踏入最後階段，開始要準備BB的物資了！很幸運有讀者和好朋友送了一堆初生及衫仔給BB，而BB車、BB床、BB咩帶亦有親朋好友給我二手，連奶泵都有！BB車已經洗乾淨，待天氣好時會再洗多轉，下個月尾會開始洗BB衫。在早前的一田嬰兒用品展中我就幫BB添置其餘必需品啦，簡單分享一下戰利品！
用棉唔知棉貴，單是買BB的棉花球、濕棉乾棉、放得入口的、抹PATPAT的都可以花上成千元！沒誇張，例如NEWBORN BB一次換8﹣10次片，每次不論大小都要抹PATPAT，在家中還好可以用棉花濕水抹，出街沒選擇只能用上質素較好的濕紙巾，總之就是「抹私處」／「入口」／「抹手」的都不能慳！
而我亦已早前在12蚊度購入幾個透明盒，方便日後將大塊的乾棉剪細後入箱！
有關BB用不同的棉大家各持己見，部份牌子在護協／online shop／藥房會比較便宜，但其實濕棉都好重啊！所以我亦一次過在一田買了。（反正包送貨，而且由我家去護協（佐敦）都好遠啊…..）主要我都是買日本牌子softtouch及思詩樂。
還有覺得幾便宜而買的不知名牌子濕紙巾，$109有12包即入兩打（聲稱可以放入口，但主要都是抹手手啦～）
友人重點提示帶出街的濕紙巾最緊要不買極度大包，加埋BB其他物品真的會好重！
BB用的紗巾無人嫌多！用下又一條、出街都要拎N條、跌下又一條…..因為我的BB出生於夏天所以也順便買幾條汗巾抹背部，畢竟我始終想抹汗的跟抹口水的分開～而傳說中最好用又幾乎是最貴的竹炭mides紗巾，我都各款買了一包，加上之前有讀者都送了一打紗巾（全新）給我，加上媽爸去日本又買了好幾條，現在紗巾數字已有40條！夠用喇掛XDDDDD
現在的BB真的很幸福！連洗衣液都有專用的，媽媽group的朋友推介這babyganics品牌，我們屋企自己用威潔洗衣粉一大盒才數十元、金紡柔順劑2公升才20元有找….BB這一支不足2公升的洗衣液已經差不多三百元…真是倒水咁倒啊！另外順便再追加多支奶樽清潔液。
還有不少得BB洗白白用的沖涼用品，mustela相信是不少媽媽的心水牌子，另外swissbaby都不錯（有機會再轉）。這支mustela dermo cleansing 就可以當洗頭水及沖涼液二合一，不用煩再另外買shampoo；另外搽PATPAT試了新牌子bellybuttonsand babies，如果唔OK就轉用馬油（朋友推介）或者vaseline好了。
還不少得好肉赤的百靈耳溫槍，貪其口碑好、靚仔又方便！$599後九折都好肉赤，但始終初生寶寶發燒可大可小，隱陣些比較好，最多媽媽搭少五次的士啦 T＿T
一堆立雜但又有需要的BB用品。BB奶粉樽（未知餵人奶是否成功，所以都要買定最多唔拆開住）、BB指甲鉗、朋友推介的棉花棒，還有奶樽頭清潔棒（唔講真的唔知要買！）。
還有newborn baby的尿片，在幾款初生中掙扎，最後都是買「傳說中的白P」啦！不過BB大左就會轉其他牌子（初步都係M或者G牌）個SALES又嚇我一包36片用得4日，本來只打算買2包，最後又入左4包…..廢時坐緊月又點人落街買啦XD
還有最貴的item又是must have item，之前考慮左n個牌子，都係各有各好啦！最後都是買了入得落肥仔樽又最幾乎是貴的avent，仲要無set裝，分開買貴過nuk同tommee好多！
不想我媽媽（幫我坐月）洗奶樽洗到傻，都是買定多pack奶樽以便交換啦！最基本要4大2細／2大4細喇。
食奶唔知樽貴！OVER成舊水一個架XDDDD 希望岩BB嘴型能啜啦，否則最後要touchwood轉奶樽牌子真是喊都無謂…
無論人奶成功與否，暖奶器都有用既！二百幾蚊，買啦！朋友正是用家，confirm這款tommee的暖奶器放得落avent肥仔奶樽我才買的，我試過放得落紙包飲品添架XD（仔仔唔用就留俾我要黎坐熱鈣思寶囉…..唯有- _ – ）
雖然BB床未到手，但床單套裝都要買，想不到最後一套12件的「主打」床單我竟然放棄了沒買 bduck （總覺得b duck有人送嘛XDDDD）最後買了顏色較soft的classic pooh，五百幾一套。
另外加錢$129有張疑似包被又比包被大型的被仔～我就二話不說選回b duck了XDDD（暫時未知有什麼用途….）
奶嘴呢！我應這個是我私心買的…….因為星星pattern好靚！啜唔啜都買左先啦（雖然又是藍色XDDDDDD）
最後終於有少少野是自己的了﹣ ＿ ﹣ 。。。。。
奶墊（日後貼在胸圍內側以防漏奶，像m巾的concept）和傷口沖洗瓶（生完洗傷口用，因為唔沖得涼嘛）
我已經盡量做到「可以不買的都不買」，減少出現「買左先算」的情況（有經驗人士一齊購買是好好的）！就在一田嬰兒用品展開始的第一天，我就相約住大埔已為人母的朋友出發大埔一田，人好少，好好行！想不到我自己一個前後行了四小時！！！！友人陪我行了第一小時，因理性的人返工那我就自己出動嚕！’
（完成這個任務後，理性的人贈我一句：thanks bobo, hard day）XDDDDDDD
好多人話「jusco BB展」其實平好多，但我屋企附近實在沒有jusco、不會特意去啊，最近都要九灣城，但不要說會展的BB展，現在「過海」對我來說就像澳門咁遠…..到你懷孕時就會明白，好多時候好多花費都要「豁出去」，最緊要自己舒服～未必每次每件貨品都可以在「最抵價」時買入，我只為求方便，一次過集中送貨！格價的事，留待稍後再慢慢研究吧。
最後埋單立立雜雜大約五千元吧，其實BB車和BB床不用買已經慳了好多！在一田BB用品區買滿三千蚊就可以即時入會YATA BB CLUB，之後三年買BB用品都有9折／95折啦！（不包括尿片），剛剛這個月份入會有個膠質口水兜送XD（師奶感覺就是賺了）
好像要買的都7788，銀紙也燒得8899了！另外還網上買了bb網床（放廳）及bb浴盆～
四月前目標是完成入院用的「走佬袋」，買齊後再跟大家交流一下：）
603 total views, 64 views today
============================================
感謝 小知 提供以上資料
小知的網誌: http://siuchi.hk/
============================================
