多(而家有纜車好難講)，而且大寨梯田比平安寨更多更壯觀

用作山上運輸既馬


跟隨當地人上入住既美景樓，佢地幫人背行李上山，收費大約30-40，辛苦晒


首先去到最低既大寨，有食﹑住既地方，不過來到呢道冇理由住係山腳既


一個外國人踩單車來到，係車上都見到佢估唔到咁快就追上我地，第二日又見到佢踩返去桂林，勁！！

全個山都係梯田，梯田自當地小數民族搬入開始，由元朝一路起到清朝，終於變成今日既樣子，垂直落差有500米，其實唔好話耕田，只係行上去我都覺辛苦



今日天氣唔好，灰朦朦一片，又好大舊雲


因為梯田未放水，冇陽光又灰朦朦，睇落唔係咁靚

不斷向上行，上到另一個村寨，平時懶少做運動，有啲辛苦


望上山見到住既客棧，真係好高，有排行

有少少慶幸唔係住全景樓，因為佢係最高


呢道好興竹筒飯，見到都想食，但要趕路，有得睇冇得食

呢道耕田又危險又辛苦，唔小心差錯腳就可能...

上到中間既田頭寨，有YHA可以住

要繼續努力向上行，越行越高


行左一個鐘，終於望見美景樓，即刻衝上去休息一下


突然，山上開始起霧

上到來都接近六點，先放低行李，順便叫定今晚飯餸；唔知點解check in時完全唔洗我地出示證件，又唔洗先交房費同按金，就咁比條鎖匙我地就入住，真係第一次，竟然咁信我地唔怕走數？

放低行李，出來見到咁，唉...好大霧咩都見唔到

出去向山上方向行下，霧時大時細，不過都係唔清楚架啦


狗仔腳印好得意

回望美景樓

最新最靚既全景樓

如果梯田放左水既話會靚100倍


去到一號觀景台--西山韶樂，望落去本應係好高好壯觀既梯田，不過而家就咩都見唔到，冇計啦太大霧，寄望明天有好天氣，希望在明天丫ma

都冇野睇，落山返去食晚餐啦


行落啲又少啲霧，咁奇怪既？

品嚐一餐豐富晚餐，上山上得咁辛苦，緊係要食好啲
山上面既野預左比較貴，所以都冇計較價錢，最重要係食得開心；土雞一隻分開煮兩個餸，108蚊，又滑又好食~

竹筍炒臘肉，50蚊

炒菜二十幾蚊

竹筒飯20蚊一筒，等左你好耐啦

辛苦左一日，慢慢享受一餐豐富晚餐，3個人都食得好飽；唔知點解老闆娘又係唔收我地錢住，話明天先一次過比，但又見到其他人要比錢bor，都唔知點算好呢？

食飽行出門外，冇晒霧視野好清晰，估唔到夜晚先散霧；最右手最高個間就係全景樓，好慶幸冇揀住佢，行都行餐飽，旁邊既唔記得係唔係觀景樓，而最左既係萬景樓；原本開頭係揀左住萬景樓，但咁岩佢冇晒三人房，所以就住左係呢道美景樓，美景樓都唔錯啦

138蚊既三人房，平靚正，廁所都算清潔，最重要係有座廁，花灑又夠力


香港有30度，但呢道好清涼，雖然冇冷氣，但涼到好似開左冷氣咁，蓋住綿被訓好舒服


住既呢間房好特別，係一個緊急出口，廁所有門口可以直接出到去客棧後面，走左都冇人知，當然我唔會咁做啦，哈哈^^

未來到既時候仲以為山上住宿會比較簡陋，但又唔係bor，住係呢道好舒服，床﹑被鋪等等都好滿意，完全係出乎意料，今次真係冇揀錯住呢道