(Day 12) 2014-11-12
住宿：Tensing Pen Hotel
行程：Negril
![]()
|
|
晨早起床，清新開朗~
|
瞓醒後大家都好回味昨晚海浪聲中渡過，咁嘈既海浪聲竟然令人熟睡喎! 大家都好驚訝!
起床食酒店包既早餐，原來continental早餐只係有麵包、粟米片、水果、乳酪等等，如想食隻煎蛋、火腿。。。就請另外俾錢! 以住宿既價錢來講，係當地都算天價，好心比好少少人地食啦!
@0700
0900早餐後，尋日check in 時book好既潛水公司約好來接我們，我參加了有牌潛水$40+5-USD，港女無潛水牌則報了discover diving$80； 教練英國人Ken，老婆德國人，話因為鍾意陽光與海灘，所以揀了在Negril開間潛水中心，並定居下來，有時仲會去外地入下潛水裝備，拖喼扮遊客避稅。我再一次睇會到老外，去追求自己理想，想做就去做，令到我追求自己既夢想更加堅定不移了。
我地D財物放晒係中門大開既店舖內，教練叫我放心，雖則只是相機及僅足以俾錢潛水既現金，香港都唔放心喇何況牙買加？
港女先由教練係泳池單獨接受訓練，上完堂後休息一陣就開始啦! 落水一刻先要係約2米高既岸邊跳下，港女猶豫了好耐先跳咋! 兩米跳海都咁猶豫，睇黎佢唔夠膽跳笨豬jump了。
海水算一般，珊瑚OK，見到龍蝦同埋石頭魚，Discover diving係咁上下了。根據教練講解，加勒比海域本來無石頭魚，係有水族館放生或被破壞時，入侵呢個水域，又知多樣野。
潛水後趁成身鹹水，接下來繼續水上活動，就係返酒店條木橋玩跳海，又影相又拍片可惜因唔見相機又無晒⋯
近岸邊發現有海膽，當然唔放過食新鮮海膽既機會，一於落去捉! 職員知我們想食海膽即時為我們準備好刀叉同碟，又幫我們潛入水捉海膽，佢話都有幫過客人捉海膽，但佢自己又未食過，而我自己當然都有捉啦，但太細隻，不太好味； 食緊期間仲嚇到路經既鬼婆面容扭曲咁叫oh my god! 使唔使呀⋯歐洲人食蝸牛、南美人食倉鼠(cuy)，好似仲恐怖。
![]()
|
|
淺色應該唔係海膽，唔好食
|
及後再去埋酒店既泳池浸水，望著加勒比海，諗住自己身處未曾踏足過既地域。之後在某旅行網頁，見到一篇講酒店官方照片同現實不符既文章，呢間酒店既泳池亦榜上有名，我地又覺得都唔錯喎。
沖涼後去潛水教練介紹既巨型漢堡食午餐，每人一個巨型漢堡連飲品只係$17.50-USD，塊扒肉汁豐厚，餐牌介紹話塊漢堡扒係每日用牛肉新鮮自製，咁既價錢真係超值，從來未食過咁美味既漢堡包架! 同老細傾計期間，知道佢係加拿大人，老婆早年去世，佢一個人湊大個仔，趁仔仔大學畢業後，就來到牙買加開漢堡包店。因為好多熟客專程到牙買加食佢整既漢堡包，所以正打算去Montego Bay開分店。
@1500
沿途行街，有間紀念品店，睇啱D鎖匙扣用作擺酒回禮，諗住買60個鎖匙扣，$200-USD，20零蚊港幣一個，係就貴左少少，但夠晒心意，都唔夠有人買一粒名牌朱古力作回禮咁貴啦，但聽日先有，落左$20訂金； 講價期間思疑有人入黎買大麻，老闆娘即時係一個掛牆既膠袋取了碎濕濕既植物交左比佢，真係好似攞正牌咁喎!
沿路行兩旁被大大少少既酒店圈地作酒店範圍，即除左入酒店範圍先可去到海邊。即本地人無權享受⋯ 行去全球十大酒吧Rick's Cafe 睇遊客跳崖(LP講的)，而路經各間酒店時，亦都見到當地人表演跳崖，想駐足觀看就要擺低幾蚊喇。(當然唔擺都得啦)
(無晒D相)
行左一大輪，終於去到燈塔，另外有幾個歐洲遊客，俾一身雷鬼裝扮既人兜搭，不停講解景點，唔知佢地最後可否全身而退。回程再路經最貴既cave hotel 餐廳，之前香港既報紙雜誌都介紹過，但就來來去去都係嗰一兩張相，親眼所見覺得無報導睇得咁靚，睇黎佢地係無親身視察，只係靠網上圖片大吹一番，而且出發前酒店網價錢係我住既Tensing Pen兩陪，好在無中伏。
(貴酒店又無晒D相)
![]()
|
|
今次牙買加唯一一個雷鬼人照片，因為大量照片遺失了⋯
|
回程途中發現唔見左掛係相機袋，係巴哈馬買既行李牌，於是沿途金精火眼咁搵，都無發現...
返到酒店又無發現，問埋reception 及執房都無，睇黎我旅行途中唔見野而又搵得返既宿命要打破了…
大家都好唔開心，隊了4支啤酒，好眼睏，漢堡太大太飽又未肚餓，沖涼早抖！（港女按：去旅行瘦下來的原因之一）
@2000
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
