探險家攻略 > 休閒玩樂 / 城中探秘 / 運動 / 旅遊 / 其他 > 郊遊 / 特色景點 / 行山 / 長線旅遊 / 其他 > 熊本。阿蘇火山﹑阿蘇男孩號（ASO BOY）﹑新幹線N700系列車

熊本。阿蘇火山﹑阿蘇男孩號（ASO BOY）﹑新幹線N700系列車

由平凡人於 2015-02-17 01:00:00 發表 | 累積瀏覽 1596

分類：行山長線旅遊特色景點郊遊其他；地區：九州

< 福岡﹑熊本﹑小倉﹑長崎5天遊 >

第二天

九州除左拉麵出名之外，特色火車都好出名架，作為半個火車迷，今日要開始一個特色火車之旅（請唔好介意我用咁多篇幅介紹火車，我興趣黎架^^）；期待坐上唔同火車，向目的地熊本阿蘇火山出發


早上七點半，離開hostel出發


Hostel位處民居之中，環境唔錯

藍色的天空，天氣真好呢，懷住期待心情向博多站走去

好多日本人著住全套西裝都唔介意踩單車返工，香港一定冇可能見到

未夠八點就去到博多站，已經見到好多穿著整齊西裝既日本人離開車站，我相信佢地應該係去返工啦？估唔到佢地咁早就已經要返工

進入人來人往既博多站，雖然係人多但唔會好似香港咁覺得迫

我會買JR Pass坐車，所以唔用得自動售賣機要來到售票櫃位；時間尚早人唔多，填好班次落表格就走到櫃位買飛，冇人唔洗排隊（寫晒之後幾日所有會搭既班次出來可以一次過換晒所有火車飛，之後唔洗再排隊啦^^）

新幹線票價唔平架，由博多去熊本單程¥4610
不過用pass就好抵啦，我買既北部九州版JR Pass（北部九州版鐵路周遊券）3日票先¥7200，3日內可以坐九州北部所有在來線列車，又可以坐博多熊本之間新幹線，坐一轉來回已經有賺，而且仲可以坐指定席座位，呢張pass超值丫！

JR Pass有分北部九州版&全九州版，又有分3日卷&5日卷，總有張岩用；有關pass﹑火車時間表等等火車相關資料可以係呢道睇到
http://www.jrkyushu.co.jp/index.jsp

車站職員效率超高，睇住佢用摩打手極速幫我出好所有火車票（佢督mon速度快到睇唔到）；如果唔換飛只用pass都可以上自由席，不過指定席舒服一啲就緊係坐指定席啦！而且有啲特色列車全車都係指定席冇自由席，唔換飛就冇得上車啦

一號櫃檯專賣pass

呢個職員識英文，唔怕溝通唔到；妹妹去個時呢道個職員直頭識廣東話，真係估佢唔到，大厲害啦！

仲有少少時間，四圍參觀一下

車站入面有綜合案內所，拎張福岡地圖慢慢研究研究

我已經帶定簿黎吸印，哈哈


車站賣既便當超級靚，七彩繽紛只係望到都已經留晒口水，一向都好佩服日本人可以將啲商品包裝得咁靚，搞到我都想買返個！好想食丫！

所有野都包得好靚

未到熊本都見到好多熊仔產品，相信去到熊本會更多更誇張


Hello Kitty無處不在

福岡縣代表就係佢啦，但同熊本縣隻熊本熊知名度相差十萬八千里

下班車就到我坐個班，係時候上16號月台等車



指示好清晰，第一次搭都唔怕唔識

坐新幹線就好似平時坐地鐵咁，自己入閘再行上月台，車到就可以上車唔會有人提示，可以早啲上來睇車都得架

日本火車站指示牌有漢字表示，唔怕唔識睇

好易就搵到8號車箱上車位置



睇下車先
左邊是700系E番台列車，行走大阪與博多既山陽新幹線，今次旅程冇機會坐到佢（台灣高鐵係由700系列車基礎上發展出來，望上去有少少相似架）；右邊是更新既N700系列車，今次有機會係九州新幹線搭到^^

係我影緊呢兩部車既時候，有個日本人走來麻煩我幫佢同車合照，發現到愛車之人啦！

700系E番台列車又名「光號鐵路之星」

時間差唔多，唔知一陣會坐咩車呢？期待x100

黎到啦，原來係N700，好型丫！我最鐘意呢部架！

列車停車時間唔長，要快啲上車

一上車就見到部車又大又豪華，未坐過咁正既火車


廁所好大，而且好乾淨

呢個廁所可以偷睇入去


有得買野飲

電話都有

仲有多用途房等等唔同房間，車上有好多設施

指定席座位好舒服，舒服到唔想落車，哈哈^^

九州係日本農業生產主要地方之一，火車離開福岡市後沿路都見到好多農田（突然諗起又甜又多汁既福岡士多啤士，而家有得食就好啦！）

車行得又平穩又寧靜，唔經唔覺就過左38分鐘到達熊本站，我未坐過咁舒服既火車架！

熊本我黎到啦！以前發夢都冇諗過可以來到Kumamon故鄉

熊本站好靚，地方大人又少，行都行得舒服啲



一出來就見到Kumamon等緊我
距離下一班車有大約一個鐘時間，就去車站入面商場行行

唔好話日本，香港好多地方都可以見到Kumamon蹤影，黎到熊本就更誇張，差唔多所有賣既野都同Kumamon有關



見呢個便當咁得意想買左佢架，不過睇清楚原來係魚便當，唔岩我


年輪蛋糕丫，睇落好似好好食

炸豬扒睇落都係好好食，不過冇時間食啦，而且人地未開門...

便利店都比熊仔佔據



究竟呢條係咩呢？唔會係臘腸掛？！！

係FamilyMart買個牛肉餅當早餐，好好味
包裝都特別靚過人，而且user friendly，一打開就食得唔會整污漕手



時間差唔多，係時間入去上車啦

今次唔係坐新幹線，要先去在來線月台



見到你啦，阿蘇男孩號（ASO BOY）
阿蘇男孩號全車都係指定席，想坐車就要換定或者買定票，冇票就冇得上車



列車主角係「小黑」；車廂內外都會見到好多呢隻可愛既小黑，傳說車身上有101隻，仲面隻隻唔同樣，我冇數過唔知係唔係真呢

車身上有好多小黑丫；火車職員好好人，請佢地幫忙影相永冇say no

上車啦，又見到小黑



車頭同車尾有全景座位，可以180度睇晒沿途美景，感覺比起坐普通位置正好多，可惜我唔係坐呢道...

我只係坐呢啲普通位咋，除左景觀冇咁好之外都唔係太差，坐得好舒服

我係坐第一卡，開車冇耐就有職員拎個牌比大家影相留念，我都係乖乖地等個牌黎先，miss左就大獲

影完相，我邊會咁乖坐定定等落車，係時候四圍行；車頭個view實在太正，忍唔住又走來望望



全列火車得四卡，行晒佢先得

第二卡有好多四人位，四個人坐就岩晒，仲有張枱可以玩到落車



第三卡係最特別既一卡，呢卡設施係其他火車上好難搵到架！

一大一小既親子座位，岩晒帶住小朋友既家長

仲有波波池，有鐵路姐姐陪小朋友玩

圖書都有得睇，小朋友一定唔會悶；估唔到火車都可以整得咁特別，可以去到目的地之餘仲有咁多野玩，呢程車大開眼界

除左有得玩之外，車上當然有得食啦，有個小小cafe滿足大家，非常受歡迎

賣既野好吸引，有啲仲係火車限定

拎張記念乘車證，吸個印留念；睇落係好無聊，不過我鐘意，九州所有特別列車都有呢個服務

去到最後一卡第四卡車箱，有好多普通座位；除左一般座位外，車上仲有好多梳化位﹑面向窗既窗口位﹑休息室等等，就算唔坐自己位都仲有好多地方比你坐，而且全車係指定席限制左車上人數，感覺車箱好寬敞；日本咁有心思整呢啲特色列車，又唔介意少咁多座位賺錢而整公共空間，唔知有冇其他國家做得到呢？

行晒全列火車，係時候乖乖地坐返自己位置休息下，順便欣賞窗外美景；離開熊本市後窗外風景由城市變成田園風光，配合藍天陽光，只可以講：「好靚丫！」

咦...窗簾都係小黑bor，小黑係車上係無處不在

車程1小時21分鐘，有時間比我食多個早餐

唔經唔覺，黎到阿蘇站啦

要同ASO BOY講byebye

係影緊相既時候，突然有人走過來話幫我影相，好多謝佢既幫忙^^不過我全程都冇出過一句聲但咁都發現我係香港人，好勁！

左邊係普通列車

普通列車離開後就只係得返孤獨既ASO BOY

再見ASO BOY

呢啲鄉郊路線好耐好耐先一班車，火車走左之後有排都冇車來lu，如果唔小心miss左班車就麻煩，有排等



經歷兩程火車，終於來到今日最重要既目的地「阿蘇」，阿蘇火山近在咫尺

但開心得太早，見到Information Centre有張咁既紙，心諗今次XX啦
冇得上去火山口！！！！！
今日level2警告冇得上去！！！！！
點解會咁架！！！！！
山長水遠黎到都唔比人上去！！！！！

望住噴煙既火山，都唔講咩好...其實我係香港個時已經知道而家火山係level2警告，不過當時諗level2好輕微姐唔會封山既，冇睇清楚警告上解釋，結果就係咁出事啦，都算係自己攞黎衰...如果...一早睇清楚就唔洗失望而回...近排火山運動活躍，阿蘇火山由30/8/2014開始已經level2，直到近半年後既今日依然係level2冇變，都唔知要等到幾時先可以再上去...

呢道可以睇到阿蘇火山狀況，去之前一定一定要睇清楚
 http://www.aso.ne.jp/~volcano/info.html

好多人排隊，準備坐12:10車去火山，不過我仲猶疑緊去唔去好，所以冇上呢班車；如果唔去火山，都仲有好多地方可能去，可以坐車返熊本玩，又可以坐車去別府﹑湯布院個邊；係道諗左好耐，都係決定去火山附近地方望望，都一場來到就去睇下啦，唔想白行一趟...

下班車要等足一個鐘先開，係車站附近行下睇下

金牛？

阿蘇火車站設計好靚，古老之中帶點田原風格，好有日本感覺，like

阿蘇係郊外地方，好少車

有少少熟悉感覺，可惜香港而家都唔知仲有冇呢款郵筒

去售票機買好車飛，上車就唔怕冇散紙；既然火山唔開放，我都懶得去火山纜車站個道，去草千里算

等左一個鐘，終於可以上車

係日本搭巴士上車時記住拎「整理卷」，每個站都有分段收費，唔拎就唔知你係邊道上車

巴士越上越高，風景亦都越來越開揚

大約半個鐘車程去到草千里

見人行上去我又跟住行

眼前就係大名鼎鼎既阿蘇山中岳火山口；望住佢有幾分無奈，明明就近在眼前，但彷彿遠在天邊...可惜...可惜......

「阿蘇山位於九州的中央，是橫跨熊本縣和大分縣的阿蘇國立公園的中心，包括周長爲128公里遼闊的外輪山，分佈著7個村鎮的破火山口及阿蘇五嶽。阿蘇中嶽是世界上屈指可數的活火山，海拔1506米的山頂彌漫著硫黃氣味。在這裏可近距離地觀看南北長約1公里、東西寬約400米、口徑4公里的火山口濃煙翻滾的壯觀景象。」

先唔理個火山住，附近風景都幾好


仲有路可以行山，不過我一個人唔敢咁去遠...上面風景一定靚好多

呢個係「米塚」，細細個幾可愛丫
睇形狀就知道佢都係一個小小既火山，只係已經唔活躍lu；呢道之所以叫米塚，係因為傳說發生飢荒既時候，神明就係米塚拎米出來分比大家因而得名（唔知有冇講錯），睇上去我覺得幾似布甸^^

阿蘇山下係平原，火車站就係下面



行返轉頭又望到火山口，唉...阿蘇火山係地球上少有可以上去參觀既活火山，可惜黎錯時間...

火下山就係草千里，顧名思義係一大片草地



草千里春天開滿花，夏天生滿綠草，冬天鋪滿白雪，秋天就係呢個樣


花又冇雪又冇草又黃，唔岩季節就係咁

行返落去草千里

咁賣野都得？

草千里有得騎馬，印象中價錢都幾貴，馬又只係兜個圈仔，騎既人唔多



呢道都望到火山口

四圍望下



冇特別野好做，行近啲火山



佢地應該好鐘意Kumanon？戴晒熊仔帽

係時候同火山講byebye；熊本因為有阿蘇火山，所以有「火之國」稱號，今次無緣體驗火之國既氣勢啦

仲有時間巴士未到，先入去行下

曬到就快變白色


好彩呢個仲係黑色

來到熊本主場，當然所有野都係Kumanon

咁多人排咩隊呢？

原來大家都排緊馬肉串燒；熊本馬肉好出名，連馬肉刺身都有得食


我唔會專程去搵馬肉食，係道見到就買串作為午餐啦；呢舊肉食落去好難咬得開，唔知係馬肉本身係咁，定呢道燒成咁呢？

時間差不多，馬仔已經走晒，我都要等巴士走啦

再次返到阿蘇站

阿蘇站好細，一眼睇晒；左邊係售票處同廁所

中間係出月台既門口

右邊係餐廳同Information Centre

差唔多夠鐘，出來等車



再見啦阿蘇火山



企定定等車先

好多人等上車，好彩我係指定席唔怕冇位，不過佢地個邊係自由席就難講啦

車到！今次坐既係「九州橫斷特急」列車

列車終點站係人吉，我唔會坐到咁遠，返到熊本站就會落車；如果miss左呢班車就大獲，差唔多四個鐘之後先有下班車！

車箱冇咩特別，最重要係坐得舒服就得



搵到個包當係下午茶

阿蘇與熊本之間有段路好特別，係「之」字型，列車會停低再向後行一段路，最後會重新向前行；因為阿蘇呢邊位處高地，火車要用「之」字型方式先可以上落山

「之」字型路段係立野站呢道

車程1小時7分鐘準時到達熊本

旁邊停左部普通列車

無意間見到車箱入面其中四個人，四個人手上都係拎住書或者文件睇，如果係香港既話我相信大部份人一上車已經拎左部電話出黎玩啦

月台上發現吉野家！今日其實午餐都冇食有少少想食野tim，但都係返到博多先算，要返去食拉麵ma

唔出去熊本行啦，直接係火車站坐新幹線返博多，熊本就留待明天有多啲時間先慢慢遊覽啦^^

鐘意SeeWide的分享，給我們一個Like吧！

檢舉

攻略日期：N/A

攻略地點：九州
攻略時間：1日以上

是次消費：N/A

熊本「紅」宣傳大使～熊本香港事務所～

地區：

消費：: $1-$100

分類：

共有14篇攻略

21945

純美

地區：

消費：

分類：

G-fit

地區：

消費：

分類：

森藝銅器 Sum Ngai Brass Ware

地區：

消費：: >$600

分類：: 特色商店,購物熱點

10667

德國寶生活•廚樂概念店

地區：

消費：: $500

分類：

共有1篇攻略

6824

Parc古道具公園

地區：

消費：: $101-$300

分類：: undefined

共有3篇攻略

12485

LOCOLOCO Concept Store

地區：

消費：: $101-$300

分類：: undefined,undefined,undefined,undefined,undefined,undefined

7465

抵記 (屯門店)

地區：

消費：: $1-$100

分類：: 購物熱點

共有1篇攻略

13893

共0人比"掂"

1874飛飛於2015-02-19 22:21:44 留言
引用自 '平凡人' 的相片：
回覆：架車好靚呀! 九州的火車真係好豪華, 舒服, 係到睇風景真係very nice!
未去亞蘇, 等睇你介紹
舉報回覆
No.1

EEChan 於2015-02-22 13:54:00 留言
火車好靚
祝新春愉快，如意吉祥！
舉報回覆
No.2

特搜總編E 於2015-02-24 17:01:35 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.3

stellaluk 於2015-02-26 00:15:38 留言
列車好流線型，內裏設備一流！我都幫趁過佢哋馬肉串燒，真係好靱！
舉報回覆
No.4

平凡人於2015-02-27 23:17:05 留言
原文由 1874飛飛於 2015-02-19 22:21:44 發表
引用自 '平凡人' 的相片：
回覆：架車好靚呀! 九州的火車真係好豪華, 舒服, 係到睇風景真係very nice!
未去亞蘇, 等睇你介紹

九州岩晒我呢啲鐘意坐火車既人，只係坐都覺得開心
舉報回覆
No.5

平凡人於2015-02-27 23:17:53 留言
原文由 EEChan 於 2015-02-22 13:54:00 發表
火車好靚
祝新春愉快，如意吉祥！

多謝希望你都係一樣啦
舉報回覆
No.6

平凡人於2015-02-27 23:18:41 留言
原文由特搜總編E 於 2015-02-24 17:01:35 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.7