以前都曾經晌食評講過，落吧、飲酒一向都唔喺小弟強項，不過，近年機緣下接觸多咗一啲酒吧，發覺都唔再喺單單飲酒嘅地方，食物已經做得有番一定水平，而且，仲唔喺單一只有餸啤酒嘅小食，而喺有番咁上下睇頭嘅菜式，有主菜，有飯麵，兼且水準不俗。之前曾去過Mini Club嘅尖沙咀店，今晚有幸獲邀再嚟到旺角店一試大廚身手。
由於尖沙咀店鋪位方形四正，近馬路又喺開放式窗戶，感覺較闊落啲；而旺角店其實都唔細，但則窄身長形，牆上少咗尖沙咀店嘅懷舊美式「鐵片」海報，但以不斷轉換色彩嘅霓虹燈襯托，氣氛仍有一派格調。而整個場，有高腳枱櫈，亦有矮身茶几配梳化椅，裝修較酒吧式，唔似尖沙咀店嗰邊有用餐嘅餐枱。
但依邊有一樣嘢好，就喺每枱都有一盞射燈對正枱面，唔單止方便影相，至少食緊咩都睇得清楚啲，萬一啲食物有問題都會知。以前落吧，啲人夜夜笙歌，好似走進浮華大地，依家嚟嘅人都多咗好多斯文客，唔喺吓吓嚟劈酒飲到死，尤其食晚飯嘅時段，都唔會太嘈吵，食飯、傾偈真喺OK喎。
身為酒吧，酒嘅款式一定選擇多，香檳、餐酒、烈酒、雞尾酒、啤酒……等等一應俱全，雞尾酒仲有唔少特色創作。不過，嚟酒吧唔飲酒好似唔知飲乜好，其實都喺封舊嘅觀念，既然喺想連食物都做得出色，餐飲都要配合不同人士需要，所以，非酒精雞尾酒（Mocktail）、果汁汽水、熱飲一樣有供應。
![bowl]()
Virgin Colada $78
Pina Colada喺幾出名嘅雞尾酒，雪白嘅Virgin Colada喺無酒精版本，以椰奶、牛奶、菠蘿汁加糖漿溝成，雖然$78一杯，但超大杯，好有霸氣；椰香味頗濃，帶少少菠蘿酸香，而佢哋嘅非酒精特飲都做成類似沙冰狀態，可謂別具一格，夏天嚟飲更加爽，不過，冬天飲就未必人人鍾意，因為越飲越寒嘛。
![bowl]()
Pussy Foot $78
另一杯非酒精特飲，因為加入咗石榴糖漿，所以色澤粉紅迷人，此外，成份仲有橙汁、菠蘿汁及牛奶，同樣打成沙冰，跟Virgin Colada各有韻味，酸甜味重啲。
![bowl]()
Earl Grey Tea $39、Lemon Honey Tea $39
朋友所飲嘅伯爵茶及檸檬蜜糖紅茶，都喺因為天冷，想飲杯熱飲覺得暖和啲。因為都喺以茶包沖泡，以茶壺上，所以，一客熱茶可多沖幾杯，檸檬就無得添嘞，哈哈！
邊飲邊傾，一邊等食。雖然無白酒相送，但淺嚐生蠔亦喺一種飲食上嘅享受。生蠔賣$148 / 4隻，屬於抵食，因為出面即開生蠔一般賣$45-$55一隻。生蠔種類多，由清甜到濃味，由柔滑到爽口，唔同蠔種有唔同特色，貨源有嚟自美國、愛爾蘭、南非、澳洲、法國……等地，視乎來貨供應。
![bowl]()
White Pearl（法國白珍珠蠔）、Britanny（法國不列塔尼蠔）
前者據介紹喺帶有濃郁海水鮮味，口感較爽口，而蠔味越食越甜；後者則蠔味濃郁，同樣爽口，但蠔味餘韻悠長。要細緻去辨別佢哋嘅質感及味道，實在唔容易，況且人人食嘢嘅感覺都唔同，但至少開蠔乾淨俐落無碎殼，蠔身飽滿，爽口鮮味。
依家店方做緊推廣「蠔情醉分享」，$388就可以一支紅 / 白酒配6隻生蠔或6揀1拼盤，有芝士火鍋、海鮮拼盤、德國腸拼盤……等等。
![bowl]()
法式酥皮盒刺身拼盤 $248
雖然無試餐酒，但我哋都點咗一客法式酥皮盒刺身拼盤試試。一客拼盤共包括帶子酥皮盒、吞拿魚曲奇盒、三文魚籽酥皮盒、大蝦酥皮盒，各兩件，另有數片煙三文魚，不過，好可惜，是夜酥皮盒斷貨，只有曲奇盒，未能同時試出兩款「盒仔」嘅水準。
大蝦曲奇盒，曲奇盒做得鬆脆帶甜，但牛油香未算突出，大蝦幾爽口，曲奇盒內喺洋蔥、紅椒粒莎莎，幾清新；
帶子曲奇盒，鮮甜肥美嘅帶子配濃香黑松露醬，效果相當好，應該無咩好挑剔，亦喺4款中最討我歡心；
吞拿魚曲奇盒，軟綿綿嘅吞拿魚粒搭沙律菜，洋蔥、紅椒粒莎莎，混入黑椒粒吊味，OK啦，但下底喺配胡麻汁，令人印象加深；
三文魚籽曲奇盒，大大粒三文魚籽，入口卜卜爆開，配醋醃青瓜絲，兩者夾埋又幾好食喎；
煙三文魚，入口油潤，煙燻味亦唔過濃，作為大配角，都足以收貨。
生蠔及酥皮盒都喺啲唔飽肚嘢，但配酒飲吓食吓就幾爽，幾「疏肝」。要食番啲墊肚嘢，無問題，先揀啲薄餅試試，因為上次晌尖沙咀都未有品嚐過。薄餅共有6款，包括特色夏威夷、意式風情、西班牙精選、香芒烤雞、鮮野菌及冬蔭公海鮮，估唔到作為一間酒吧，竟有咁多款式薄餅，全部定價普通批（5”）為$78，大批（10”）為$138。
![bowl]()
西班牙精選 $78
雖然普通批細細個，但材料十足，落咗沙樂美腸、蘑菇片、火腿、洋蔥，配蕃茄醬底，灑少少香草及加入馬蘇里拉芝士，色香味兼備，沙樂美腸又無過鹹情況，絕對唔輸蝕過啲薄餅專門店，港式厚批底，一定可以夠飽肚。
![bowl]()
冬蔭公海鮮 $78
個冬蔭公海鮮薄餅同樣好足料，有蝦、蜆肉、魷魚、洋蔥，蕃茄醬底加芝士，當然最特別喺佢一陣陣冬蔭公香味，酸酸辣辣好過癮，又醒胃。
除薄餅外，亦有意粉及意大利飯可供選擇，差啲以為嚟咗間意大利餐廳添。意大利飯有3款，亦喺店家誠意推介，其實3款都好有興趣試，最後點咗個蜆肉意大利飯。
![bowl]()
白松露醬蜆肉什菇意大利飯 $128
個意大利飯賣相精簡，但唔覺馬虎hea做。果然無介紹錯，啲意大利飯煮得飯粒濕潤煙韌，恰到好處，飯內好多蜆肉同什菇，蜆肉亦都肥大，而飯面嘅白松露醬香氣撲鼻唔在講，撈勻啲飯，啖啖幽香。
歡樂時光，全單八折，就算埋咗單，都唔會即刻趕你走，既然咁筍，早少少埋單又何妨。
個人評分
味道：9/10
環境：8/10
服務：8/10
抵食：7/10
平均每人消費：HK$0（試食邀請）
餐廳資料：
Mini Club
旺角太平道6號B地舖
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
Mini Club：酒過浮華大地
MINI CLUB (何文田店)
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)