心思思又想整野,但收左工,返媽咪到食埋飯再返屋企都成九點,時間有限既情況下,只可以做簡單既野,咁不如做曲奇啦,但如果做唧花同印模都比較花時間,諗落最好都係切開一塊塊既,快靚正呀..
之前整過好多曲奇都係比較鬆,入口融化個種,今次好想做一個鬆脆既,仲要係面加啲砂糖,咁悠悠一定好中意食呢,入面選擇咗小紅莓同杏仁粒,一出爐好香啊..即時忍唔住要食,真係好好食,悠悠都食左兩個,食個時仲係熱,所以好鬆化,我諗凍左會脆口啲...
材料 :
無鹽牛油 100g
低筋麵粉 140g
粟粉 10g
糖粉 75g
蛋 半隻
小紅莓及杏仁 約50g
(可除意)
做法 :
1.
牛油室溫放軟後打軟,加糖粉打至發白
2. 加入蛋液打勻至鬆發
3. 伴入小紅莓及杏仁拌勻
4. 篩入底筋麵粉及粟粉拌勻
5.
用保鮮紙卷起,放入凍格雪半小時至硬
6. 切片,面灑砂糖,放入已預熱180度之焗爐內,焗約20分鐘至金黃色
聖誕前買左啲小袋仔,諗住聖誕整曲奇送禮既,最後曲奇無做到,袋仔都無用到...唯有快啲用埋佢啦..唔係要放到出年聖誕喇...啲袋仔好靚架..
