同事試咗美心最近新出嘅澳洲牛奶蛋糕話超正，叫我都快啲試，所以，收工經過香港站美心就換咗條平平哋嘅牛奶卷（試食價$68）試試，貪佢細細條（比起平時晌美心見到嘅瑞士卷短少少），一家人晚飯後當甜品食，啱啱好清得晒唔會剩。
無論個包裝盒，抑或條牛奶卷，外型都極盡心思，貼題到爆，先講個盒，真真正正嘅一「頭」一「尾」，非常有趣。
另外，更附送一張類似書簽嘅黑白牛牛卡仔，的骰得意，打開原來正正喺介紹其「3.9澳洲牛奶系列」產品，由咩組成就一清二楚。其中嘅3.9澳洲牛奶卷，由外而內，分別喺白雪雪嘅蛋白蛋糕加竹炭黑朱古力蛋糕，而裡面喺3.9有機牛奶忌廉加粒粒3.9有機牛奶奶凍。咩叫做3.9？即喺含奶脂嘅百份比，一般牛奶大概有3.00-3.3%奶脂，有啲好似北海道去到3.6，依家依隻澳洲牛奶去到3.9，所以，更濃更滑，再者，牛奶有益健康嘛。
牛奶卷加入竹炭黑朱古力做嘅乳牛黑斑，做成黑白乳牛嘅造型，一黑一白令到整條牛乳卷別緻可愛，賣相超萌。雖然，講到尾佢都只喺一條瑞士卷，但肯花心思嘅又豈會平平凡凡，普通不已呢。
外層蛋糕做得好鬆軟清香，好有彈力，雖然有一朕朕竹炭黑朱古力層，不過竹炭唔會好有咩味，而黑朱古力部份亦應該落得唔多，所以，唔會太搶，都喺「整色整水」多過要食佢個味。卷內嘅牛奶忌廉好軟滑，奶味超香濃，而忌廉中嘅奶凍，做成粒粒，濃郁挺身，帶出兩種滋味口感。
上文話過條牛奶卷比起平時晌美心見到嘅瑞士卷短啲，但拎上手仍然覺得好墜手，用料十足，而且，內外兼備，好睇又好食。既然佢都唔喺一條平平凡凡嘅瑞士卷，無理由就咁齋食，加多球Dreyer’s開心果雪糕，變得開心倍增！
個人評分
味道：9/10
環境：7/10
服務：7/10
抵食：8/10
平均每人消費：HK$17
餐廳資料：
美心西餅 Maxim's Cake Shop
中環香港機鐵站HOK 29號舖
2523 2292
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
美心西餅 (中環機鐵站HOK 2店)
堅信號上海生煎皇
Soft Thunder
嘉寶漢堡
The Beef & leaf
杯中物
買得爽(荃灣店)
Yolanda Bakery 蘭特餅店