第三日行程原本以為係比較輕鬆o既一日,
一心諗住今日可以乜都唔駛諗跟鴨仔團
點知今日原來係充滿汗水加雨水o既一日!
7:45 am 就o係明洞上車, 之後個零鐘車程就會到今日第一個景點 -
小法國村
小法國村地方唔算大但有唔少韓劇韓綜都o黎取景
"來自星星的你"你一定睇過
小齊見到都即話"千頌伊"呀
其實法國村小王子先係主角?
有唔少地方都見到小王子縱影
不過媽媽未同小齊睇過小王子, 等佢大d先
另一套韓劇係秘密花園, 媽媽最愛!!
小法國村就係金社長第一次見到吉羅琳o既地方~
鍾意到點呢??
就係當年都要買呢套意大利匠人一針一線縫o既閃閃運動服比小齊!!
哈哈~
HI 金社長~
我地會有大概一個鐘留o係度
周圍行下影下小法國村o既其他景
居然呢度有雞?!
呢度就係傳說中小王子睇44次日落o既地方嗎?!
粗略行左個圈, 影埋團體相就離開小法國村啦
下一站係南怡島, 要坐船去
船程大概 5分鐘
落船冇耐就見一片好風景
道旁長滿大樹, 據聞秋天o黎漫天紅葉係最靚
o係南怡島我地會留一個半鐘左右先去食lunch
得名源於南怡將軍埋骨於此
當年睇果套喊死人o既冬季戀歌就有南怡島o既場景
原來有兩位主角o既銅像o係度
但好搞笑, o的人埋去影相企o係人地兩個中間做小三,
畫面非常滑稽
我地又係行行走走睇下風景咁
呢個時候o黎雪已溶, 花未開...
風景唔係最靚
成日見到松鼠
有大草地比小朋友玩
嗱又見到喇
平時睇書見D 松鼠得意D, 真身有D 得人驚
呢度仲有個駝鳥園, 導遊一早叫我地唔好行太近
小齊話要咁遠先安全
行左半個南怡島, 最後又係坐船離開
中午呢餐係團餐 (團費已包)
食春川炒辣雞
雖然叫辣雞其實可以唔落辣醬, 呢盤比小朋友食
我地8個人有兩盤, 其中一盤加左辣醬留返我地大人食
除左雞, 菜仲加埋飯
小齊都貪得意話要炒下
最後佢食左大半碗
我呢碗橙飯雖然好似加左好多辣醬但我覺得一D都唔辣,
剩係覺得油
係因為我平時食得太多辣嘛?
食飽飽之後要做運動
RUNNING MAN都玩過, 唔知我地頂唔頂得順?
雖然係 4人車但你可以想像到踩o既會係邊個
兩個小妹妹都唔夠腳長
名正言順齋睇風景
因為係鐵路上踩, 冇得爬頭
踩得慢就會做"龍頭大佬"
沿路風景宜人
一開始我地都覺得幾寫意
踩呀踩...當KEEP FIT
踩左成個鐘卒之o黎到中途休息站
一個鐘先係中途... 滴汗中...
要去 toilet 好快, 休息時間得10分鐘
之後大家又要上返車再o黎過...
呢個時候開始見到對面車, 因為同時間o係我地o既終點都有發車踩去我地o既起點
呢度就係中間點大家遇見啦~
踩入隧道以為入左 disco...
音樂強勁播緊 Gangnam Style
小齊當年都好鍾意呢首歌個 MV
差D 聞歌起舞
再踩多陣居然落雨...
弊喇...冇雨褸 ~ ~
d風吹埋o黎好鬼死凍
路段之中有D 位有3軌即係可"通電"
咁大家就可以抖抖唔駛踩
點知最前果架車唔知點解感應唔到!!
我地後尾 D 車一上到去就要急煞車!!
煞車之後就會搞到連我地都唔"上電"~~
每次要煞車都想爆粗!
有幾次都踩到冇力喇但後面架車又追到上o黎...
想死...又落雨又要頂硬上搏命踩
幾經辛苦卒之o黎到終點喇~ 嗚嗚嗚
我今日真係有玩"媽媽去哪兒"挑戰團o既感覺,
已經攰到死仲要落埋雨, 狼狽到呢...
差o的想問個 camera 收o係邊度?!!!
MINAKO 居然瞓左?!
落車時我腳都震埋...
小齊就爽啦, 仲話要食雪糕
不過呢隻雪糕真係幾好食!
行程完畢我地坐返旅遊巴出首爾, 你可以想像到我地o係車上係極速瞓著 (攰到呢~)
我第一次可以唔瞓枕頭都瞓"黎"頸
返到出首爾我地o係新村落車, 結束今次o既day tour~
睇左 FB 有人推介食呢間醬油蟹, 都算近我地落車地點
홍일폼
地址：서울특별시 마포구 합정동 410-13
前往：地鐵二號線合井站，六號出口，直行五分鐘。或沿弘大大街，一直走到停車場街，盡頭便是。
我第一次食醬油蟹咋~
仲有醬油蝦
兩樣o既味道都唔錯, 蝦感覺多肉d
小朋友唔食得生o野叫左d 熟食比佢地
食完o野離開時橫風橫雨...慘~ ~
打的又難...
唯有幫小朋友著雨褸衝返去地鐵站
大雨到有遮都成身濕晒
點解今日咁辛苦咖?!
幾經辛苦先返到酒店...攰到我呢~
是日靚衫: Kenzo Kids, Little Marc Jacobs, Monnalisa, New Balance
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
