攻略日期：2015-03-28
朋友G:「3月28號晚『地球熄燈一小時』一齊跑步西九囉」, 零運動的老仁登時「O嘴」:「我中學畢業之後從未跑過步, 近兩年被迫同SY玩捉依欣先叫跑兩吓咋」
朋友G:「6km之麻, 行都係半個鐘, 好難得夜晚可以慈善跑, 仲係第一屆舉行添」, 聽介紹就確實吸引, 心諗:「行30分鐘又OK喎, 我日日都不停行商場架啦」, 於是便答應了.
結果, 數天前取了跑步裝備後, 愈來愈覺得害怕…麥當勞愛心馬拉松都只是2km,我步行都要20分鐘, 點解6km半小時可以完成呢?? (好有中伏感覺…驚驚…驚過上台唱歌呀!!)
我叫阿太及SY來幫我打氣, SY極渴望的眼神:「我都想一齊跑, 唔想打氣呀!!」(奇怪…點解毫無運動興趣的我會生出活躍爆燈的小朋友呢?)
今晚8時45分開跑, 我們8時正步出九龍站, 沿途已有大批夜跑人士浩浩蕩蕩的前往海濱長廊.
由九龍站步行往海濱長廊.起點, 已經不止2km, 當中還包括了約1/4的夜跑路線…
今日早上我們過了灣仔, 中午又由中環行到上環, 老實說, 我未開跑, 雙腳已經想休息…(真係死得喇…)
8時30分維港熄燈…不過並非全港所有地方也有響應, 起碼海濱長廊依然燈火通明, 講真絶對有點失望, 不是說好的要與「地球一小時」互相呼應嗎??
因為參加人數很多, 所以需要分批起跑, 當然認真的參賽者為數不少, 但仍有部份如我般的急步行份子…不過我就經常被向前衝的選手撞過最少5-6次, 他們真的如炮彈般飛馳.
原來跑到氣來氣喘的感覺也很不錯, 起碼可以暫時忘記工作的麻煩事與麻煩人, 不過望望時間, 原來急步行2km也要20分鐘喎
完全沒有競跑的我, 但四肢已漸漸無力, 雙腳麻痺, 呼吸困難, 於是由急步又變回緩步, 至慢步, 氣也喘不過來, 結果雙手撐腰, 連奶力也耗盡才能回到終點…
今晚我們太遲到達, 起跑時找不到隊友, 所以與他們只能於終點才遇上, 朋友G問:「點呀??」我答:「辛苦到死呀!!」阿太插嘴:「你真係水皮, 阿囝係草叢跟住你跑仲快過你…」
(大佬…廿幾年無跑過步, 跑得郁, 仲有命返到嚟…真係算偷笑啦!!...)雖然我跑得慢, 不過我寫Blog快, 起碼今晚周身骨痛, 都仲出到文, 算係咁啦…笑!!
