一班好姊妹真有小弟心，送完Fine Foods嘅「蝴蝶酥雜綿口味禮盒裝」，又送嚟小弟一盒東海堂嘅「和風曲奇禮盒」，所以，之前一篇「好友狂嚐曲」曲奇食評寫咗蝴蝶酥禮盒，依一篇就再輪到寫返篇曲奇。
深啡仿木紋嘅禮盒，盒面印有各款曲奇款色，打開禮盒睇到曲奇整齊排列。其實，前年曾收過依款曲奇，不過，就只喺輕食裝，同樣有5款口味，每款口味各有兩塊，全盒共有10塊。對照番今次所收到嘅禮盒裝，黑糖、抹茶、腰果、黑裸麥合桃維持不變外，之前嘅竹炭椰子就變成竹炭夏威夷果仁，大多以「和風」食材製作。
講得禮盒裝，份量自然不少，全盒共有50塊之多，每款口味各有10件，全部喺獨立包裝，方便衛生，雖然有啲唔環保，但就襟擺啲，又唔使一打開盒嘢就要盡快食晒。每個包裝袋背後已印備邊款口味，絕對唔會揀錯。
![bowl]()
黑糖曲奇
5款曲奇最得我心嘅一款，口感嘅鬆脆固然喺最基本，但入口黑糖味輕輕滲出，有份醇厚天然嘅甜味感覺。
![bowl]()
竹炭夏威夷果仁曲奇
一向唔抗拒「竹炭」嘅食物，不過，又無話特別嘅好感，覺得竹唔竹炭都唔覺有咩味。不過，曲奇內嘅夏威夷果仁就非常香脆，可惜得好少。
![bowl]()
抹茶曲奇
長方形嘅抹茶曲奇，感覺最和風，抹茶某程度上都好似代表緊日本咁，一咬落抹茶味算得上突出。
![bowl]()
腰果曲奇
比較大路嘅曲奇，牛油曲奇加腰果碎，腰果應該烘焗過，所以，頗香脆，又有咬感，牛油曲奇亦做得唔錯。
![bowl]()
黑裸麥合桃曲奇
曲奇加入咗裸麥粉，鬆脆得嚟有種粗糙感，而合桃落得一啲唔手緊，塊塊都混有超多合桃粒，好有質感。
揀幾款口味，沖杯咖啡，又喺一個唔錯嘅下午茶，在此，再次多謝食友厚愛！
個人評分
味道：8/10
環境：- /10
服務：- /10
抵食：- /10
平均每人消費：HK$0（禮物）
餐廳資料：
東海堂 Arome Bakery
葵芳港鐵葵芳站8號舖
2610 0792
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
