攻略日期：2015-04-01
某日華園PR姐姐來電:「知你鍾意食蛋卷, 我哋遲啲會重出停售30年嘅手製蛋卷, 仲要係限量, 兼Made in HongKong, 有無興趣試下呀?」(我諗都唔駛諗答: 當然有啦)...
(依...你哋香港工場即造架?...我可唔可以嚟睇?), PR姐姐請示老闆肯首後, 今日我簡直開心過中六合彩, 因為我可以親身直擊蛋卷誕生過程...正呀!! (前一晚, 我直情似小學去旅行一樣, 興奮到瞓唔著添)
華園招牌貨當然是齋燒鵝, 魷魚等零食, 而蛋卷則是70年代才開始, 由畢老闆找來相熟酒店大廚拜師鑽研而成. 初期蛋卷全人手製作, 不過幾年後需求激增，才搬到大陸廠房, 由機械自動化生產.
畢老闆說:「蛋卷一般中秋過後就開始生產, 大陸廠房要24小時不停造, 先會趕得切新年有得賣, 如果唔係, 實做唔切, 一定唔夠貨賣!」
奇怪…我見陳師傅等了很久, 還未出手造蛋卷, 好奇問在等誰呢? 陳師父:「要等底面板熱度去到210度才可以開始, 就算造初初第一, 二條都會燶, 部機未適應, 啲蛋卷散唔開...太實就唔要架」(我唔介意食埋架喎…)
原來兩個發熱板, 就是要將同一條蛋卷, 左右各上棍一次… (點解唔捲三層呢?) 畢老闆:「成本貴麻, 捲兩層最好食, 不過我知E家有啲人係捲一層嘅, 咁佢哋成本米平一半囉」(薄EE點會好食架??)
一條「正「蛋巻, 厚度應該介乎0.3 – 0.5mm, 而畢老闆看一眼, 便知出爐蛋卷出色與否,「蛋漿又唔可以太多, 唔係個邊又會無咁熟…網紋愈多, 窿愈多, 就知愈鬆化, 蜂巢蛋卷麻」
(老闆你鍾意食鬆啲定實啲), 老闆:「梗係鬆啲好, 不過太鬆又上唔到棍呢…運輸過程又易碎, 出嚟深色就會較香, 但又唔可以太濃, 所以好考師傅功夫架」(嘩!! 咁多學問架…老闆仲收唔收徒弟呢??我想學呀)
人手造蛋卷, 每條要掌握在15至18秒之間, 師傅一邊造, 我就一邊食, 嘩!!新鮮熱辣, 食到有點靈魂出竅, 感覺似十足我就是吳若希, 師傅就係「街頭魔法王」Louis, 「呀! 鴉! 啞 ! 點解既..點解既...點解咁好食嘅??」
老闆話:「熱辣辣食梗係最好食啦, 放咗入罐可以保存一年, 不過愈耐啲味就會走咁啲囉」(唔掛得知即造即食, 蛋味濃到呢...個嘴會自己識得笑咁啦)
SY無緣即食出爐蛋卷, 但對於幾小時後的版本, 他一樣豎起母指話:「好食到110分 (幾多分滿分??) 100分囉…即係超好食咁解!! 爸爸你咁都唔識…」(你都係唔好講嘢住啦…你噴哂啲蛋卷碎出嚟呀)
官方資料: 華園手製蛋卷暫不公開發售, 有緣人才可一嘗
