講緊小齊o既中文字,
媽媽覺得呢排真係寫得好左,
幾個月前都仲係手震震咁, 暑假時D功課教到我嘔血,
而家已經大為改善,
執筆姿勢同落筆位置都好左,
運筆呢就要媽媽o係身邊提一提會好d, 其他時間如o係學校就差d
總體o黎講係漸入佳境
由開學到而家 3個幾月, 學校星期一至四都有中文功課,
每日學一字, 星期五係工作紙 (相對簡單)
每星期都有最少 4版中文字要練習
有樣o野唔知應該讚個女定讚學校?
小齊除左功課其實都好起勁寫練習簿,
小齊話寫左比老師睇會級印仔, 寫晒成本有獎!
(試過未做晒功課就係咁寫練習簿!)
寫乜都得, 畫公仔又得,
朝早媽媽返工前會送小齊去婆婆度,
婆婆話佢成日一得閒就會拎本簿出o黎寫,
婆婆開頭仲好驚話佢將d 功課亂咁寫, 我話唔係功課o黎, 由佢~
如是者一日寫幾版, 2個星期左右就寫晒一本喇,
雖然我都唔知佢比左老師睇同拎左獎未?
但見佢做得咁起勁, 除左鼓勵下我都唔知仲有咩好做...哈哈~
"唔好做得咁辛苦喇小齊~"
中文功課呢, 我係睇得比較緊,
因為我好想小齊寫字靚,
寫字靚o既著數媽媽有好深體會,
記得中學作文時100分裡面有10分係字體/整潔分 (敗家媽媽通常有8, 9分)
我覺得橫掂都係寫咁多筆劃, 不如練靚手字, 攞盡呢d easy points
都唔駛提及整體比人o既印象分, 成篇文/essay 比人感覺"好似"言之有物左...
會考同A level 一o的用中文答o既科目, 我o既成績都比想像中好...
至於關唔關字體事就不得而知, 但好簡單o黎諗,
一個評卷員可能睇幾十份卷, 個個寫十幾廿版,
如果手字寫得曳, 隻隻字都要估下你寫乜, 忽高忽低咁, 真係睇到人金睛火眼~
此時, 突然遇到一份答卷字體娟秀, 文從字順, 點都會賞心悅目一o的, 比分鬆手o的都有可能咖
講返教小齊寫字,
除左寫得多, 反覆練習之外,
我覺得最重要其實係一開始寫要有人點撥下,
如果一開始寫得核突, 練o黎練去都係用核突o既方法寫, 咁寫得多都冇乜用
小齊始終年紀細, 對中文字o既審美觀有待建立,
落筆位置同埋d "輕吊"位要多多提點,
媽媽o既工作係提點到佢寫得似樣先由佢自己寫
(唔好睇少, 呢個工作其實好鬼難,
佢心情不爽時媽媽一出聲佢就會兩行眼淚...搞到我都唔知點咁)
同埋佢寫得好果陣要"拍手/眼神鼓勵"~
老師都會比2粒星星鼓勵, 小齊見有2粒星都會同媽媽報告的
而家小齊o的字雖然唔算靚, 但都叫整齊,
裝字o既o野慢慢再教, 等到適當時機媽媽再教小齊硬筆書法
漫漫長路...
是日靚衫: Burberry Children, Kenzo Kids
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
