近來親戚借了架車俾老公鍛鍊駕車技術, 練了一段時間之後, 開始夠膽周圍去, 今次老公話想舊地重遊, 去一次尖鼻咀~~ 我就未去過, 當然係照司機的意思啦~~
尖鼻咀在元朗, 是其中一處受保護的濕地, 即係在米埔的附近~ 駕車前來比較方便, 另一個方法就是在元朗乘35號小巴, 總站落車再行過來, 不過20分鐘一班, 真係有排等~~ 如果識踩單車, 呢個都係好方法~~
這裡就是停車場~ 這日天氣麻麻, 所以車輛不多~~ 這裡泊車原來都唔算平, 12蚊一個鐘, 我們試過泊廣播道都好似係8蚊一個鐘~~
普通車輛係一定要泊在停車場, 因為行過呢度就係禁區了, 只可以行, 或者踩單車~~
如果天氣好同埋潮退的時候, 這裡有一大片泥灘, 可以遠望不少有趣的動物, 不過這天來到時已經潮漲, 泥灘看不到, 那些鴨子已經游了出海, 不太看到什麼哩...
對面就是深圳~~ 幾乎咩大廈都睇唔到......如果下次有機會再來, 希望天氣好一點啦~~
老公部相機影得好啲, 都係勉強見到幾座大廈~~
另外老公又影到禁區內的水警碼頭~~ 普通人又係唔行得入去架...
好濛呀......不過又是另一種景色來的~~
突然有隻大鳥飛過, 老公手快影到~~ 應該係蒼鷺~~
另外仲影到2隻黑臉琵鷺~~ 都幾好彩~~
仲見到一群雀仔以"一"字形來飛行~~
呢群就係"人"字形咁飛, 之前去米埔幾次都未見到, 今次就見到幾群, 都幾有趣~~
遠觀了先前那片濕地, 再行多一會, 就會見到特區旗同警崗~~
這個是尖鼻咀警崗~~ 好彩一個警察都冇~~
唔知喺呢度當值的警察有什麼感受呢? 可能覺得呢度風涼水冷, 日日行山睇雀仔都唔錯~~
再行多一陣, 就會見到禁區的大閘~~
伸個相機入去影相, 就見到一個直昇機場~~
呢條路應該係去頭先影到的那個水警碼頭~~ 不過依家就只有警察、天文台同埋研究人員先可以入去了~~
見到呢塊牌, 就係呢片濕地的全名了~~ "米埔內后海灣拉姆薩爾濕地"~~ 它是國際公認的重要濕地來呀~~
呢條路同米埔那條好似, 附近可以看到不少紅樹林~~
綠油油的環境看來都不錯~~
雖然這日沒有藍天, 不過天上的雲朵看來都幾特別, 柔柔的透著陽光~~
唔知點解突然有一條光在天上?~~~
行了一段時間, 這條路的右手邊就有一些漁塘~~ 行入去支路或在路肩都可以影到~~ 可以遠觀天水圍的高樓大廈~~
突然有少少陽光露面, 又影吓~~
這裡真係同米埔差不多, 不過米埔就有好多地方已經整理好, 比較容易看到雀鳥, 呢度就似一個普通禁區囉~~
又影吓漁塘同倒影~~
很平靜的地方~~
又行了一段路, 就見到禁區的另一個警崗~~
它的對面有間小屋, 可能是警察的辦公室?~~
總是不捨得不影漁塘和夕陽呀~~~
轉了一個彎, 就來到河口同一道橋~~ 其實都好想繼續行去睇吓, 不過這日時間不夠, 再唔走太陽落山, 周圍黑哂, 就比較難找路, 所以決定折返~~ 根據地圖, 如果繼續沿路行落去, 係可以去到米埔架~~ 這條禁區路真係一條遠足路線來呀~~
河口兩旁都是紅樹林~~ 又遠看到天水圍~~
遠處的樹上有好多白鷺呀~~ 可是距離太遠, 只看到一個個白點~~~
之後我們就行了20分鐘回到尖鼻咀的停車場~~
趁住未天黑, 行埋上去唐夏寮~~
這塊牌已經清楚介紹唐夏寮的由來~~ 簡單來說它就是可以遠觀尖鼻咀的涼亭~~ 不過......
要行呢百幾級樓梯先上到去~~
再行......
見到唐夏寮了~~ 不過周圍除了涼亭之外就甚麼都冇...而且這裡的樹太高了, 其實根本係睇唔到尖鼻咀同周圍的景色......老公話以前來係可以睇到, 可能因為啲樹愈來愈高, 當局又唔可以剪, 破壞環境, 所以就"荒廢"了這裡......
測量用的標柱~~
唯有用部相機影出去, 勉強都見到"尖鼻"的形狀~~
老公的相機就影到了禁區內的濕地, 不過看到的不多......愈來愈覺得我們似間諜, 喺禁區影來影去 :P
老公話這裡原本有介紹牌同望遠鏡, 不過依家只有樹......保護濕地都要付出代價, 昔日的本地遊勝地, 現在已經沉靜了......
親戚借來的車子都幾好揸, 又慳油, 希望遲啲除了行山, 可以坐車去多啲唔同的地方啦~~~
============================================
感謝 helenhlblog 提供以上資料
helenhlblog的網誌: http://helenhlblog.blogspot.hk/
============================================
