近年興自由行。
唔係黎香港個班自由行，而係香港人去旅行鍾意自由行。
不過行還行，去旅行記住最重要唔係去邊度同幾時去，而係同邊個去。
去旅行既結伴者黎黎去去都係得個幾味：
1. 朋友
2. 家人
3. 伴侶
4. 拿，我加埋空氣 (即係獨遊)
呢個挑選過程我地唔需要加入好似要求普選特首咁，要過五關斬六將都可能得個吉既繁複過程。
但自由行豈能隨隨便便？！
畢竟係境外遇到有咩問題或者成個行程氣氛係點，都好依賴同遊個個點同你配合。
朋友
朋友圈內總有唔同性格既豬朋狗友。揀得一齊去旅行一定有咁上下熟，就算dead air都唔會尷尬。
出發前一齊度下個行程，你一言我一語，不亦樂乎！
出發後問題黎嘞！
「頂你！霸住個廁所咁耐得你一個用咩？」
「今朝剷極都唔肯起身，起完仲要斯斯然！好啦，而家時間唔夠用啦！」
「咩話？又攰？我地唔係行左好耐咋喎！」
「到底你識唔識點行架架架架架架架？！」
「你．影．完．相．未？！」
一個旅行就會發現，其實你都唔係好了解自己個朋友。
家人
同屋企人去自由行你無選擇對象既權利。畢竟做人子女有責任帶父母見識下呢個世界，無論呀爸定呀媽，年屆幾多都好。
問題又黎啦！
以前邊有咁多自由行？好多父母都係跟旅行團大(有幸出國玩既話)。
出發前會問你千百萬條問題：「喂，安唔安全架？」「你識點行架拿？」「萬一有意外無人睇住我地咁點算？」．．．．．．
出發後你會發覺原來自己既旅行模式對佢地可以話係差天共地。
你可以飽一餐餓一餐，唔一定要坐底食正餐。有時求其含個包滿足到個胃就繼續行程；你可以趕景點唔驚攰；又可以訓hostel或平價酒店，但求有一宿；你可以好青春咁玩足全程．．．
但記住家人已經唔係十八廿二，帶住佢地去玩你就一定要識融入佢地既旅行模式。
「唔盡興喎！」
係咁架啦！你無得揀。
伴侶
呢個選擇好危險！
結果只係得兩個：一係甜甜蜜蜜玩足全程；一係嬲爆爆甚至爆發世界大戰。
唔，都有第三個既：甜酸苦辣樣樣齊。（好廢喎呢句）
正所謂相見好同住難，去個旅行有時就好似為同居試下水溫。
幾日幾夜日日對住你可能會發覺大家原來有好野都需要磨合。
好既咪講一兩句，配合到大家就easy job，順利過關。
唔好既真係一額汗。
你可能仲會怪對方成程無諗過付出過。
又會話佢咩都諗好哂，都唔俾自己發表下意見。
即係點？
拍緊拖既，你會明的。
空氣
同空氣一齊結伴唔一定話係perfect，始終你可能會覺得悶，無人同你share大大件既食物，無人會係你訓著時叫你落車。
但佢吸引既地方係你真正享受緊自由行 – 自由咁行屬於自己既旅程。
想去邊就去邊；想食咩就食咩；想幾時休息就休息．．．．．．
真係「倒抽一口涼氣」！
咁即係應該點揀？點揀都係死路。
放心，以上只係個別例子啫。
非常之好彩作為一個熱愛旅行既我未試過以上既情況。
唔係因為我無同過呢幾類既選擇去旅行，而係心態決定一切。
其實莫講話旅行，即使日常相處大家都無可能100%配合。
畢竟呢個世界唔會出現另一個你，只係於不同中找大同。
你就下我，我就下你，就就下咁就無問題啦。
去旅行，應該係開心。
同做人一樣，有時唔需要太過執著，識得接納別人既意見既同時，放低或將自己既想法融入，比起死要堅持自己個一套來得更容易。
咁樣除左令到身邊人舒服，仲唔會攪到自己成日都屈住屈住。
何樂而不為？
Facebook專頁：https://www.facebook.com/backpackersopoor
Blog：http://backpackersopoor.blogspot.hk/
