探險家攻略 > 休閒玩樂 / 城中探秘 / 興趣體驗 / 旅遊 > 其他 / 特色景點 / 公園 / 攝影 / 長線旅遊 > 長崎。平和公園﹑稻佐山夜景﹑787系列車

長崎。平和公園﹑稻佐山夜景﹑787系列車

由平凡人於 2015-04-27 21:15:00 發表 | 累積瀏覽 633

分類：其他長線旅遊特色景點公園攝影；地區：九州

< 福岡﹑熊本﹑小倉﹑長崎5天遊 >

第四天（續）

上午去過門司港後再次返到博多，出發前往今次日本九州之旅最後一個到訪城市--長崎


前往長崎既火車亦都係博多站出發，我預早一啲來到等車

仲有少少時間可以係火車站行行，日本呢啲便當太靚啦，忍唔住要望多兩眼



飯團都有咁多選擇，不過唔識日文就唔係幾分到唔同種類既飯團

大約十分鐘後就開車，係時候上去月台；火車站指示好清晰，睇電視就可以見到去長崎列車係4號月台開出，唔怕搵唔到地方上車

火車未到，大家已經乖乖地排好隊



月台上都可以買手信

無聊影下火車先

車到啦，原本係琴晚坐過既885系列車



火車總站就係長崎，就算訓覺都唔怕唔記得落車

車箱入面風格好靚架，好多植物裝飾，不過我就冇特別去影相



為左唔好買到魚造既飯團，所以買左呢個「日高昆布」，只係得呢個飯團先係用中文字咋

沿路好多地方係農田，全程我都忍唔住望住窗外風景



路程去到一半，左邊就可以見到大海啦，所以坐車去長崎最好就係坐左邊座位（可惜我係坐右邊）；係日本坐過咁多次車，我發覺次次都係坐窗口位，唔知到職員係唔係知我係遊客就比窗口位我呢？

坐左兩個鐘車，三點終於去到長崎；呢部車座位好舒服，不過呢段路隧道比較多，而車既密封能力可能唔係太好，所以經常都好似坐飛機咁出現氣壓問題令耳仔痛......

長崎站係盡頭lu

時間緊迫，入去「觀光案內所」拎張地圖就走啦；網上見到話係呢道買纜車飛會比去到纜車站買平，但我就冇問...係唔係平啲就不得而知

長崎站呢道搞緊活動bor，唔知係咩活動呢？

長崎同熊本一樣都係有電車行走，坐佢就可以去到好多主要地方



無論係車既外型抑或裡面設備都有一種古老感覺，好吸引！正如遊客來到香港都會覺得香港電車好特別，哈哈



呢道冇熊本電車咁迫人，而且票價亦都比熊本電車平，長崎電車單程收費¥120

坐到去「松山町」落車



行幾步就見到「平和公園」入口；長崎係世界上兩個遭到核武器攻擊既城市之一，當年原子彈曾經令眾多人傷亡，見到「平和」呢個名我相信公園就係為和平而建造

公園入口有一個噴水池「平和之泉」，形狀似飛翔既白鴿象徵和平



建築物係原子彈爆炸一刻被移為平地，而家只係見到呢啲遺跡...

公園中心有一個大雕像「平和祈念像」，右手指向天空代表原子彈從天而降，左手平放代表和平，希望將來唔會再有炸彈從天而降！！

長崎因為山多，受原子彈攻擊後傷亡人數比起廣島低，不過數目都係超得人驚，當時長崎住左大約24萬人，大約74000人因原子彈而死亡，75000人受傷，好多人都係係原子彈爆炸一刻即時蒸發，核武器真係好恐怖

公園內有好多雕塑，隨意影低幾個



係時候離開



平和公園旁邊有一座紀念碑「原爆落下中心地碑」，紀念碑所在位置就係原子彈爆炸中心；1945年8月9日上午11時02分，原子彈「胖子」就係呢道上空爆炸，第二次世界大戰亦都係六日後結束



紀念碑旁邊展示有「舊浦上天主堂」遺壁，天主教堂炸到只剩一條柱



原子彈係長崎爆炸產生可怕蘑菇雲（圖片from wiki）

本來好多建築物既長崎市被炸為平地（圖片from wiki）

呢道有「原爆資料館」可以參觀，展出好多原爆相關資料同物品，可惜我唔夠時間入去啦



好多學生參觀完出來

附近有好多祈求和平既藝術作品，希望世界有真正和平啦



到處都掛滿代表和平既紙鶴



仲有好多和平白鴒



行到四點半，要出發上山睇夜景啦，又可以坐電車lu

今次部車連乘客都冇



電車上有得唱散紙，唔怕冇大餅搭車

摩天輪係咁高！

去到「寶町」落車，不過仲未去到稲佐山，要先行一大段路到河既對岸



長崎好多屋都興建係山上



慢慢行用左大約25分鐘去到纜車站，可以見到大大個牌



纜車站就隱藏係「淵神社」入面，估唔到神社入面都有纜車站



到纜車站要先穿過神社



呢個就係稲佐山纜車站啦



來回車貴¥1230唔太貴

不過纜車要成20分鐘先一班，我去到岩岩走左班車就要慢慢等



出發上山啦！

越升越高，可以見到山上都有好多房屋



已經有黃昏感覺，希望上到去可以趕得切睇日落啦



到站！！

出左車站就見到個咁靚既咸蛋黃，要快啲趕去觀景台搵個更靚既位置慢慢欣賞



係太陽落山前趕到，搭遲一班車都睇唔到咁靚既日落丫



原來出面就係好出名既軍艦島，今次冇機會去啦...

見到「女神大橋」

先影低夜晚前景色



另一邊風景



HSBC都有記念館？

差唔多天黑啦



大家都搵定個好位睇夜景

黑左一半，下面已經開左燈



稲佐山高333米，有「日本三大夜景」﹑「世界新三大夜景」之稱，我黎長崎就係想睇睇稲佐山夜景有幾靚！不過今次冇拎腳架，靚相就影唔到啦，啲相影出來冇手震已經好開心，哈哈



人地影得靚好多bor

只係六點半，好多人已經走左lu，我仲有時間可以慢慢睇靚景



長崎夜景真係唔錯，除左河邊有房屋之外山上都有好多建築物，好多一點點燈光所以夜景好豐富好有層次；不過我都係覺得如果同香港比香港夜景真係靚好多，難怪好多遊客到過香港之後都覺得香港夜景非常震撼，因為香港由高樓大廈加海港所組成既夜景係世界少有，而且更加五光十色，香港人可能忽略左自己地方都有好多美景



睇多一陣我都走啦，稲佐山人唔多感覺好舒服；長崎對香港人黎講應該比較冷門，我只係係山頂呢道遇到兩個香港女仔咋，不過佢地應該發現我唔到，仲比我偷聽到秘密，哈哈^^最後佢地咁岩又同我同一班纜車走，哈哈哈哈哈~

由纜車站望落去風景好靚



話咁快就返到落去啦，原來下面有咁多人排隊等車上去睇夜景，好彩我上得去早冇咁多人咋，而且又可以睇到日景又可以睇到日落，比起只睇夜景開心好多呢

要行返去電車路個邊，行行下見到兩個香港女仔行錯路，但有唔敢提佢地...

路過FamilyMart，見有時間就入去買野食下先



又係買呢個薯餅食，好好食架！

呢部巴士去既地方好正！

由寶町去火車站只有兩個電車站距離，行路只需要10分鐘，咁我就行過去啦



話咁快就行到，仲有少少時間可以入去超級市場行行



5層高漢堡包，一個人都唔知食唔食得晒！

超級市場賣既野比起便利店平好多，呢枝飲品只係83円咋，頭先買要百幾円



飯團更加平成半，而且夜晚仲有特價tim

八點幾坐上尾二班次列車返博多，車程又要兩個鐘返到去將會好夜；今次坐787系列車



車箱冇之前搭既特急列車咁新咁靚，不過都係咁舒適



買左呢個上車慢慢食，酸酸地幾得意；原本¥65已經好平，7折之後就更平！如果唔係想留肚返博多先食晚餐我會買多啲野上車食！

食完野就可以坐係舒服既座位訓一陣啦

10:20返到博多

雖然已經返到博多，不過今日既旅程仲未完架，因為未食晚餐ma，所以而家要去搵野食啦；今晚係九州之旅最後一晚，要好好珍惜，搵一個最有博多特色既地方好好品嚐拉麵先得

鐘意SeeWide的分享，給我們一個Like吧！

檢舉

攻略日期：N/A

攻略地點：九州
攻略時間：N/A

是次消費：N/A

共1人比"掂"

EEChan 於2015-04-28 00:45:29 留言
原來長期的夜景都好靚
舉報回覆
No.1

小龍於2015-04-28 14:44:03 留言
日本真係無論任何地方，都係咁整齊乾淨
舉報回覆
No.2

平凡人於2015-05-01 08:47:49 留言
原文由 EEChan 於 2015-04-28 00:45:29 發表
原來長期的夜景都好靚

係丫
舉報回覆
No.3

平凡人於2015-05-01 08:50:40 留言
原文由小龍於 2015-04-28 14:44:03 發表
日本真係無論任何地方，都係咁整齊乾淨

就算去到街市大排檔都係咁乾淨
舉報回覆
No.4

stellaluk 於2015-05-03 08:11:49 留言
引用自 '平凡人' 的相片：
回覆：像扁鐵筒的，似香港的電車！
舉報回覆
No.5

平凡人於2015-05-03 09:12:45 留言
原文由 stellaluk 於 2015-05-03 08:11:49 發表
引用自 '平凡人' 的相片：
回覆：像扁鐵筒的，似香港的電車！

似香港舊時個啲電車
舉報回覆
No.6

stellaluk 於2015-05-04 06:25:36 留言
日本真係很多摩天輪
舉報回覆
No.7

平凡人於2015-05-04 21:00:25 留言
原文由 stellaluk 於 2015-05-04 06:25:36 發表
日本真係很多摩天輪

無啦啦係屋頂都有個，哈哈
舉報回覆
No.8

1874飛飛於2015-06-12 13:28:30 留言
引用自 '平凡人' 的相片：
回覆：點解唔食魚呢? 咁有益
通常, 我會買魚或燒肉, 見個字差不多, 有次買了個似生魷魚的, 浪費了
舉報回覆
No.9

平凡人於2015-06-14 19:06:37 留言
原文由 1874飛飛於 2015-06-12 13:28:30 發表
引用自 '平凡人' 的相片：
回覆：點解唔食魚呢? 咁有益
通常, 我會買魚或燒肉, 見個字差不多, 有次買了個似生魷魚的, 浪費了

我唔鐘意魚味有時好多都係日文，都唔知係唔係魚，都係買個識睇既好啲，買錯就浪費啦
舉報回覆
No.10