(Day 2) 2014-11-2
住宿：Oasis民宿
行程：墨西哥城
尋晚半夜發生午夜兇鈴事件! 由於舟車勞頓，加上好夜先瞓，所以一上床就成隻死豬咁Lu。直至半夜，熟睡其間，也不知幾點鐘，被港女叫醒，話樓下有人敲門，由於我地既房間係二樓，細心聆聽下真係有人澎澎聲敲門並大叫! 呢度係出名危險既墨西哥城，又要半夜三更，屋主又講到明唔會返，不知是否歹人，猶豫左一陣，於是我地戰戰兢兢去開門，隔住大門港女用西班牙語同門外人溝通左幾句，佢由講得出屋主個名，先得知原來都係住係呢度架，於是即時開門啦! 進來既係一個滿身酒氣既大叔，二話不說就上房了⋯ 細看門鎖發現屋主有Label寫明唔好鎖門架! 哈哈，原來呢間屋仲有其他人住，我仲以為獨霸呢間三層大宅tim~ 好在港女聽到咋，如果唔係佢要露宿街頭，實凍死! 吖! 唔知佢頭先又敲左幾耐門呢，哈哈⋯
1000起床，食尋晚買既pan(即麵包)做早餐，西班牙文我都識少少架，話晒都上過工X會既初班，食早餐時發現屋內仲有另一個女人⋯ 咦! 原來仲有人住! 回想返尋晚以為獨霸呢間屋，又播歌又大聲講野tim⋯
傾談間得知呢位大嬸係美國人，留係墨西哥讀瑪雅文化，嘩! 成四、五十歲人，果然活到老學到老喎! 另外從佢口中得知原來亡靈節要係鄉郊先睇到真正既一面，不過無時間無計啦... 外國人就係咁，佢地可以毫無枷鎖咁做自己鍾意做既事! 呢個行程忽然令我領悟到好多野。
先去地鐵站附近既市場，銀仔旅行最鍾意行吓街市，裡面有好多好地道既野食，羊頭、烤肉、牛雜等等。當地人又好熱情推銷，見我地齋影相無幫襯都滿面笑容! 可惜食左早餐唔太餓，唯有聽朝先食啦! （港女按：市場內既相又無晒...)
由於尋日初到貴境，第一個感覺係天氣寒冷，所以今日出門都算重裝備，但天氣陽光普照，行完街市已覺得好熱，相信有20+ 度，於是返民宿放低件褸，並塗上防曬，睇黎溫差都好大喎!
由於得一日係墨西哥城， 唔想貪心周圍去攞苦嚟辛，於是就重點去憲法廣場一帶遊覽；放低件褸再次出發，先去搭地鐵去墨西哥城既中心憲法廣場；細心留意下，發現原來呢度地鐵有好多個轆架，除了平時鐵路見到既金屬轆，係外層仲有膠轆，打橫又有膠轆，總之就好多轆，睇黎鐵道迷先知點解了。
亡靈節係每年11月頭兩日，今日就係要參觀呢個咁獨一無二、盛大既Party!
講萬卷書不如行萬里路(Wiki百科有以下描述)：
［亡靈節（西班牙語： Día de los Muertos）類似萬聖節，家人和朋友團聚在一起，為已經去世的家人和朋友祈福。在墨西哥，亡靈節是一個重要的節日，幾乎與國慶節相當。慶祝活動時間為11月1日和2日，與天主教假期萬聖節（11月1日）和萬靈節（11月2日）相同。傳統的紀念方式為搭建私人祭壇，擺放用糖骷髏、萬壽菊和逝者生前喜愛的食物，並攜帶這些物品前往墓地祭奠逝者。
據學者研究，這個現代墨西哥節日起源可以追溯到幾百年土著紀念活動和一個阿茲台克人獻給女神Mictecacihuatl的節日。[1]在巴西，亡靈節是公眾假期，很多巴西人訪問墓地和教堂來慶祝這個節日。在西班牙，舉行節日和遊行，並在一天結束時，人們聚集在公墓為他們死去的親人祈禱。在歐洲其他地方也有類似的紀念活動，許多亞洲和非洲文化中亦有類似主題的慶祝活動。］
係地鐵站已見好多小朋友拎住向大人討糖果既南瓜兜，亦有好多大人，甚至阿伯既扮鬼扮馬，大部份餐廳舖頭都有骷嘍頭等相關裝飾、擺設，看來亡靈節係墨西哥係一個傳統大節喎! 總之就成個墨西哥城周圍到撞鬼，鬼影幢幢啦!
上到地面，被呢個全世界最大廣場之一既憲法廣場吸引著，雖然跟大部分被西班牙統治過既南美國家既廣場都不遑多樣，都係被宏偉既建築包圍著，但呢度既中央有一支超巨型既墨西哥國旗，而且今日係亡靈節，整個廣場都係攤位，好不熱鬧，而附近街道亦擠湧到水洩不通。
先係廣場附近找換店換多點Peso先，然後食番餐好既! 我們選定了廣場旁建築物既樓上餐廳，貪佢居高臨下，景致一流! 係樓下有好多人負責招攬餐廳既生意，雖然抬頭望餐廳格局好豪華好似好貴，點知一睇餐牌發現價錢合理! 經過長途機，來到墨西哥後都未食過餐好既，當然唔使諗啦!
原來上到去一層裡有數間餐廳同有十多張枱，有點似小型food court，每間餐廳都有一張無敵靚景既枱，通常每人來到食野既目的都係靚景，但都係會食住等，當靚景枱走就再掉位，不過我地太肚餓等唔到了，食完靚景枱既客人都未走⋯ 雖然記低點滴既相機唔見左，根據港女記錄食過海鮮、雞、檸檬飲品，午餐靚景，價錢合理一共$250-Peso(約$140-HKD)
![]()
|
|
靚景餐廳
|
食飽後參觀廣場旁既大教堂，然後再用$20-Peso(約$10-HKD)參觀教堂既頂部，並有個西班牙語導遊帶隊，雖然聽唔明，但純粹諗住參觀吓啫~
唔知係咪還未適應時差既關係，感覺好疲倦眼睏，諗住入教堂內D長櫈冥想下，嘗試與神傾計。點知坐低都無兩分鐘，就要全體起立，有一位修女係台上高八度唱”哈利路呀”～～～ 的當然都係立左一陣啦! 雖然我係衰D，但好攰呀⋯ 於是係門口既梯級休息。
小休後行去廣場中心既亡靈節嘉年華，內有音樂會、有摔角表演、有祭壇等等，十分熱鬧! 銀仔咁大個仔都無參加過萬聖節任何活動，竟然第一次奉獻左比墨西哥!
![]()
|
|
萬寶路祭品! 香港都有噃~
|
行到天都黑齊夠晒皮! 係廣場附近既橫街搵到間餐廳用膳，好似食左意粉同西班牙奄列，但價錢貴過坐擁靚景既餐廳，約$200-HKD；而好嚴肅既老闆，忽然拿起彈結他自彈自唱，即時由嚴肅變為好nice，唱完後仲自己問客人收小費tim~
於是再行多一陣，見到有電視見過既幫人祈福既巫師，諗住都玩吓，點知排晒隊都係算吧! 路經正在收檔既地攤區域，忽發奇想不如今次旅行帶點手信作飲宴既回禮。
因為我之前出席眾多既飲宴，好多既回禮都係朱古力，糖果之類，有次仲收到一粒糖同一對襪，寓意甜甜蜜蜜。既然我個飲宴主題係旅遊，不如連回禮都與旅行有關啦，自己盤算屋企有D封塵手信，分別有一樽N年前由撒哈拉沙漠帶來既沙、冰島帶來既火山灰，加上稍後去粉紅沙灘都會入一樽沙，其實呢D沙都足以派足9成既賓客了，加上我買多少少輕量既手信如鎖匙扣之類，呢個idea唔錯! 徹底攪一個旅行主題既飲宴~
於是揀一檔較地道，一家大細既地攤買了15個迷型袋仔, 經港女講價後$180-Peso成交(約$100-HKD)。我都鍾意架，拎左一個用來放SD卡。
今日最後節目，就係去番中午食飯能飽覽廣場美景既建築飲野。晚上無乜人，終於坐到張靚景枱啦~ 行左成日都好疲倦，居高臨下悠閒地欣賞美景，見證亡靈節正式結束並且整個廣場熄燈。最後點了墨西哥聞名既Tequila 同埋港女最鍾意食的甜品Flan。我仲叫侍應教我用既最地道飲法去飲，先一啖飲晒杯Tequila，然後啜一口檸檬！ 比大大杯啤酒價錢還要貴既細細杯Tequila，就係咁一口飲晒了！ 係呢個靚景下，用傳統既方式飲呢杯墨西哥聞名既Tequila有用到傻瓜機拍片的，可惜珍貴片段...
啤酒，甜品，Tequila $250($150-HKD)
講萬卷書不如行萬里路：(Yahoo知識)
［一般Tequila配鹽和檸檬的喝法是由美國人去墨西哥後學習並傳開來的。一般認為喝Tequila配上如此刺激的口感可以更增添Tequila的風味。但是其實原本在墨西哥，因為當地蒼蠅很多，所以都會在酒杯的杯口抹上鹽或檸檬，如此依萊因為蒼蠅懼怕這樣的味道，所以不會在杯口上停留，也就不會傳播病毒了。
就好像墨西哥的大品牌啤酒Corona可樂娜，大家都會在開瓶之後塞進一塊檸檬，道理也是一樣。只是後來傳來傳去，就變成了增添風味的代表，其實一開始的原因不是這樣。
喝等級好一點的tequila是不大需要鹽或檸檬的。如果為了增添風味，一般會根據個人口味配上其他的選擇。喜歡甜的可以配柳橙，更講究一點的話還可以在柳橙上灑上可可粉或肉桂粉。喜歡辣的可以配一兩滴Tobasco辣醬，喜歡更刺激的還可以滴在一口杯的杯底，用鼻子吸入。喜歡酸的刺激口感可以試試看檸檬，灑上白糖再用火槍燒成焦糖附著檸檬表面，更增許多口感上的變化。］
睇完之後落吧飲Corona塞塊檸檬，知道原意啦!
（港女：回程時，搭地鐵非常多人，要等兩班車先逼到上車。不過又發現當地人亂中有序，唔似得香港地鐵多多廣播，D人都係充耳不聞。）
今晚終於見到屋主，原來係一個三十多歲既男人，剛陪太太去美國公幹回家，仲有一個BB女。屋主話尋晚不得其門而入既住客係一個好鍾意去party的攝影師，我地連聲抱歉，不過屋主話呢D蝦碌事可以令佢知道民宿有改善空間，黎緊仲打算擴建tim。當他知我地去古巴時，原來佢多年前去過，覺得係一個唔錯既地方，當地人好nice，並特意提點我們帶多一點物資如煙、文具之類。佢話當地人唔貪錢，因有錢都買唔到野。另外當然談及都熱門話題墨西哥示威同埋香港既雨傘革命，佢都係渴望改變既一群，但要改變一個國家又談何容易⋯
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
