呢兩日天氣好凍，又寒又凍
過著閉關生涯，晌屋企都好凍
閉關係因為又再寫書，晌咁凍既天氣我只想窩上床
有開暖風機但唔敢開太大，因為個仔d濕疹一乾又發
夜晚就諗煮乜，於是我就打開雪櫃打開雪櫃有包魚有包魚
係之前買定係急凍斑片，我就想整焗飯，有淡忌廉同芝士一定整白汁啦
再拎包包煮粥仔既菠菜！哼~奶油菠菜焗魚飯
今次個菠菜切碎佢整，唔打爛佢，因為似鬼口水呀大少爺會無食慾的
菠菜碎碰上忌廉汁會變得滑一滑，大少爺居然話：喂！再整丫
呀喂！我實會再整！哼
寒冬裡遇上熱辣辣的焗飯
食譜：
魚塊 隨意(你需要幾多就整幾多)
飯 睇下有幾個人食就自己預飯量
洋蔥 半個
菠菜 半斤(洗淨切碎)
芝士 隨意
汁：
淡忌廉 150ml
水或雞湯 150ml
麵粉 1.5湯匙
鹽 少許
魚要先解凍，再索乾水，然後加少少鹽、胡椒撈勻，將加少許蛋撈勻備用
煎之前要加上麵粉再撈勻可以煎，煎到金黃色已經可以
跟住炒飯，咁炒起放焗盤，魚就舖上飯面
汁做法：
將洋蔥爆香，加麵粉，將麵粉炒到同洋蔥混合後就加忌廉，再煮到杰身(如下圖)
慢慢加入雞湯或水，邊煮邊攪直至個汁開始滾及變濃
加入菠菜碎，大火煮至輕微杰身便可以熄火
將汁汁上已預備好既飯及魚塊上—面，再加芝士，用焗爐200度火焗至芝士變金黃
(如果個汁淋上飯面但仍稀既話，可以再煮多陣)
新facebook acct開始建立，慢慢upload上Fb、講飲、講食、講戰利品,仲會講祕密
============================================
感謝 大少奶 提供以上資料
大少奶的網誌: http://iamtaisiu9.blogspot.hk/
大少奶的FaceBook 專頁：https://www.facebook.com/taisiu9
============================================
