我嚟咗呢個世界己經有五十年，喺人類嚟講唔算太老，但喺豬嘅世界嚟睇，我嘅壽命已經係最長架喇！唔信你睇吓我個樣，雙眼已因年老而脫落，我依家已經睇唔到嘢。
![]()
時間過得好快，眨吓眼就過咗幾十年。我重記得喺五十幾年前，我俾一位太太買咗，將我送咗俾佢嘅外甥作為過年禮物，我就喺嗰個時候開始，一路跟住呢個主人。
主人每逢農曆新年，收到利是錢之後，我先至有嘢食，不過全部都係大餅（硬幣）。
我啲FRIEND就唔同喇！佢哋主人有錢，所以食親都係軟嘢。
雖然佢哋有好嘢食，但係當主人冇錢駛嘅時候，就會諗起佢哋，最後慘遭主人《謀財害命》，我好多FRIEND都已經行先我一步，所以有錢唔係一定係開心嘅！呢個世界有一得必有一失，所謂食得咸魚低得渴，我情願食得唔好，都好過俾人劏！
我後生嗰陣時個胃好好架，點知年紀大咗個胃開始唔妥，最近重痛到典床典蓆添，我個主人見到我咁嘅情況，就幫我做咗個大手術，因為肚裡面太多嘢喇，用咗成半個鐘先至搞掂，好彩手術成功，依家舒服晒！康復進度良好，大家唔駛担心，吓？又係喎！你哋唔識我，又點會担心我哩！我真係自作多情！
做完手術之後，我個主人俾我睇番攞咗啲乜嘢出嚟，如果大家覺得太核突就唔好睇喇！
咦？我見到幾張軟嘢喎，錯怪咗主人添，原來佢都有俾過軟嘢我食
噃！吓?有無搞錯?乜連古錢都餵埋俾我!
最近有個拍賣會，一個喺64年鑄造嘅五仙硬幣，竟然拍賣到幾千銀，睇怕我肚裡面嘅硬幣，幾千年之後，真係價值不菲架！
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
