由於屋企附近有兩間百樂門，間中都會去吓飲茶或食飯，雖然唔喺成日都有寫佢哋嘅食評（因為有時同老婆家人去，唔太方便影相），但對依個品牌一向印象都唔差。跟親戚一年一度嘅團年飯，選址晌長沙灣元州街新開嘅百樂門宴會廳。
據親友講，依間百樂門都喺趕團年飯依水，啱啱二月初開檔，加上佢哋一向主力搞婚宴，所以，個大堂認真富麗堂皇，環境新簇，頭頂上一連串水晶掛飾夠晒吸晴。
一如其他酒樓，有多款「發財團年春茗」套餐，我哋就揀個平平哋嘅「新年好運全包宴」（$2,988），提前落訂仲可以減多$200。我哋大人連細路，每圍14人一樣夠食，份量絕對十足，最好喺食得晒，唔會嘥嘢剩晌度。
叫得全包宴，就梗包埋茶芥、酸菜、汽水、加一。飲品有可口可樂、七喜、美蓮達、獅威啤酒，全罐裝，唔要啤酒可一罐換一罐汽水。不過，可口可樂夾七喜應該好少有，因為通常喺攞番同廠出品，即可口可樂夾雪碧、芬達，百事可樂夾七喜、美蓮達。
雖然喺正正年三十晚做節，旺到爆晒場，我哋因要遷就家人放工時間，揀食8:30pm第二輪，但服務及質素無理由差得咁緊要。上菜次序亂晒籠（以下喺當晚出菜次序），部份菜式貨不對辦，質素好一般，只可以講過時過節，為起每人二百唔使，夠大碟頭，食得飽各位咁囉！
![bowl]()
紅燒竹笙雞絲翅
以前晌80年代風光嘅日子，有一句好富貴嘅說話「魚翅撈飯」，今晚我哋似乎都突然變得好富貴，皆因喺「魚翅啷口」，真喺估佢唔到，等咗20分鐘，第一道菜上枱竟然喺紅燒竹笙雞絲翅。窩翅頗大份，足足可分到14碗，碗碗九乘幾滿，亦睇到好足料，味道喺點？一眾親友話唔錯，小弟成為無翅之徒，所以，第一道菜就無緣品嚐。
![bowl]()
醬皇彩芹螺片蚌片
隨即就上第二道菜「醬皇彩芹螺片蚌片」，完全唔知何解叫「醬皇」，睇樣就知喺清炒，喺忙得滯落漏XO醬定柱侯醬？還好喺味道都唔差，螺片同蚌片都炒得有咬口，無話太韌食唔到，而彩芹就似乎得西芹一樣，三色椒之類有色蔬菜就欠奉喇。
![bowl]()
鴻運乳豬拼盤
初時，諗住唔使煮嘅燒味拼盤會最快嚟，結果以第三名時間上枱。拼盤有乳豬、叉燒、燒鵝、海蜇及油雞。啲燒味幾好，乳豬唔太肥，層外皮又香脆。
![bowl]()
蠔皇花膠扣鵝掌
雖然個蠔皇茨汁好夠味，蠔味又濃，花膠又大大件，不過，啲花膠同鵝掌就扣得唔入味，好似就咁煮完再淋過茨汁就算，總括嚟講，不過不失。
![bowl]()
清蒸大青斑
成餐飯，以蒸斑最有水準，最得我心，除咗條大青斑夠大條，蒸嘅火候啱啱好，肉嫩細滑。
![bowl]()
蜜桃帶子海皇卷
海皇卷內大多數都喺粟米粒、西芹粒、蜜桃粒，帶子粒得好少，而且，送到嚟啲海皇卷唔太熱，只喺微暖，仿似大量炸好後，等上得菜時就執一碟出去，所以，層皮腍晒。中間兜生果沙律亦做得好馬虎，罐頭貨加上撈唔勻嘅沙律醬。
![bowl]()
金瑤炆天使麵
仲有兩道熱葷都未到，先上個「天使麵」過你頂頂肚，之但喺，明顯喺一碟干燒伊麵，兼要幾難得先摷到一、兩條幼如髮絲嘅瑤柱絲。
![bowl]()
金蒜一品燒雞
除咗條大青斑，碟燒雞喺小弟認為第二好食，燒雞炸得皮脆肉嫩，又帶微微蒜香。
![bowl]()
發財好市添大利
唯一一道「意頭菜」成為壓軸，夠晒碟頭，有髮菜、生菜、蠔豉及牛脷，樣樣都所謂好意頭，睇落又幾好樣，不過，蠔豉真喺唔得，味道、口感都唔似蠔豉，咬落好鬆散，無乜蠔味，卻有朕腥味，最重點蠔心好似啲鮮蠔有朕草青。
![bowl]()
生炒臘味糯米飯
個麵變咗伊麵，好在個糯米飯正常啲，而且炒得幾好食，有唔少臘味粒，飯粒沾滿油香，但又唔太肥，而且分明，又煙糯。
![bowl]()
滋潤紅棗糕
雖然棗味唔算好強，但煙煙韌韌都幾好食，不過，似乎家人唔太欣賞，剩番唔少，讓我一個人可以食多幾件。
![bowl]()
滿屋黃金兆豐年
無錯，「黃金」就喺大大個潮州柑，都喺攞個諧音啫，好過送果盤，食唔晒又唔方便拎走，依家搵人袋走就唔使嘥嘞。
![bowl]()
闔家鴻運慶團圓
滿以為10:30pm應該食完走得，點知個紅豆沙湯圓遲遲未現身，以為仲煲緊，點知喺收銀附近枱上放咗一大桶，原來喺唔夠人手搞。紅豆沙攤到涼晒，又杰身，連帶湯圓唔熱，質感開始變番實，認真麻麻。
以今晚質素及服務，老實講，真喺唔達標，比起以前，覺得啲嘢一落千丈。作為團年飯，梗喺希望大家食得開開心心，所以，我哋都只喺食完就算，況且，我班親戚一向好隨和，志在一齊高興，齊齊整整，咁就夠開心喇！
個人評分
味道：6/10
環境：8/10
服務：5/10
抵食：7/10
平均每人消費：HK$200
餐廳資料：
百樂門宴會廳 Paramount Banquet Hall
長沙灣元州街388號肇如大廈2樓
2111 9833
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
百樂門宴會廳 Paramount Banquet Hall：一樂千丈
百樂門宴會廳 Paramount Banquet Hall (長沙灣店)
南坊
富臨皇宮 (黃大仙店)
小皇府 (MOKO新世紀廣場)
名館 Ming Bistro (希慎廣場)
G-fit
海逸皇宮大酒樓
彩福皇宴（沙田石門）