(Day 7) 2014-11-7
住宿：Tingum Village hotel
行程：Harbour Island
![]()
|
|
是日無晒D相，唯有用尋日既相頂替
|
瞓醒食完住宿包埋既早餐，婆婆個仔又同我地傾起香港革命問題，佢講開原來美國電台好偏頗，所以要睇埋BBC喎。
係大廳上一陣網，搵定下一站牙買加既資料，竟然搵到有內地人一家大細去牙買加自駕遊既遊記喎！講埋文化及食物等等好詳盡，反而就搵唔到香港人寫既遊記，你話吖，我地香港人真係唔再可以自以為是了... 於是順便book左第一晚係首都京斯敦既B&B。
中午，去粉紅沙灘游水，不過又真係太曬了！ 黎到加勒比海咁多日，忍到依家先下水禮一D都唔似我既性格，鬼叫我塊面同手咁易黑咩，都係唔想註冊當日黑蚊蚊影相咁難睇啫！
游完水返住宿沖涼後，再去平民餐廳食雞髀飯，可能係世上最貴既雞髀飯$1x-USD
之後行街，去聲稱全球最大椰子既地方睇吓，真係好大喎(無晒D相無紀錄)，這裡原來都係夜店，而老細竟然又係住宿既老闆喎，佢話呢間係全島最舊既酒吧。
之後老闆好好人車我地回住宿，諗住都幫襯佢食返餐，但真係太昂貴，諗吓算了...
![]()
|
|
網上圖片
|
又去昨日同一地點，無人既遊艇碼頭睇日落，仲見到海龜添！其實我再次過來睇日落係有特別意思的，因為今日我地係以男女朋友身份睇最後一次日落啦!
我成日都覺得自己有婚前恐懼症，當談婚論嫁時D問題就會不停諗起，之前個ex就係咁攪到結唔成，不過我地確實有極大問題；而港女我就諗唔到有乜問題，都覺得搵啱人既，不過始終心情忐忑，所以今日我都不停口嗡嗡唱或播同一首歌，聽到港女都好好笑。
晚餐又係去地道餐廳，點左龍蝦$18-USD，豬扒$10-USD，當老闆娘講電話話隻龍蝦from live to death時，佢自己便開懷大笑，只係普通一句說話，我聽到都覺好笑，快樂其實好簡單。煎龍蝦好好味，我地無剝殻就食，食相非常狼狽，比一個當地人笑到肚攣，笑足15分鐘，真係醜死怪，哈哈~ 比人笑完後當然除左殻先食啦! 當佢攞外賣離開，寧靜既街道仲傳來遠處既陣陣笑聲，難道呢度先係快樂指數最高既國度！我地是否反思吓，快樂與愁眉苦臉其實自己可以去決擇的，我一定係選擇開開心心地過活架。同時，我地發現餐廳部電視唔見左，唔通我地尋晚阻住佢收舖？呵呵呵
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
