掃街掃入慈雲山 ~ 挑戰惡人谷 @ 越式阿肥美食

同事推介慈雲山美食孖寶, 一平一正, 一甜一惡, 我話:「惡都有人食?」同事:「簡直惡人谷, 不過好食, 仲成日唔開添」 《阿肥美食》我一定要來會一會啦!!

中午12點45分, 第一次走到毓華里, 《阿肥美食》坐滿中學生, 排隊輪候人數也不少.

遠處傳來老闆娘豪氣的向客人叫道:「講好啲!..聽唔到」, 「食第二啲...今日無」...(十足當年新紮師兄中吳孟達教官一樣, 好強的氣!!)

因為口渴, 同事先帶我到旁邊的「開心菓園」買飲品. 我問:「E間有咩咁特色呢?」

同事一邊點「芒果益力多沙冰」, 一邊答我:「又足料, 又抵, $16大大杯, 同等份量你去許留山起碼收你$30」

我問老闆娘劉小姐最多人買的飲品是甚麼? 她細細聲: 「粒粒芒椰果, 或者蘆薈, 你想要爽啲, 定腍啲?」結果, 我點了爽一點的椰果.

長條狀的椰果, 塞滿三份一, 芒果又夠甜, 雖然份量相對較少, 但起碼難得沒有酸味, $14無話可說.

老實說, 如果不是同事推介, 我一定不會光顧這貼滿A4影印紙的果汁店, 今日有少少執到「筍野」的感覺..

買完凍飲就回到《阿肥美食》, 剛剛就有位坐, 同事話:「一於雞翼豬扒雙併啦!! 又平又抵」

May姐問:「你哋記者嚟架, 做乜影我相呀?」我答:「今日第一次由同事帶我嚟, 佢話妳哋出名好食..」May終笑一笑回應:「哦! 咁你食真啲, 睇下係米真係好食喇.」

賣相超得的雞翼及豬扒, 入味到不得了, 不過雞翼出色過豬扒多多聲, 此時May又走過來, 「你哋真係唔飲野呀? 送架喎..」(我指指有凍飲), 同事細細聲:「我幾驚佢會鬧我哋帶嘢飲嚟呀」

事後我走去同May姐傾計, 原來她們三姐妹經營《阿肥美食》已經十年, 三位阿姐也沒有一位過肥吧, 為何會叫阿肥美食呢?

May姐一面找錢一面話:「當初頂返嚟, 上一手就叫阿肥囉, 唔好講咁多, 好唔好食先啲嘢?」我一講雞翼超好食, May姐三姐妹即時大笑.

其實, 網友於OpenRice留言「店員惡過獅子...冷漠…態度咁差…」, 可能他們誤解了May姐三姐妹說話「無聲尾」的豪邁性格吧!!

起碼我主動與她們搭訕, 她們又樂意合照, 又如數家珍喎, 最後我問:「啲人話你哋成日唔開喎...」May姐答:「逢星期一, 二都休息麻, 做得咁辛苦, 梗係要抖吓啦!!」(五天工作, 羨慕死我!! 仲請唔請人呀??)