功課奴隸

我都知而家好多小學都好多功課,

如果小朋友心散唔合作會好勞氣, 搞到三更半夜...

但做功課枱頭有個 TIMER 成日必必聲咁真係令人精神緊張囉

去廁所開大都要批準真係好CRAZY!

初小就養成呢種生活模式都幾慘, 自由時間以"分鐘"計算!! 去廁所都要催

阿媽又要長期坐o係身邊先做功課, 小朋友會唔會更加依賴左阿媽o既安排?


都唔知邊個天才話要小學轉全日制?! TSA 又要3年級考?

一, 二年級就要開始chur chur chur...

連初小比小朋友發下夢o既傻更更日子都要剥奪埋,

家長一句為左小朋友升中有好選擇就配合埋一齊"谷"

如果小朋友受谷都好o的, 唔受果d真係好似片中果個小朋友搞到自殺就好可悲



以前自己讀書果陣有時都覺得好多功課, 小學好多都係抄抄寫寫

冇乜營養但又好花時間o既"暴力作業"

但自己一定會分配好時間, 總會o係限期前做好,

因為我做完功課o既時間係"我o既", 係真正free time,

可能係睇下電視, 畫下畫, 瞓下覺 (不知幾爽)

咁樣我有動力去早日完成功課囉

但而家d 小朋友, 做完功課練琴, 練完琴溫書預習?! 我係佢都推得就推啦



學業係長途賽, 最緊要係自己緊張自己事, 阿媽o既角色應該係輔助

做完功課比佢睇, 有唔識做下一條等埋一次過問,

測驗考試幫手問下書, 課外知識再點撥一下

不過前提當然係小朋友都要有咁上下自發性,

比起做功課, 我覺得培養"自發"做功課更重要

至於點培養? 好難講, 睇小朋友個性,

對我家小齊o黎講, 上乘方法係讚, 下乘方法係講媽媽有幾失望..blah blah...

至於坐o係身邊一齊做, 呢個絕對唔係培養方法, 仲有相反效果

暫時除左中文功課我會睇佢寫幾個, 覺得ok 先離開之外,

其他我都放手由佢自己, 做完先一次過對,

我已經做左廿幾年功課, 冇理由要我又go through 一次~