30 NOVEMBER 2014(SUN)
每逄節日將至科學園都會舉行啲親子工作坊，等大家可以玩吓開心吓。
小小豬真係好幸運，因為可以再一次得到科學園邀請，參加『探索科學‧樂趣坊』，迎接聖誕節呀~
我地早左少少去到科學園，所以就周圍行吓，原來附近有一個市集，有好多唔同種類嘅物品出售，大多都係DIY物品嚟呀~
八卦完之後，我地就去匯合公關姐姐，開始今日嘅聖誕科學探究之旅啦！
我地第一個活動 - 生物能源車，其實上兩次嚟整模型時，小小豬都好似係好專心，但其實佢就唔太熱衷。不過今次就好唔同，小小豬全程都非常合作，當然啦...因為係整佢至愛嘅車仔嘛！
小小豬一開頭都好似好苦惱咁哦，因為未見車型，只見一大堆模型~
當然，依個重任就交俾大肥豬負責，睇佢兩父子幾俾心機去砌車仔~
哈哈哈...原來一部少少嘅車仔都幾考人砌，最後都要由導師出馬先可以完成呀~
車仔係以鹽水作為動力，所以加啲鹽水就可以行啦~
開車啦...又真係估唔到簡簡單單嘅鹽水都可以做推動能量，好利害呀~
之後我地就去參加第二個活動 - 指紋奧秘，其實就係用兩種唔同方式嚟將指紋印係張紙上面。其實依個活動原意小小豬就應該唔太明白，不過有得印手指仔，佢都好樂意參與！
首先就用油、爽身粉同膠紙印個手指係膠紙上面，依個就難度高少少，所以全程負責姐姐都好有耐性咁幫小小豬~
另一種就係用印章印，對小小豬嚟講就完全冇難度啦~
雖然印得都唔算太清楚，不過都叫睇到啲啲，都做完成到啦~
之後我地就去整音樂聖誕卡，其實我開頭都以為係好簡單，不過原來一啲都唔易，因為對唔正個位，音樂發聲器就唔會開動呀~
整左好耐我個音樂器先識發聲，之後工作就交俾小小豬，因為佢話要負責寫聖誕咭哦~
接住我地就去峙玩 - 搖滾叮噹叮，即係自己DIY整個結他仔。負責姐姐派薄結他仔板俾我地之後，就可以係上面自己設計圖案塗顏色。
小小豬當然係好專心咁塗鴉一番啦~
小小豬話佢係用左十種顏色嚟塗，所以係非常靚咁話哦~
最後用橡皮筋整埋個結他弦~
串埋條肩帶~
小小豬都不知幾鐘意，仲即席係邊彈邊唱歌添~
最後一個工作坊就係 - 聖誕卡卡頌，其實就係利用啲發泡膠粒粒設計聖誕咭。不過亦都因為小小豬太鐘意個小結他，所以佢係邊整邊彈邊唱歌嚟整~
個製成品就好似有少少HEA添...哈哈哈~
玩完依個工作坊之後，其實今日科學園為我地安排嘅活動都已經完結，餘下就係自由時間。依個時候當然就係去小小豬全日至期待嘅活動，就係去排隊玩彈彈床啦~
不過因為太多人，所以排隊工作就交俾大肥豬，我就同小小豬坐埋一旁休息。休息時嘅小小豬又嚟歌神上身咁，NON-STOP咁唱左成十幾分鐘歌，個傻仔仲吸引左幾位小朋友過嚟一齊唱，場面都有少少攪笑呀~
終於排到我地都可以玩彈彈床啦~
最後仲同其他小朋友一齊同汽球聖誕老人跑跑跳跳咁玩左一陣~
非常感謝科學園為我地三口子作的安排，開開心心又過左一個下午。
其實科學園定期都會舉行好多唔同種類嘅親子工作坊，大家有興趣的話可以多啲瀏覽佢地網址或者FACEBOOK專頁，就可以得到最新消息，下次可以係入面一齊玩啦！
More Information :
Website：http://www.hkstp.org/zh-HK/Recreation/Hong-Kong-Science-Park/Event-Calendar.aspx#.VIe_E2e3jhM
Facebook：https://www.facebook.com/HongKongSciencePark
其他博客區
※※ SINA ※※
※※ MyBB星級Blogger ※※
※※ She.com ※※
※※ WeShare ※※
※※ theZtyle ※※
※※ U-Blog ※※
※※ SeeWide ※※
※※ BlogSpot ※※
※※ BK Milk 親子語 ※※
